ວີໂອເອ ສຳພາດທ່ານ ຄິມທອງ ແລະ ຍານາງ ນົງເຍົາ ສຳລັບລາຍການຊຸມຊົນຊາວລາວໃນທະວີບ ອາເມຣິກາ

ລາຍ​ການຊຸມຊົນລາວໃນທະວີບອາເມຣິກາຂອງວີ​ໂອ​ເອພາກພາສາລາວ ສຳລັບ ແລງວັນອາທິດມື້ນີ້ ພວກເຮົາມີການສຳພາດກັບທ່ານ ຄິມທອງ ຄຸນທະວິໄລ ແລະ ຍານາງ ນົງເຍົາ ພົມມະທາ, ຄູ່ຮັກຊາວລາວທີ່ອາໄສຢູ່ ພີແນລລາ ພາກ (Pinella Park), ເມືອງ ແທມປາ, ລັດ ຟລໍຣິດາ. ພວກເຮົາໄດ້ສຳພາດກັບທັງສອງຄົນ ກ່ຽວກັບ ການດຳລົງຊີວິດໃນລັດດັ່ງກ່າວ ແລະ ຮ້ານອາຫານຂອງເຂົາເຈົ້າ. ເຊີນທ່ານຟັງການສໍາພາດກັບ ພຸດທະສອນ ໃນອັນດັບຕໍ່ໄປ.

ຟັງລາຍງານ ວິໂອເອ ສຳພາດທ່ານ ຄິມທອງ ແລະ ຍານາງ ນົງເຍົາ ສຳລັບລາຍການຊຸມຊົນຊາວລາວໃນທະວີບ ອາເມຣິກາ

ຍາ​ນາງ ນົງ​ເຍົາ ແລະ ຄູ່​ໝັ້ນ​ທ່ານ ຄິມ​ທອງ ຄຸນ​ທະ​ວິ​ໄລ ເປັນລູກຂອງອົບພະຍົບລາວ. ຍານາງ ນົງເຍົາ ເກີດຢູ່ສູນອົບພະຍົບ ແລະ ທ່ານ ຄິມທອງ ເກີດຢູ່ວຽງຈັນ ແລ້ວກໍໄດ້ຍົກຍ້າຍຖິ່ນຖານ ແລະ ເຕີບໃຫຍ່ໃນ ສະຫະລັດ ເຊິ່ງລາວໄດ້ກ່າວຕໍ່ພວກເຮົາວ່າ.

ສຽງ 1 ການຍ້າຍມາຕັ້ງຖິ່ນຖານໃນ ສະຫະລັດ.

ທຳອິດຄອບຄົວຂອງຍານາງ ນົງເຍົາ ໄດ້ມາຕົກຢູ່ເມືອງ ໂມເດັສໂຕ ລັດຄາລິຟໍເນຍ ແລະ ຄອບຄົວຂອງທ່ານ ຄິມທອງ ແມ່ນຢູ່ນະຄອນຫຼວງວໍຊິງຕັນ.

ສຽງ 2 ການຍ້າຍໄປອາໄສຢູ່ລັດ ຟລໍຣິດາ

ເມືອງ​ແທ​ມ​ປາ, ລັດ​ຟ​ລໍ​ຣິ​ດາ ແມ່ນ​ຕັ້ງຢູ່​ທາງ​ພາກ​ໃຕ້​ຂອງ ສະ​ຫະ​ລັດ. ເມືອງ​ດັ່ງ​ກ່າວ​ມີທັງ​ສະ​ຖາ​ປັດ​ຕະ​ຍາ​ກຳ​ໃນ​ປະ​ຫວັດສາດ ແລະ ຍຸກ​ໃໝ່, ມີ​ວັດ​ທະ​ນະ​ທຳ​ຂອງ​ຊາວ​ຄິວ​ບາ ແລະ ຄົນ​ທີ່​ປາກ​ພາ​ສາ ສ​ເປນ ແຊກ​ຊຶມ​ໄປ​ທົ່ວ, ເປັນ​ເມືອງ​ທີ່​ມີ​ທຸ​ລະ​ກິດຫຼາຍ​ຮູບ​ແບບ ແລະ ມີ​ເສັ້ນ​ທາງ​ນ້ຳ​ທີ່​ສວຍ​ງາມ.

ລົດອາຫານ Thai 5.

