ບໍລິສັດ Tesla ໄດ້ປິດການຟ້ອງຮ້ອງ ກ່ຽວກັບ ອຸບັດຕິເຫດລົດຕຳກັນໃນປີ 2018 ທີ່ເຮັດໃຫ້ນັກວິສະວະກອນຂອງບໍລິສັດ Apple ເສຍຊີວິດໃນປີ 2018 ຫຼັງຈາກລົດ Model X ຂອງລາວ ທີ່ປະຕິບັດການຂັບເຄື່ອນອັດຕະໂນມັດໄດ້ເຈີດອອກຈາກທາງດ່ວນໃກ້ກັບນະຄອນ ແຊນ ແຟຣນຊິສໂກ, ເອກະສານຫຼັກຖານໄດ້ສະແດງໃຫ້ເຫັນໃນວັນຈັນວານນີ້.
ການປິດຄະດີດັ່ງກ່າວໄດ້ມີຂຶ້ນໃນຂະນະທີ່ການດຳເນີນຄະດີແມ່ນໃກ້ຈະເລີ່ມຕົ້ນ ກ່ຽວກັບ ອຸບັດຕິເຫດທີ່ໄດ້ຮັບຄວາມສົນໃຈສູງທີ່ປະກອບມີເທັກໂນໂລຈີຊ່ວຍຄົນຂັບລົດຂອງ Tesla, ເຊິ່ງໄດ້ສິ້ນສຸດການຕໍ່ສູ້ທາງກົດໝາຍຫ້າປີ ກ່ຽວກັບ ຄະດີດັ່ງກ່າວ.
ເງື່ອນໄຂຂອງການປິດຄະດີແມ່ນບໍ່ໄດ້ຖືກເປີດເຜີຍ.
ຄະດີດັ່ງກ່າວປະກອບມີອຸບັດຕິເຫດຢູ່ເທິງທາງດ່ວນທີ່ໄດ້ເຮັດໃຫ້ທ້າວ ວອລເທີ ຫວາງ ເສຍຊີວິດ. ບໍລິສັດ Tesla ໄດ້ໂຕ້ແຍ້ງວ່າ ທ້າວ ຫວາງ ໄດ້ໃຊ້ລະບົບຂັບເຄື່ອນແບບອັດຕະໂນມັດໃນທາງທີ່ຜິດ ເພາະວ່າ ລາວໄດ້ຫຼິ້ນວິດີໂອເກມກ່ອນເກີດອຸບັດຕິເຫດ.
ຄອບຄົວຂອງທ້າວ ຫວາງ ໄດ້ກ່າວຫາວ່າ ລະບົບຂັບເຄື່ອນອັດຕະໂນມັດໄດ້ຫັນລົດ Model X ປີ 2017 ຂອງລາວເຂົ້າໃສ່ສິ່ງຂັ້ນທາງດ່ວນ.
ທະນາຍຄວາມຂອງຄວບຄົວທ້າວ ຫວາງ ຍັງໄດ້ຍົກຄຳຖາມ ກ່ຽວກັບວ່າ ບໍລິສັດ Tesla ເຂົາເຈົ້າໃຈວ່າ ຄົນຂັບລົດແມ່ນມີຄວາມເປັນໄປໄດ້ທີ່ຈະບໍ່ ຫຼື ອາດຈະບໍ່ໃຊ້ລະບົບດັ່ງກ່າວ ຄືທີ່ໄດ້ຊີ້ນຳຫຼືບໍ່, ແລະ ຜູ້ຜະລິດລົດນັ້ນ ຈະເອົາບາດກ້າວໃດເພື່ອປົກປ້ອງເຂົາເຈົ້າ.
ທະນາຍຄວາມຂອງທ່ານ ຫວາງ ແລະ Tesla ແມ່ນບໍ່ໄດ້ຫວ່າງເພື່ອໃຫ້ຄຳເຫັນໃນທັນທີ.
ອຸບັດຕິເຫດລົດຕຳທີ່ໄດ້ເຮັດໃຫ້ທ້າວ ຫວາງ ເສຍຊີວິດແມ່ນນຶ່ງໃນອຸບັດຕິເຫດ ຫຼາຍຮ້ອຍຄັ້ງໃນ ສະຫະລັດ ເຊິ່ງລະບົບຂັບເຄື່ອນອັດຕະໂນມັດ ແມ່ນປັດໄຈທີ່ຕ້ອງສົງໄສໃນລາຍງານຕ່າງໆທີ່ຂຽນເຖິງຜູ້ອອກກົດລະບຽບຄວາມປອດໄພຂອງລົດຍົນ.
ລະບົບຂັບເຄື່ອນອັດຕະໂນມັດສາມາດບັງຄັບ, ເລັ່ງ ແລະ ເບກດ້ວຍຕົວມັນເອງໃນຖະໜົນເປີດ ແຕ່ບໍ່ສາມາດທົດແທນຄົນຂັບທີ່ເປັນມະນຸດໄດ້ຢ່າງເຕັມສ່ວນ, ໂດຍສະເພາະຂັບຢູ່ໃນຕົວເມືອງ. ປື້ມຄູ່ມືຂອງ Tesla ໄດ້ອະທິບາຍຄຳເຕືອນຂອງລະບົບດັ່ງກ່າວວ່າ ມັນບໍ່ໄດ້ເຮັດໃຫ້ລົດດັ່ງກ່າວເປັນລົດອັດຕະໂນມັດ ແລະ ຕ້ອງມີຄົນຂັບບັງຄັບມັນຢ່າງເຕັມທີ” ຜູ້ທີ່ສາມາດ “ເຂົ້າຄວບຄຸມໄດ້ທຸກສະຖານະການ.”
ຟໍຣັມສະແດງຄວາມຄິດເຫັນ