ທ່ານຜູ້ຟັງທີ່ເຄົາລົບ ລາຍການຊີວິດຊາວລາວ ແລງວັນພະຫັດ
ມື້ນີ້ ເຮົາຈະນຳພາທ່ານ ໄປຢ້ຽມຢາມຖາມຂ່າວ ທ່ານສຸວັນທອນ
ແລະຍານາງ ນີລາວັນ ຄຳມີສຸກ ທີ່ໄດ້ເຂົ້າໄປຕັ້ງຖິ່ນຖານຢູ່ ນະ
ຄອນ Grenobe ທາງພາກຕາເວັນອອກສຽງໃຕ້ຂອງ ປະເທດ
ຝ່ັຣງ ແຕ່ປີ 1979. ທ່ານສຸວັນທອນ ເປັນພະນັກງານ ບໍລິສັດ
ຜະລິດເຄຶ່ອງ electronic ແລະຍານາງ ນີລາວັນ ເປັນນາງພະ
ຍາບານ ທີ່ເຮືອນພັກຜູ້ເຖົ້າ. ທ່ານທັງສອງ ໄດ້ເລົ່າເລື້ອງຄວາມ
ເປັນມາຂອງຊີວິດ ແລະການເປັນຢູ່ໃນເມືອງ Grenobe ສູ່
ວີໂອເອ ຟັງ ຊຶ່ງ ກິ່ງສະຫວັນ ຈະນຳມາສະເໜີທ່ານ.
Your browser doesn’t support HTML5
ຟັງການສຳພາດ ທ່ານສຸວັນທອນ ແລະຍານາງ ນີລາວັນ ຄຳມີສຸກ
ສະບາຍດີ ທ່ານຜູ້ຟັງທີ່ເຄົາລົບ ລາຍການຊີວິດຊາວລາວ ມືນີ້ ຂ້າພະເຈົ້າ ຂໍແນະນຳໃຫ້
ທ່ານຮູ້ຈັກກັບ ທ່ານສຸວັນທອນ ແລະຍານາງນີລາວັນ ຄຳມີສຸກ ລູກບ້ານຫລານເມືອງທ່າ
ແຂກ ແຂວງຄຳມ່ວນ ທີ່ໄດ້ເຂົ້າໄປຕັ້ງຖິ່ນຖານຢູ່ ນະຄອນ Grenobe ທາງພາກຕາເວັນ
ອອກ ສຽງໃຕ້ຂອງ ປະເທດຝຣັ່ງ. ຄອບຄົວຄຳມີສຸກ ໄດ້ໄປຕັ້ງຖິ່ນຖານຢູ່ເມືອງນີ້ ຕັ້ງແຕ່
ປີ 1979.
ເມືອງ Grenobe ປະເທດຝຣັ່ງ
ແຕ່ກ່ອນອຶ່ນຂ້າພະເຈົ້າ ຂໍພາທ່ານໄດ້ຊົມ ແລະຮູ້ຈັກພູມລຳເນົາ ແລະບັນຍາກາດ ຂອງຂົງເຂດເມືອງ Grenobe ນີ້ວ່າມີ ຄວາມສຳຄັນ ແລະເປັນມາຢ່າງໃດ. Grenobe ຕັ້ງຢູ່ພາກຕາເວັນອອກສຽງໃຕ້
ຂອງປະເທດຝຣັ່ງ ແລະຕັ້ງຢູ່ຕີນພູ Alps
ບ່ອນທີ່ແມ່ນໍ້າ Drac ເຊື່ອມຕໍ່ກັບແມ່ນໍ້າ Isere ທີ່ີຮູ້ກັນວ່າຂົງເຂດ Rhone ອ້ອມລ້ອມໄປດ້ວຍພູ. ເພາະສະນັ້ນຂົງເຂດນີ້ ຈຶ່ງມີຫິມະຕົກ
ຫລາຍໃນລະດູໜາວ ແລະເຄີຍໄດ້ເປັນເຈົ້າພາບ ກິລາໂອລິມປິກ ລະດູໜາວ ມາແລ້ວໃນປີ 1968.
