ທ່ານ ທອງບັນ ແສງອາພອນ, ລັດຖະມົນຕີການກະຊວງ
ປ້ອງກັນຄວາມສະຫງົບພາຍໃນລາວ ໄດ້ຖະແຫຼງຢືນຢັນ
ໃນໂອກາດເປັນປະທານຂອງກອງປະຊຸມຫົວໜ້າຕໍາຫຼວດອາຊຽນ ແລະປະເທດຄູ່ເຈລະຈາຂອງອາຊຽນຄັ້ງທີ່ 31 ທີ່
ມີຂຶ້ນຢ່າງເປັນທາງການໃນລະຫວ່າງວັນທີ 30 ພຶດສະພາ ເຖິງວັນທີ 2 ມິຖຸນາ ທີ່ຜ່ານມານີ້ ຢູ່ນະຄອນຫຼວງວຽງຈັນ
ວ່າ ລັດຖະບານລາວມີຄວາມພ້ອມໃນທຸກໆດ້ານ ທີ່ຈະເສີມຂະຫຍາຍການຮ່ວມມືກັບປະເທດສະມາຊິກໃນອາຊຽນດ້ວຍ
ກັນ ແລະບັນດາປະເທດຄູ່ເຈລະຈາຂອງອາຊຽນ ເຂົ້າໃນ ການປ້ອງກັນ ແລະປາບປາມອາຊະຍາກໍາຂ້າມຊາດໃນທຸກຮູບແບບໃຫ້ມີປະສິດທິພາບ ແລະມີຄວາມວ່ອງໄວທັນຕໍ່ ສະຖານະການທີ່ເກີດຂຶ້ນຢ່າງແທ້ຈິງ.
ທັ້ງນີ້ ໂດຍສະເພາະແມ່ນການຮ່ວມມືໃນການປ້ອງກັນ
ແລະປາບປາມການກໍ່ການຮ້າຍ, ການຄ້າອາວຸດ, ການຄ້າ
ມະນຸດ, ການຄ້າຢາເສບຕິດ, ອາຊະຍາກຳທາງເສດຖະ
ກິດເຊັ່ນ: ການປອມແປງບັດເຄຣດິດ ແລະການຟອກເງິນ
ລວມໄປເຖິງອາຊະຍາກໍາດ້ານຂໍ້ມູນຂ່າວສານ ທີ່ເປັນໄພຂົ່ມ
ຂູ່ຕໍ່ຄວາມໝັ້ນຄົງ ແລະການເມືອງການປົກຄອງໃນພູມີພາກອາຊຽນອີກດ້ວຍ. ການເສີມ
ຂະຫຍາຍການຮ່ວມມືໃນດ້ານຕ່າງໆເຫຼົ່ານີ້ ກໍ່ເພື່ອເຮັດໃຫ້ອາຊຽນກາຍເປັນປະຊາຄົມ
ນາໆຊາດແຫ່ງຄວາມໝັ້ນຄົງໃຫ້ໄດ້ຕາມເປົ້າໝາຍທີ່ວາງໄວ້ພາຍໃນປີ 2015 ຊຶ່ງກໍ່ເຊັ່ນ
ດຽວກັນກັບການເປັນປະຊາຄົມເສດຖະກິດ ແລະສັງຄົມວັດທະນະທຳອັນນຶ່ງອັນດຽວກັນ
ດັ່ງທີ່ທ່ານທອງບັນ ໄດ້ຖະແຫຼງນັ້ນຢໍ້າວ່າ:
ທ່ານ ທອງບັນ ແສງອາພອນ, ລັດຖະມົນຕີ ກະຊວງປ້ອງກັນຄວາມສະຫງົບພາຍໃນລາວ
“ກອງປະຊຸມຫົວໜ້າຕຳຫຼວດອາຊຽນຄັ້ງທີ່ 31 ນີ້ມີ
ຄວາມໝາຍສໍາຄັນຍິ່ງສໍາລັບກໍາລັງຕໍາຫຼວດອາຊຽນ
ແລະປະເທດຄູ່ເຈລະຈາ, ເປົ້າໝາຍຕົ້ນຕໍກໍ່ແມ່ນເພື່ອ
ປະກອບສ່ວນເຂົ້າໃນການສ້າງປະຊາຄົມອາຊຽນທີ່
ປະກອບດ້ວຍ 3 ເສົາຄໍ້າຄື: ປະຊາຄົມການເມືອງ
ແລະຄວາມໝັ້ນຄົງ, ປະຊາຄົມເສດຖະກິດ ແລະ
ປະຊາຄົມວັດທະນະທໍາ-ສັງຄົມໃຫ້ບັນລຸຜົນສໍາເລັດ”.
