ອົບພະຍົບກຸ່ມນຶ່ງຈາກປາກິສຖານ ຈຳນວນ 45 ຄົນ ໄດ້ໄປເຖິງເມືອງ Dikiliປະເທດເທິກີ ໃນການເດີນທາງລະຍະສັ້ນ ຈາກສູນອົບພະຍົບ ບ່ອນທີ່ເຂົາເຈົ້າໄດ້ພັກພາອາໄສຢູ່ທີ່ ເກາະ Lesbos ຂອງກຣີສ ຊຶ່ງເປັນອົບພະຍົບກຸ່ມທີສອງທີ່ຈະຖືກສົ່ງກັບຄືນ ພາຍໃຕ້ຂໍ້ ຕົກລົງໃໝ່ ທີ່ມີການຂັດແຍ້ງຂອງສະຫະພາບຢູ ໂຣບກັບເທີກີ.
ເຮືອຂ້າມຟາກເທີກີລຳນຶ່ງ ໄດ້ຂົນເອົາພວກອົບພະຍົບ ໄປຫາທ່າເຮືອຂອງເມືອງດັ່ງກ່າວ ໃນວັນສຸກມື້ນີ້ແລະຈະມີພວກອົບພະຍົບປະມານ 80 ຄົນຕິດຕາມມາຕື່ມອີກ. ບັນດາເຈົ້າ ໜ້າທີ່ກຣິສ ກ່າວວ່າ ພວກອົບພະຍົບທີ່ຖືກສົ່ງໄປເທິກີນັ້ນ ບໍ່ມີໃຜຍື່ນຄຳຮ້ອງ ຂໍລີ້ໄພໃນ ສະຫະພາບຢູໂຣບ. ບັນດາເຈົ້າໜ້າທີ່ສະຫະພາບຢູໂຣບກ່າວໃນວັນພຸດທີ່ຜ່ານມານີ້ວ່າ ອົບພະຍົບທັງໝົດທີ່ປະເຊີນໜ້າກັບການຖືກເນລະເທດ ຈະໄດ້ຮັບໂອກາດຍື່ນຄຳຮ້ອງຂໍ ລີ້ໄພແລະພວກທີ່ຖືກປະຕິເສດນັ້ນ ມີການໃຫ້ສັນຍາວ່າຈະມີເວລາຫ້າມື້ໃນການອຸທອນ.
ໃນຂະນະທີ່ໄດ້ມີການກະກຽມ ໃຫ້ພວກອົບພະຍົບເດີນທາງອອກຈາກເກາະ Lesbos ໃນ ວັນ ສຸກມື້ນີ້ ນັກເຄື່ອນໄຫວຢ່າງໜ້ອຍສອງຄົນໄດ້ຖືກຈັບ ຫລັງຈາກໄດ້ໂດດລົງນໍ້າ ແລ້ວ ຈ່ອງ ສາຍໂສ້ໃຫຍ່ທີ່ຕິດກັບສະໝໍເຮືອຂ້າມຟາກ. ບັນດານັກເຄື່ອນໄຫວພາກັນເຮັດວຽກເພື່ອໃຫ້ຢຸດເຊົາການເນລະເທດ ໂດຍກ່າວວ່າ ພວກອົບພະ ຍົບບໍ່ສາມາດໃຫ້ການຄໍ້າປະ ກັນວ່າ ຈະໄດ້ຮັບການດູແລທີ່ດີຢູ່ໃນເທິກີ ຊຶ່ງມີປະ ຫວັດການເຄົາລົບນັບຖືສິດທິມະນຸດ ບໍ່ຄ່ອຍດີປານໃດນັ້ນ.
ໃນຂະນະດຽວກັນ ເຢຍຣະມັນໄດ້ປະກາດວ່າ ຈຳນວນຄຳຮ້ອງຂໍລີ້ໄພໃໝ່ ທີ່ຕົນໄດ້ຮັບ ໄດ້ຫລຸດລົງຢ່າງຫລວງຫລາຍຈາກເດືອນກຸມພາຫາເດືອນມີນາ ຮວມທັງໝົດມີພຽງແຕ່ 20,000 ສະບັບປຽບທຽບໃສ່ 60,000 ສະບັບຕໍ່ເດືອນກ່ອນໜ້າ ນີ້. ເຢຍຣະມັນໄດ້ນຳ ພາການເຄື່ອນໄຫວ ເພື່ອຮັບເອົາພວກອົບພະຍົບທີ່ຫຼັ່ງໄຫຼເຂົ້າມາ ແບບທີ່ບໍ່ເຄີຍມີມາ ກ່ອນຈາກຕາເວັນອອກໃນຂະນະທີ່ຜູ້ຄົນພາກັນຫຼົບໜີຈາກຄວາມຮຸນແຮງແລະບໍ່ໝັ້ນ ຄົງທາງເສດຖະກິດໃນອາຟຣິກາ ເອເຊຍໃຕ້ແລະ ພາກຕາເວັນອອກກາງ.