ທ່ານນາງ Karen Bevard Stewart ເອກອັກຄະລັດ
ຖະທູດສະຫະລັດປະຈໍາປະເທດລາວຄົນໃໝ່ ໄດ້ໃຫ້ການ
ຢືນຢັນຫລັງຈາກການຍື່ນສານຕາຕັ້ງຕໍ່ທ່ານຈູມມະລີ ໄຊຍະສອນ ປະທານປະເທດລາວຢ່າງເປັນທາງການ ໃນຕອນແລງຂອງ
ວັນທີ່ 16 ເດືອນພະຈິກທີ່ຜ່ານມານີ້ຢູ່ຫໍຄໍາ ວ່າທາງການສະຫະລັດຈະໃຫ້ການຊ່ວຍເຫລືອ
ແກ່ລາວຈໍານວນ 6 ໂຄງການເປັນຢ່າງໜ້ອຍໃນໄລຍະແຜນການປີ 2010-2011ນີ້. ໂດຍ
ທັງໝົດ 6 ໂຄງການດັ່ງກ່າວຈະເປັນການເນັ້ນໜັກໃນດ້ານສຸຂະພາບອະນາໄມ ແລະການ
ພັດທະນາທາງດ້ານການສຶກສາໃນເຂດຊົນນະບົດເປັນສໍາຄັນ ກໍຄືໂຄງການກໍ່ສ້າງຫ້ອງສຸກ
ເສີນໃຫ້ແກ່ໂຮງໝໍມິດຕະພາບລາວ-ມົງໂກເລຍຢູ່ແຂວງຊຽງຂວາງ. ສ່ວນທີ່ເຫລືອນັ້ນກໍ
ເປັນໂຄງການກໍ່ສ້າງໂຮງຮຽນມັດທະຍົມສົມບູນ 4 ແຫ່ງໃນແຂວງສາລະວັນ, ສະຫວັນນະ
ເຂດ, ເຊກອງ, ຊຽງຂວາງ ແລະໂຄງການກໍ່ສ້າງໂຮງຮຽນປະຖົມບໍລິບູນອີກ 1 ແຫ່ງຢູ່ໃນ
ແຂວງອັດຕະປື.
ພ້ອມກັນນີ້ ທ່ານນາງ Stewart ເອກອັກຄະລັດຖະທູດສະຫະລັດປະຈໍາປະເທດລາວຄົນໃໝ່
ຍັງຢືນຢັນອີກດ້ວຍວ່າ ການພັດທະນາຄວາມຮ່ວມມືລະຫວ່າງສະຫະລັດກັບລາວໃນໄລຍະຕໍ່
ໄປນີ້ຈະມີການຂະຫຍາຍກວ້າງອອກໄປໃນທຸກດ້ານ. ສ່ວນທີ່ໄດ້ປະຕິບັດການຮ່ວມມືລະຫວ່າງ
ກັນມາ ໃນໄລຍະທີ່ຜ່ານມານັ້ນ ກໍຍັງຄົງດໍາເນີນຕໍ່ໄປຢ່າງບໍ່ຢຸດຢັ້ງກັບ ທັງຍັງຈະປະຕິບັດການ
ຮ່ວມມືລະຫວ່າງກັນໃຫ້ມີປະສິດທິຜົນຫລາຍຂຶ້ນນັບມື້ອີກດ້ວຍ.
ລມຕ ການຕ່າງປະເທດລາວ ທ່ານ ທອງລຸນ ສີສຸລິດ ຈັບມືກັບທ່ານນາງ ຮີລເລີຣີ ຄລິນຕັນ ລມຕ ການຕ່າງປະເທດ ສະຫະລັດ ທີ່ກະຊວງ ຕ່າງປະເທດສະຫະລັດ ໃນລະວ່າງການມາຢ້ຽມ ຢາມວໍຊິງຕັນ ເມື່ອເດືອນກໍລະກົດ 2010.
