ແຫລ່ງຂ່າວຜູ້ລີ້ໄພຊາວທິເບດ ກ່າວຕໍ່ວີໂອເອພະແນກພາສາທິເບດວ່າ ຊາວທິເບດອີກສອງ
ຄົນ ໄດ້ເຜົາໂຕເອງຕາຍ ເພື່ອປະທ້ວງການປົກຄອງຂອງຈີນ ຢູ່ໃນບ້ານເກີດເມືອງນອນ
ຂອງເຂົາເຈົ້າ.
ເຂົາເຈົ້າກ່າວວ່າ ການເຜົາໂຕເອງຕາຍ ໄດ້ເກີດຂື້ນໃນຕອນແລງວັນຈັນວານນີ້ ຕາມເວລາ
ທ້ອງຖິ່ນ ທີ່ເມືອງ Ngaba ຊຶ່ງຈີນຮ້ອງວ່າ Aba ໃນແຂວງ Sichuan ທີ່ຕິດກັບເຂດທິເບດ.
ໃນເວລານີ້ ຍັງບໍ່ມີຂ່າວເພີ້ມເຕີມໃດໆອີກກ່ຽວກັບເລື່ອງນີ້.
ການເຜົາໂຕເອງຄັ້ງລ້າສຸດນີ້ ເຮັດໃຫ້ຈຳນວນຜູ້ທີ່ເຜົາໂຕເອງຕາຍເພີ່ມຂຶ້ນເປັນປະມານ 50
ຄົນ ນັບແຕ່ເດືອນມີນາ ປີ 2009 ເປັນຕົ້ນມາ ເພື່ອປະທ້ວງການປົກຄອງຂອງຈີນ ໃນທິເບດ.
ຊາວທິເບດ ພາກັນມີຄວາມບໍ່ພໍໃຈເພີ່ມຂຶ້ນ ກ່ຽວກັບອັນທີ່ເຂົາເຈົ້າເຫັນວ່າ ເປັນການຈຳກັດ
ຮັດແຄບຂອງລັດຖະບານຈີນ ໃນດ້ານສາສະໜາແລະວັດທະນາທໍາ ຊຶ່ງເປັນການກ່າວຫາທີ່
ປັກກິ່ງໄດ້ປະຕິເສດ.
ລັດຖະບານຈີນເວົ້າວ່າ ການເຜົາໂຕເອງຕາຍ ເປັນການປະພຶດທີ່ປາເຖື່ອນຂອງຜູ້ກໍ່ການຮ້າຍ.
ຈີນຍັງໄດ້ກ່າວຫາກຸ່ມທິເບດພົ້ນທະເລ ແລະອົງດາໄລລາມະຜູ້ນໍາທາງດ້ານຈິດໃຈຂອງຊາວ
ທິເບດວ່າເປັນຜູ້ຍຸແຍ່ໃຫ້ມີການແບ່ງແຍກປະເທດ.