ທ່ານສຸວັນທອນ (ເສື້ອສີຟ້າຂວາສຸດ) ຮ່ວມຂະບວນ ບຸນວັດທະນາທຳນາໆຊາດ
ນະຄອນ Grenobe ເປັນເມືອງງົດງາມເມືອງນຶ່ງ ມີປະວັດອັນ
ຍາວນານທີ່ໜ້າສົນໃຈມາໄດ້ 2,000 ປີແລ້ວ ຊຶ່ງເວລານັ້ນຍັງ
ເປັນໝູ່ບ້ານນ້ອຍໆຂອງຊາວ Gallic ແລະເປັນປ້ອມຍາມເຂດ
ຊາຍແດນຂອງຝຣັ່ງ. ຕະຫລອດປະວັດສາດອັນຍາວນານນັ້ນ
ນະຄອນ Grenobe ໄດ້ກາຍມາເປັນເມືອງທີ່ທັນສະໄໝຂອງ
ຝຣັ່ງ ໃນສັດຕະຫວັດທີ່ 21. ປັດຈຸບັນນີ້ Grenobe ເປັນເມືອງ
ທີ່ອຸດົມສົມບຸນໄປດ້ວຍ ເຂື່ອນໄຟຟ້າ ໂຮງງານຜະລິດເຄື່ອງອີ
ເລັກໂຕຣນິກ ເຄື່ອງຈັກຕ່າງໆ ເຄມີ ພລາສຕິກ ໂຮງງານຜະລິດ
ອາຫານ ແລະສິ່ງສຳຄັນທີ່ສຸດນັ້ນກໍຄືເປັນສູນກາງຄົ້ນຄວ້າດ້ານ
ວິທະຍາສາດ. ປັດຈຸບັນນີ້ ປະຊາກອນໃນເຂດເມືອງ Grenobe
ມີຢູ່ປະມານ 664,800ຄົນ ຮ່ວມທັງປະຊາກອນລາວ-ຝຣັ່ງ ປະມານ 800 ຄົນ ທີ່ພາກັນປະກອບອາຊີບ ຢູ່ຕາມໂຮງງານອຸດສາຫະກຳດ້ານ ເທັກໂນໂລຈີ ອັນສຳຄັນ ແລະນອກນັ້ນຍັງປະກອບວິຊາອາຊີບອຶ່ນໆ.
ທ່ານສຸວັນທອນ ຄຳມີສຸກ ແມ່ນລູກບ້ານຫລານເມືອງທ່າແຂກ ແຂວງຄຳມ່ວນ ປະເທດ
ລາວ ທ່ານສຳເລັດການສຶກສາຝ່າຍບັນຊີ ທີ່ໂຮງຮຽນການຊ່າງ ປາກປາສັກ ນະຄອນ
ຫລວງວຽງຈັນ. ຫລັງຈາກນັ້ນທ່ານໄດ້ເຂົ້າຮັບໃຊ້ເປັນລັດຖະກອນຝ່າຍສະມຸດບັນຊີ ທີ່
ກົມໄຟຟ້າລາວ. ໃນປີ 1976 ໃນຂະນະທີ່ມີການປ່ຽນແປງລະບອບການປົກຄອງໃໝ່ຢູ່
ເມືອງລາວນັ້ນ ທ່ານຄຳມີສຸກ ພ້ອມດ້ວຍພັນລະຍາ ຍານາງນີລາວັນ ແລະລູກນ້ອຍນຶ່ງ
ຄົນ ແລະ ບັນດາພໍ່ແມ່ພີ່ນ້ອງປະຊາຊົນລາວ ໄດ້ອົບພະຍົບຂ້າມໄປຢູ່ສູນອົບພະຍົບ
ປະເທດໄທ ເພື່ອລໍຖ້າການໄປຕັ້ງຖິ່ນຖານໃໝ່ຢູ່ປະເທດທີ່ສາມ. ຕົກມາເຖິງປີ 1979
ຄອບຄົວທ່ານຄຳມີສຸກ ໄດ້ຖືກຮັບເຂົ້າໄປຕັ້ງຖິ່ນຖານຢູ່ປະເທດຝຣັ່ງ ແລະກໍໄດ້ມາຕັ້ງ
ຫລັກແຫລ່ງຢູ່ນະຄອນ Grenobe ຕັ້ງແຕ່ນັ້ນເປັນຕົ້ນມາ. ການຕັ້ງຕົ້ນຊີວິດໃໝ່ບໍ່ເປັນ
ທີ່ງ່າຍດາຍແກ່ ບັນດາຊາວອົບພະຍົບທີ່ເດີນທາງໄປຮອດໃໝ່ຢູ່ໃນເວລານັ້ນ. ທຸກຄົນ
ຕ້ອງໄດ້ປັບໂຕໃຫ້ເຂົ້າກັບ ດິນຟ້າອາກາດ ອາຫານການກິນ ພາສາ ແລະວັດທະນາທຳ.