ໃນ​ຕົວ​ເມືອງແທມ​ປາ ແມ່​ນ​ມີ​ຊີ​ວິດ​ຊີ​ວາ​ໄປ​ດ້ວຍ​ຖະ​ໜົນ​ຫົນ​ທາງ​ທີ່​ສວຍ​ງາມ, ມີ​ຮ້ານ​ກິນ​ດື່ມ ແລະ ສະ​ຖານ​ທີ່​ບັນ​ເທີງ​ໃຫ້​ພັກ​ຜ່ອນ​ຢ່ອນ​ໃຈ​ຢ່າງຫຼວງຫຼາຍ. ນອກ​ຈາກ​ນັ້ນ​ເມືອງ​ດັ່ງ​ກ່າວ​ຢູ່​ໃກ້​ກັບ​ຫາດ​ຊາຍ​ທະ​ເລ​ອີກ​ດ້ວຍ.

ສຽງ 3 ຄົນລາວ ແລະ ປະຊາຊົນທີ່ອາໄສຢູ່ເມືອງ ແທມປາ

ເມືອງແທມປາ ເປັນເມືອງທີ່ມີິເກືອບໝົດທຸກຢ່າງ, ສຳລັບຂອງກິນລາວນັ້ນແມ່ນສາມາດຊື້ໄດ້ຢູ່ຕາມຮ້ານຊຸບເປີມາເກັດ, ເຊິ່ງຍານາງ ນົງເຍົາ ເວົ້າວ່າມີທັງຮ້ານຊຸບເປີມາເກັນທີ່ຄົນລາວເປັນເຈົ້າຂອງ, ນອກນັ້ນກໍມີຮ້ານຊຸບເປີມາເກັດເອເຊຍອື່ນໆທີ່ສາມາດຊອກຊື້ເຄື່ອງກິນມາແຕ່ງກິນໄດ້ສະບາຍ.

ທ່ານ ຄິມທອງ ກຳລັງຕຽມເຮັດອາຫານ.

ສຳລັບສະພາບຄວາມປອດໄພໃນເມືອງດັ່ງກ່າວນັ້ນແມ່ນມີທັງເຂດທີ່ປອດໄພ ແລະ ບໍ່ປອດໄພ. ປະຊາຊົນມີນິໄສຫຼາຍປະເພດ ເຊິ່ງພວກເຮົາຕ້ອງໄດ້ລະວັງຕົນເອງເວລາໄປໃສມາໃສ.

ທ່ານ ຄິມທອງ ແລະ ຍານາງ ນົງເຍົາ ເປັນນັກສູ້ຊີວິດ, ທັງສອງຄົນໄດ້ຮ່ວມກັນທຳມາຫາກິນ ດ້ວຍການເປີດຮ້ານອາຫານນຳກັນ. ແຕ່ການເປີດຮ້ານອາຫານນັ້ນ, ຍານາງ ນົງເຍົາ ເວົ້າວ່າມັນເປັນຄວາມມັກຮັກຂອງທ່ານ ຄິມທອງ, ເຊິ່ງລາວໄດ້ມີຄວາມຜູກພັນກັບການເຮັດອາຫານມາຕັ້ງແຕ່ຍັງນ້ອຍ.

ສຽງ 4 ການເລີ່ມຕົ້ນທຸລະກິດຮ້ານອາຫານ

ທ່ານ ຄິມທອງ ແລະ ຍານາງ ນົງເຍົາ ເຮັດທຸລະກິດແບບຄ່ອຍເປັນຄ່ອຍໄປ, ຄ່ອຍໆລົງທຶນໃນການພັດທະນາຮ້ານອາຫານຂອງເຂົາເຈົ້າຈາກການໄດ້ກຳໄລເທື່ອລະເລັກລະນ້ອຍ, ເຂົາເຈົ້າບໍ່ໄດ້ກູ້ຢືມເງິນຈາກທະນາຄານ. ການເຮັດທຸລະກິດແບບນີ້ຖືວ່າຂ້ອນຂ້າງປອດໄພຕໍ່ຕົນເອງ ເພາະວ່າບໍ່ສ່ຽງເປັນໜີ້ສູງເວລາທີ່ທຸລະກິດມີບັນຫາ.

ປັດຈຸບັນນີ້ທັງສອງຄົນມີຮ້ານອາຫານສອງແຫ່ງ, ແຫ່ງທຳອິດແມ່ນຢູ່ເມືອງ ພີແນລລາສ ພາກ ແລະ ອີກແຫ່ງນຶ່ງຢູ່ເມືອງ ລາໂກ ລັດຟລໍຣິດາ, ນອກຈາກນັ້ນເຂົາເຈົ້າກໍມີລົດອາຫານ.