ກ່ອນໜ້ານີ້ ທ່ານທອງລຸນ ສີສຸລິດ ຮອງນາຍົກລັດຖະມົນຕີ ແລະລັດຖະມົນຕີວ່າການຕ່າງປະເທດຂອງລາວ ທີ່ໄດ້ເດີນທາງໄປຢ້ຽມຢາມສະຫະລັດຢ່າງເປັນທາງການເມື່ອບໍ່ນານມານີ້ ກໍໄດ້ສະແດງຄວາມເຊື່ອໝັ້ນວ່າ ຄວາມ ສໍາພັນແລະຄວາມຮ່ວມມືລະ ຫວ່າງລາວກັບສະຫະລັດຈະມີ ການຂະຫຍາຍຕົວຫລາຍຂຶ້ນໃນທຸກດ້ານເຊັ່ນກັນ ໂດຍທ່ານໄດ້ສະແດງເຖິງຄວມເຊື່ອໝັ້ນດັ່ງ ກ່າວ ໃນຕອນນຶ່ງວ່າ:
“ປີນີ້ກໍເປັນປີທີ່ 55 ທີ່ລາວກັບສະຫະລັດ ໄດ້ສ້າງສາຍ ພົວພັນທາງການທູດລະ ຫວ່າງກັນ ຈຶ່ງຄິດວ່າເປັນໂອກາດດີທີ່ຈະສົ່ງເສີມແລະເສີມສ້າງສາຍພົວພັນທີ່ມີມູນເຊື້ອມາຕັ້ງ 55 ປີນັ້ນ ໃຫ້ສືບຕໍ່ມີໝາກມີຜົນແລະມີຄວາມຮັດແໜ້ນໃຫ້ຫລາຍກວ່າເກົ່າ”
ທາງດ້ານທ່ານ Ralph Cossa ປະທານສູນສຶກສາຍຸດທະສາດລະຫວ່າງຊາດແຫ່ງສະຫະ
ລັດ ກໍໄດ້ຢືນຢັນໃນລະຫວ່າງການບັນລະຍາຍພິເສດ ໃນຫົວຂໍ້ວ່າດ້ວຍການວິວັດທະນາ
ການຂອງພູມິພາກນິຍົມແລະບົດບາດຂອງສະຫະລັດໃນພູມິພາກເອເຊຍ-ແປຊິຟິກ ຊຶ່ງໄດ້
ຈັດຂຶ້ນຢູ່ທີ່ສະຖາບັນການຕ່າງປະເທດຂອງກະຊວງຕ່າງປະເທດລາວເມື່ອບໍ່ນານມານີ້ ວ່າ
ການຮ່ວມມືລະຫວ່າງສະຫະລັດກັບລາວໄດ້ມີການຂະຫຍາຍຕົວຫລາຍຂຶ້ນ ແລະມີພັດທະ
ນາການທີ່ດີຂຶ້ນໃນທຸກໆດ້ານອີກດ້ວຍ.
ນອກຈາກນີ້ ທາງການສະຫະລັ ກໍຍັງໄດ້ໃຫ້ການຊ່ວຍເຫລືອລາວໃນການເກັບກູ້ລະເບີດບໍ່ທັນແຕກ ຫລື UXO ມາຢ່າງຕໍ່ເນື່ອງ ໂດຍນັບແຕ່ປີ 1996 ເປັນຕົ້ນມາ ຈົນເຖິງປັດຈຸບັນ ກໍປາກົດວ່າທາງການສະຫະລັດໄດ້ໃຫ້ການຊ່ວຍເຫລືອແກ່ລາວແລ້ວຫລາຍກວ່າ 30 ລ້ານໂດລາ ແລະກໍຍັງຈະໃຫ້ການຊ່ວຍເຫລືອຕໍ່ໄປ ຊຶ່ງລວມເຖິງການຊ່ວຍເຫລືອໃນການພັດ ທະນາຊົນນະບົດ ເພື່ອຫລຸດຜ່ອນບັນຫາຄວາມຍາກຈົນຂອງປະຊາຊົນລາວ ແລະການລົບລ້າງການປູກຢາຝິ່ນຢ່າງສິ້ນເຊີງໃນລາວໃຫ້ໄດ້ຢ່າງແທ້ຈິງດ້ວຍ.