ກອງທັບຢູເຄຣນກ່າວໃນວັນພະຫັດມື້ນີ້ວ່າ ຕົນໄດ້ຍິງເຮືອບິນບໍ່ມີຄົນຂັບທັງໝົດ 13 ລຳທີ່ຣັດເຊຍ ປ່ອຍຂຶ້ນ ໃນການໂຈມຕີຊ່ວງຂ້າມຄືນຕົກ, ໃນຂະນະທີ່ກອງ ທັບຣັດເຊຍ ລາຍງານວ່າໄດ້ທຳລາຍເຮືອບິນບໍ່ມີຄົນຂັບຂອງຢູເຄຣນ 20 ລຳ.
ກອງທັບອາກາດຢູເຄຣນກ່າວວ່າ ລະບົບປ້ອງກັນໄພທາງອາກາດຂອງຕົນ ໄດ້ສະກັດກັ້ນເຮືອບິນບໍ່ມີຄົນຂັບເທິງເຂດ ດນິບໂປຣເປໂຕຣບກ໌ (Dnipropetrovsk), ອີວາໂນ-ແຟຣນກີບຄ໌ (Ivano-Frankivsk), ເຄິີຊັນ (Kherson), ຄເມລນິສກີ (Khmelnytskyi), ໂປລຕາວາ (Poltava), ເທີນເນີປີລ (Ternopil) ແລະເຂດ ວິນນິດເຊຍ (Vinnytsia).
ທ່ານ ເຊີຮີ ລີຊັກ (Serhiy Lysak), ຜູ້ປົກຄອງພາກພື້ນ ດນິບໂປຣເປໂຕຣບກ໌ (Dnipropetrovsk), ໄດ້ລາຍງານ ຢູ່ໃນ Telegram ກ່ຽວກັບຄວາມເສຍຫາຍ ຕໍ່ກັບເຮືອນສອງຫຼັງ, ແຕ່ບໍ່ມີການບາດເຈັບ.
ທ່ານ ນາງ ສວິດລານາ ໂອນີຊຊຸກ (Svitlana Onyshchuk) ຜູ້ປົກຄອງ ພາກພື້ນ ອີວາໂນ-ແຟຣນກີບຄ໌ (Ivano-Frankivsk) ກ່າວຢູ່ໃນ Telegram ວ່າ ສິ່ງເສດເຫຼືອທີ່ຕົກລົງມາຈາກເຮືອບິນບໍ່ມີຄົນຂັບທີ່ຖືກຍິງຕົກ ໄດ້ເຮັດໃຫ້ເກີດໄຟໄໝ້ຫຼາຍຄັ້ງ.
ການໂຈມຕີທາງອາກາດຂອງຢູເຄຣນ ສ່ວນໃຫຍ່ໄດ້ສຸມໃສ່ພາກພື້ນ ແບລໂກຣອດ (Belgorod) ທີ່ຕັ້ງຢູ່ລຽບຕາມຊາຍແດນລະຫວ່າງສອງປະເທດ.
ກະຊວງປ້ອງກັນປະເທດຣັດເຊຍກ່າວວ່າ ຕົນໄດ້ທຳລາຍເຮືອບິນບໍ່ມີຄົນຂັບ 16 ລຳ ແລະລູກສອນໄຟສອງລູກຢູ່ເໜືອ ແບລໂກຣອດ (Belgorod), ເຊິ່ງຜູ້ປົກ ຄອງພາກພື້ນດັ່ງກ່າວ, ທ່ານ ວີຢາເຊລລາບ ກລາດຄອຟ (Vyacheslav Gladkov) ໄດ້ລາຍງານຄວາມເສຍຫາຍຕໍ່ເຮືອນ 1 ຫຼັງ ແລະມີຜູ້ໄດ້ຮັບບາດເຈັບ 1 ຄົນ.
ກະຊວງປ້ອງກັນປະເທດຂອງຣັດເຊຍ ກ່າວວ່າການປ້ອງກັນທາງອາກາດຂອງຣັດເຊຍ ຍັງໄດ້ຍິງເຮືອບິນບໍ່ມີຄົນຂັບ 3 ລຳຕົກຢູ່ເຂດ ຣັອສໂຕຟ (Rostov) ແລະອີກລຳໜຶ່ງຢູ່ເຂດ ໂວໂຣເນຊ (Voronezh).
ທ່ານ ວາຊີລີ ໂກລູເບັຟ (Vasily Golubev), ຜູ້ປົກຄອງພາກພື້ນ ຣັອສໂຕຟ (Rostov), ກ່າວວ່າ ສິ່ງເສດເຫຼືອ ທີ່ຕົກລົງມາ ໄດ້ສ້າງຄວາມເສຍຫາຍ ໃຫ້ແກ່ຕຶກອາຄານອຸດສາຫະກຳ ແລະ ເຮັດໃຫ້ມີຜູ້ໄດ້ຮັບບາດເຈັບ 1 ຄົນ.
ຟໍຣັມສະແດງຄວາມຄິດເຫັນ