ກອງປະຊຸມຫົວໜ້າຕໍາຫຼວດອາຊຽນ ແລະປະເທດຄູ່ເຈລະຈາຂອງອາຊຽນຄັ້ງທີ່ 31 ທີ່ລັດຖະບານລາວເປັນເຈົ້າພາບຈັດກອງປະຊຸມດັ່ງກ່າວນີ້ ມີຫົວໜ້າຕໍາຫຼວດຈາກ 10 ປະເທດ ສະມາຊິກອາຊຽນເຂົ້າຮ່ວມຢ່າງພ້ອມໜ້າ, ຊຶ່ງກໍ່ຄືຫົວໜ້າຕຳຫຼວດຈາກ ບຣູໄນ, ກໍາປູເຈຍ, ອິນໂດເນເຊຍ, ມຽນມາ, ຟີລິບປິນ, ສິງກະໂປ, ໄທ, ຫວຽດນາມ ແລະລາວ. ສ່ວນຫົວໜ້າຕໍາຫຼວດຈາກປະເທດຄູ່ເຈລະຈາຂອງອາຊຽນ ທີ່ເຂົ້າຮ່ວມໃນກອງປະຊຸມຄັ້ງນີ້ອີກດ້ວຍ ກໍ່ປະກອບມີ ສປ ຈີນ, ຍີ່ປຸ່ນ, ເກົາຫຼີໃຕ້, ອອສເຕຣເລຍ ແລະນິວຊີແລນ.
ກອງປະຊຸມດັ່ງກ່າວນີ້ຈັດຂຶ້ນເປັນປະຈໍາທຸກປີ ດ້ວຍການໝູນວຽນກັນເປັນປະເທດເຈົ້າພາບ
ໃນລະຫວ່າງປະເທດສະມາຊິກໃນກຸ່ມອາຊຽນດ້ວຍກັນ ພາຍໃຕ້ເປົ້າໝາຍເພື່ອເສີມສ້າງລະ
ບົບການປະສານງານທີ່ມີປະສິດທິພາບເຂົ້າໃນການປ້ອງກັນ ແລະປາບປາມອາຊະຍາກຳຂ້າມ ຊາດທີ່ເພີ່ມຫຼາຍຂຶ້ນຢ່າງຕໍ່ເນື່ອງ.
ລາວເປັນເຈົ້າພາບຈັດກອງປະຊຸມປາບປາມ ແລະຄວບຄຸມຢາເສບຕິດ ຂອງພາກພື້ນລຸ່ມແມ່ນໍ້າຂອງ ທີ່ຈັດຂຶ້ນໃນວັນທີ 24 ພຶດສະພາ, 2011 ທີ່ນະຄອນວຽງຈັນ
ທັງນີ້ໂດຍສະເພາະແມ່ນການຄ້າຢາເສບຕິດ, ການຄ້າມະນຸດຂ້າມຊາດ ແລະອາຊະຍາກໍາທາງເສດຖະກິດນັ້ນນັບເປັນບັນຫາທີ່ຂະຫຍາຍກວ້າງຫລາຍຂຶ້ນນັບມື້ ໂດຍອີງຕາມລາຍງານຂອງສໍາ ນັກງານຄວບຄຸມຢາເສບຕິດ ແລະອາຊະຍາກໍາແຫ່ງສະຫະປະຊາຊາດ (UNODC) ກໍ່ໄດ້ລະບຸວ່າຜົນປະໂຫຍດຂອງຂະບວນການອາຊະຍາກໍາຂ້າມຊາດໃນແຕ່ລະປີນັ້ນ ມີມູນຄ່າຫລາຍກວ່າ 200 ພັນລ້ານໂດລາ ເຊິ່ງໃນນີ້ເກີນກວ່າ 50% ເປັນຜົນປະໂຫຍດຂອງບັນດາກຸ່ມອາຊະຍາກໍາໃນເອເຊຍ.
ສໍາລັບໃນປະເທດລາວນັ້ນ ນອກຈາກຈະຕົກເປັນທາງຜ່ານຂອງການຂົນສົ່ງຢາເສບຕິດນັບ
ມື້ໜັບຫຼາຍຂຶ້ນແລ້ວ ກໍຍັງປະກົດວ່າມີເຍົາວະຊົນລາວຕ້ອງຕົກໄປເປັນເຍື່ອຂອງຂະບວນການ
ຄ້າມະນຸດດ້ວຍເຊັ່ນກັນ, ໂດຍທາງການລາວໄດ້ປະເມີນວ່າ ມີແຮງງານລາວຫຼາຍກ່ວາ 2
ແສນຄົນທີ່ໄດ້ພາກັນລັກລອບເຮັດວຽກໂດຍຜິດກົດໝາຍຢູ່ໃນໄທ, ຫາກແຕ່ວ່າເຄືອຂ່າຍອົງ
ການຊ່ວຍເຫຼືອແຮງງານຕ່າງດ້າວ ຈາກລາວ, ມຽນມາ ແລະກຳປູເຈຍໃນໄທ ກັບໄດ້ປະເມີນ
ວ່າມີແຮງງານລາວເກີນກວ່າ 4 ແສນຄົນ ທີ່ລັກລອບເຮັດວຽກຢູ່ໃນໄທໃນປະຈຸບັນນີ້ ແລະ
ຈຳນວນບໍ່ໜ້ອຍກໍ່ຕ້ອງຕົກເປັນເຫຍື່ອຂອງຂະບວນການຄ້າມະນຸດຂ້າມຊາດໃນໄທ, ໂດຍ
ສາເຫດທີ່ເຮັດໃຫ້ເກີດສະພາບການດັ່ງກ່າວນີ້ ກໍ່ຄືຄວາມຍາກຈົນນັ້ນເອງ.