ເວລານີ້ ທ່ານສຸວັນທອນ ຖືສັນຊາດຝຣັ່ງ ທ່ານໄດ້ເລົ່າຊີວິດເບື້ອງຫລັງຂອງຄວາມເປັນ
ມາ ແລະຊີວິດການເປັນຢູ່ໃນເມືອງ Grenobe ສູ່ ວີໂອເອ ວ່າ :
ທ່ານ ສຸວັນທອນ ຄຳມີສຸກ ຢູ່ຫ້ອງການ
Your browser doesn’t support HTML5
ຟັງການສຳພາດ ທ່ານ ສຸວັນທອນ ຄຳມີສຸກ
ຍານາງ ນີລະວັນ ພັນລະຍາ ຂອງທ່ານ ສຸວັນທອນ ແມ່ນສະຕີລາວ-ຝຣັ່ງ ຄົນນຶ່ງ ທີ່ໄດ້ທຳຄວາມກ້າວໜ້າໃນການປະກອບວິຊາອາຊີບ ຕັ້ງແຕ່ໄດ້ເຂົ້າໄປຕັ້ງຖິ່ນຖານຢູ່ເມືອງ Grenobe ຍານາງ ໄດ້ໂອ້ລົມກ່ຽວກັບໜ້າທີວຽກການສູ່ ວີໂອເອ ດັ່ງນີ້ :
ຍານາງ ນີລາວັນ (ຊຸດສີແດງຢູ່ກາງ) ຮ່ວມຂະບວນ ບຸນນາໆຊາດ
Your browser doesn’t support HTML5
ຟັງການສຳພາດ ຍານາງ ນີລາວັນ ຄຳມີສຸກ
ເປັນທີ່ຮູ້ກັນດີວ່າ ປະຊາກອນຝຣັ່ງ ຮູ້ຈັກການໃຊ້ວິດໃຫ້ມີຄວາມລາບລື້ນ ມ່ວນຊື່ນ ກິນດີ ຢູ່ດີ ໂດຍສະເພາະຢ່າງຍິງ ຮູ້ຈັກພັກຜ່ອນປະຈຳປີ ໂດຍມີສິດລາພັກຮ້ອນໄດ້ເຖິງ 3 ເດືອນຕາມກົດໝາຍຂອງຝຣັ່ງ. ທ່ານສຸວັນທອນ ແລະຍານາງ ນິລະວັນ ມັກຈະເດີນທາງກັບຄືນ
ເມື່ອຢ້ຽມຢາມຍາດຕິພີ່ນ້ອງ ທີ່ ປະເທດລາວ ເກືອບທຸກໆປີ ທ່ານສຸວັນທອນ ໄດ້ກ່າວເຖິງຄວາມຄິດຮອດຄິດເຖິງ ພີ່ນ້ອງລາວ ແລະອາຫານລາວ ທີ່ທ່ານລືມບໍ່ໄດ້ນັ້ນວ່າ :
ບໍລິສັດ HT Microelectronic Semi Conductor ບ່ອນທີ່ ທ່ານ ສຸວັນທອນ ເຮັດວຽກ
Your browser doesn’t support HTML5
ຟັງການສຳພາດ ທ່ານ ສຸວັນທອນ ຄຳມີສຸກ
ໃນຂະນະທີ່ ຂ້າພະເຈົ້າ ກຳລັງລາຍງານຂ່າວຂອງ ທ່ານສຸວັນທອນ ແລະຍານາງ ນີລະວັນ
ຢູ່ນີ້ິ ທັງສອງທ່ານກຳລັງຢູ່ໃນເຮືອບິນ ເດີນທາງມາສູ່ ນະຄອນຫລວງວຽງຈັນ ເພື່ອໄປຢ້ຽມ
ຢາມ ຍາດຕິພີ່ນ້ອງເພື່ອນຝູງ ເປັນເວລານຶ່ງເດືອນ. ວີໂອເອ ຂໍໃຫ້ທ່ານເດີນທາງດ້ວຍ
ຄວາມສະວັດດີພາບ ແລະໄດ້ຮັບຄວາມມ່ວນຊື່ນ.
ໂປດຕິດຕາມຟັງ ການສຳພາດກັບ ລາຍການຊີວິດຊາວລາວ ໃນເລື້ອງໃໝ່ ໃນແລງວັນ
ພະຫັດໜ້າ.