ອາຫານຢູ່ຮ້ານ Thai 5.

ສຽງ 5 ຮ້ານອາຫານ

ຢູ່ໃນໜ້າເຟສບຸກຂອງຍານາງ ນົງເຍົາ, ລາວມັກຈະເອົາຮູບອາຫານທີ່ເປັນຕາແຊບຈາກຮ້ານຂອງລາວເອົາລົງໃຫ້ຄົນເບິ່ງ. ເວລາທີ່ເຫັນແລ້ວມັນຈະເຮັດໃຫ້ທ່ານຢາກໄປກິນຢ່າງແນ່ນອນ ແລະ ເມື່ອບໍ່ດົນມານີ້ ຍານາງ ນົງເຍົາ ກໍໄດ້ເອົາວິດີໂອ ການເຮັດເສັ້ນເຂົ້າປຽນທີ່ສົ່ງຂາຍໃຫ້ລູກຄ້າສົດໆຮ້ອນໆ. ການເຮັດເຂົ້າປຽນຂອງລາວນັ້ນແມ່ນເຮັດດ້ວຍມືລ້ວນໆບໍ່ມີເຄື່ອງຈັກ, ການນວດແປ້ງແມ່ນທ່ານ ຄິມທອງ ເປັນຜູ້ນວດ ພ້ອມກັບຕັດເສັ້ນເຂົ້າໃສ່ກ່ອງ.

ບັນຍາກາດພາຍໃນຮ້ານອາຫານ Thai 5.

ຢູ່ຮ້ານໃໝ່ຂອງທ່ານ ຄິມທອງ ມີສະຖານທີ່ກວ້າງຂວາງ, ສາມາດຮັບຮັບແຂກໄດ້ຫຼາຍກວ່າ 200 ບ່ອນນັ່ງ. ຮ້ານຂອງລາວຍັງມີບ່ອນເສບດົນຕີສົດ, ເຊິ່ງກໍແມ່ນວົງດົນຕີຂອງຄົນລາວທີ່ໄດ້ຈ້າງມາເສບໃຫ້. ແລະ ພິເສດຫຼາຍແມ່ນຮ້ານຂອງລາວຮັບຈັດງານລ້ຽງວັນເກີດຕ່າງໆໂດຍບໍ່ເສຍຄ່າຈອງພື້ນທີ່ ເຊິ່ງລາວໄດ້ກ່າວຕໍ່ພວກເຮົາຟັງວ່າ

ສຽງ 6 ການຈັດງານລ້ຽງຕ່າງໆຢູ່ໃນຮ້ານອາຫານ

ທ່ານ ຄິມທອງ ແລະ ຍານາງ ນົງເຍົາ ເວົ້າວ່າໃນອະນາຄົດຢາກຈະພັກຜ່ອນໄປທ່ຽວຢູ່ເມືອງລາວ, ເພາະວ່າໄດ້ເຮັດວຽກຢູ່ຮ້ານອາຫານຢ່າງບໍ່ຢຸດບໍ່ເຊົາ, ບາງມື້ກໍໄດ້ນອນພຽງສອງຊົ່ວໂມງ, ພ້ອມກັນນັ້ນທັງສອງຄົນກໍຍັງບໍ່ເຄີຍກັບເມືອຢາມປະເທດລາວຈັກເທື່ອ. ພວກເຮົາຫວັງວ່າທັງສອງຄົນຈະໄດ້ເມືອຢາມລາວໃນໄວໆນີ້ ແລະ ມ່ວນຊື່ນກັບການທ່ອງທ່ຽວໃຫ້ເຕັມອີ່ມ.

ທີ່ທ່ານໄດ້ຟັງໄປນັ້ນ ແມ່ນການສຳພາດ ກັບທ່ານ ຄິມທອງ ຄຸນທະວິໄລ ແລະ ຍານາງ ນົງເຍົາ ພົມມະທາ, ຄົນລາວອາເມຣິກັນ ທີ່ປະກອບທຸລະກິດຮ້ານອາຫານ Thai 5 Fast Food ໃນເມືອງ ແທມປາ ລັດ ຟລໍຣິດາ. ເຊີນທ່ານຕິດຕາມການສຳພາດເລື່ອງໃໝ່ ຂອງພວກເຮົາໄດ້ອີກ ໃນລາຍການຊຸມຊົນຊາວລາວ ໃນອາເມຣິກາ ເວລາດຽວກັນນີ້.