ປະທານາທິບໍດີສະຫະລັດ ທ່ານ Barrack Obama ກ່າວວ່າ ທ່ານເຊື່ອວ່າ ອີຈິບຈະບໍ່
ກັບຄືນສູ່ສະພາບເດີມທີ່ເຄີຍເປັນຢູ່ ກ່ອນມີການປະທ້ວງເພື່ອປະຊາທິປະໄຕ ທີ່ໄດ້ລາມ
ໄປທົ່ວປະເທດ ໃນທ້າຍເດືອນແລ້ວນີ້.
ໃນການໃຫ້ສໍາພາດສົດແກ່ຕານ່າງໂທລະພາບຂ່າວ FOX ໃນວັນອາທິດວານນີ້ ທ່ານ
Obama ກ່າວວ່າ ທ່ານໝັ້ນໃຈວ່າ ການປ່ຽນແປງທາງການເມືອງຢ່າງເປັນລະບຽບໃນ
ອີຈິບ ຈະຍັງຜົນໃຫ້ມີລັດຖະບານທີ່ເປັນຕົວແທນຂອງປະຊາຊົນ ແລະທີ່ສາມາດຈະເປັນ ພາຄີກັບສະຫະລັດໄດ້.
ພວກເຄື່ອນໄຫວທີ່ຕໍ່ຕ້ານລັດຖະບານອີຈິບ ໄດ້ທໍາການປະທ້ວງຢ່າງໃຫຍ່ຢູ່ຕາມຖະໜົນ
ຫົນທາງສາຍສໍາຄັນໆ ມາເປັນເວລາ 2 ອາທິດແລ້ວ ເພື່ອຮຽກຮ້ອງໃຫ້ປະທານາທິບໍດີ
Hosni Mubarak ທີ່ໄດ້ຄອງອໍານາດມາເປັນເວລາເກືອບ 30 ປີແລ້ວນັ້ນ ລົງຈາກອໍາ
ນາດໂດຍທັນທີ. ທ່ານ Mubarak ໄດ້ສະໜອງຕອບໂດຍການປະກາດວ່າ ຈະບໍ່ລົງສະ
ມັກເລືອກຕັ້ງເປັນປະທານາທິບໍດີອີກເປັນສະໄໝ ທີ່ 6 ໃນການເລືອກຕັ້ງທີ່ຈະມີຂຶ້ນໃນ ເດືອນກັນຍາທ້າຍປີນັ້ນ.
ທ່ານ Obama ກ່າວວ່າ ສະຫະລັດບໍ່ສາມາດທີ່ຈະບົງການແບບບັງຄັບວ່າ ໃຫ້ທ່ານ
Mubarak ກ້າວລົງຈາກຕໍາແໜ່ງໄວສໍ່າໃດ ແຕ່ປະທານາທິບໍດີສະຫະລັດກໍໄດ້ເນັ້ນຍໍ້າ
ທັດສະນະຂອງທ່ານ ທີ່ວ່າປະທານາທິບໍດີອີຈິບ ຈະຕ້ອງເລີ່ມຕົ້ນການມອບໂອນອໍາ
ນາດ ນະບັດນີ້.