ພາຍຸໄຕ້ຝຸ່ນໝ້ານຢີ້ (Man-yi) ທີ່ພັດເຂົ້າພາກເໜືອຂອງຟີລິບປິນ ເມື່ອວັນອາ ທິດວານນີ້ ໄດ້ທຳລາຍບ້ານເຮືອນຈຳນວນຫຼາຍຫຼັງ ແລະກໍ່ໃຫ້ເກີດຄື້ນທະເລສູງ ເຊິ່ງທາງການຕ້ອງໄດ້ສັ່ງການໃຫ້ອົບພະຍົບປະຊາຊົນຫຼາຍແສນຄົນ ອອກຈາກ ພື້ນທີ່ທີ່ປະສົບໄພດັ່ງກ່າວ ອີງຕາມລາຍງານຂອງອົງການຂ່າວເອພີ.
ໄຕ້ຝຸ່ນໝ້ານຢີ້ ພັດເຂົ້າພື້ນທີ່ແຂວງ ຄາຕັນດົວເນສ ເມື່ອແລງວັນເສົາດ້ວຍລົມ ແຮງເຖິງ 195 ກິໂລແມັດຕໍ່ຊົ່ວໂມງ ຖືວ່າເປັນພາຍຸຂະໜາດໃຫຍ່ຫົວທີ 6 ທີ່ພັດຖະຫຼົ່ມ ຟີລິບປິນ ໃນຊ່ວງເວລາບໍ່ເຖິງນຶ່ງເດືອນ.
ກົມອຸຕຸນິຍົມວິທະຍາຂອງຟີລິບປິນ ເຕືອນວ່າ ອາດເກີດໄພພິບັດ ແລະສະຖາ ນະການທີ່ອາດເປັນໄພອັນຕະລາຍເຖິງແກ່ຊີວິດ ຢູ່ຕະຫຼອດເສັ້ນທາງທີ່ພາຍຸຫົວ ນີ້ພັດຜ່ານ ລວມທັງທົ່ວເກາະລູຊອນ ທີ່ມີປະຊາກອນຫຼາຍທີ່ສຸດຂອງຟີລິບປິນ.
ຈົນເຖິງຂະນະນີ້ ຍັງບໍ່ມີລາຍງານຜູ້ເສຍຊີວິດໃດໆຈາກພາຍຸດັ່ງກ່າວ ຂະນະທີ່ ຫຼາຍພື້ນທີ່ໃນແຂວງ ຄາຕັນຄົວເນສ ເກີດໄຟຟ້າດັບ.
ພາຍຸຸໄຕ້ຝຸ່ນໝ້ານຢີ້ພັດເຂົ້າພື້ນທີ່ແຂວງຄາຕັນດົດເນສ ສ້າງຄວາມເສຍຫາຍແກ່ພື້ນຕາເວັນອອກສຽງເໜືອ, ເມື່ອວັນທີ 17 ພະຈິກ 2024.
ເຈົ້າໜ້າທີ່ໄດ້ລະບຸວ່າ ປັດຈຸບັນມີປະຊາຊົນຫຼາຍກວ່າ 750,000 ຄົນທີ່ອາໄສຢູ່ ຕາມສະຖານທີ່ຫລົບໄພຊົ່ວຄາວ ລວມທັງຕາມໂບດ ແລະຮ້ານຊັບພະສິນຄ້າ ຕ່າງໆ ຫລັງຈາກຟີລິບປິນ ປະເຊີນກັບພາຍຸຕິດຕໍ່ກັນຫຼາຍຫົວ ໃນຊ່ວງໄລຍະ ເດືອນທີ່ຜ່ານມານີ້.
ເມື່ອຕົ້ນເດືອນນີ້ ພາຍຸໄຕ້ຝຸ່ນເຢິງຊິ່ງ ພັດຖະຫຼົ່ມຊາຍຝັ່ງພາກເໜືອຂອງຟີລິປິນ ເຊິ່ງໄດ້ທຳລາຍອາຄານບ້ານເຮືອນຫຼາຍຫຼັງ ແລະເຮັດໃຫ້ມີເດັກຜູ້ຍິງໄວ 12 ປີເສຍຊີວິດ ແລະປະຊາຊົນປະມານ 50,000 ຄົນຕ້ອງກາຍເປັນຜູ້ອົບພະຍົບ.
ກ່ອນໜ້ານັ້ນ ບໍ່ເທົ່າໃດອາທິດ ພາຍຸເຂດຮ້ອນ ຈ່າມີ ແລະຊຸບເປີ້ໄຕ້ຝຸ່ນ ກອງເຣຍ ໄດ້ສ້າງຄວາມເສຍຫາຍຢ່າງໜັກ ແລະມີຜູ້ເສຍຊີວິດເຖິງ 158 ຄົນ.
ສະໜາມບິນໃນປະເທດຢ່າງໜ້ອຍ 26 ແຫ່ງ ແລະສະໜາມບິນສາກົນ 2 ແຫ່ງ ຍັງຄົງປິດການປະຕິບັດງານບາງສ່ວນ ເຊັ່ນດຽວກັນກັບບໍລິການຂ້າມຟາກ ໄປຍັງເກາະຕ່າງໆ ແລະກຳປັ່ນບັນທຸກສິນຄ້າພາຍໃນປະເທດ ເຮັດໃຫ້ມີຜູ້ໂດຍ ສານຕິດຄ້າງຫຼາຍພັນຄົນ ໂດຍອ້າງອີງຈາກຂໍ້ມູນຂອງທາງການຟີລິບປິນ.
ສະຫະລັດ, ສິງກະໂປ, ມາເລເຊຍ, ອິນໂດເນເຊຊ ແລະບຣູໄນ ຕ່າງກໍສົ່ງເຮືອ ບິນຂົນສົ່ງສິນຄ້າ ແລະການຊ່ອຍເຫຼືອອື່ນໆໄປໃຫ້ແກ່ຟີລິບປິນ ເພື່ອຮັບມືກັບ ໄພພິບັດຄັ້ງຫຼ້າສຸດນີ້.
ແຕ່ລະປີ ຟີລິບປິນ ປະເຊີນກັບພາຍຸຫົວໃຫຍ່ປະມາດ 20 ຫົວ ແລະງານວິໄຈ ຊີ້ໃຫ້ເຫັນວ່າ ພາຍຸເຂດເອເຊຍປາຊີຟິກ ມີແນວໂນມຈະຮຸນແຮງຂຶ້ນ ແລະເກີດ ໃກ້ຊາຍຝັ່ງຫຼາຍຂຶ້ນ ເນື່ອງຈາກການປ່ຽນແປງຂອງດິນຟ້າອາກາດຂອງໂລກ.