ວີໂອເອສຳພາດ ທ່ານ ແກ້ວ ສີຈັນທະວົງ ໃນລາຍການຊຸມຊົນຊາວລາວ ໃນທະວີບອາເມຣິກາ

ລາຍ​ການຊຸມຊົນລາວໃນທະວີບອາເມຣິກາຂອງວີ​ໂອ​ເອພາກພາສາລາວ ສຳລັບແລງວັນອາທິດມື້ນີ້ ພວກເຮົາມີການສຳພາດກັບທ່ານ ແກ້ວ ສີຈັນທະວົງ, ອົບພະຍົບລາວ ທີ່ໄດ້ຍ້າຍມາຕັ້ງຖິ່ນໃນ ສະຫະລັດ ຕັ້ງແຕ່ຍັງນ້ອຍ. ທ່ານ ແກ້ວ ແມ່ນຄູສອນມວຍໄທ, ແລະ ປັດຈຸບັນນີ້ ມີນັກຮຽກຈຳນວນຫຼວງຫຼາຍມາຝຶກຊ້ອມຢູ່ຄ້າຍຂອງລາວ. ເຊີນທ່ານຟັງການສໍາພາດກັບ ພຸດທະສອນ ໃນອັນດັບຕໍ່ໄປ.

ວີໂອເອສຳພາດ ທ່ານ ແກ້ວ ສີຈັນທະວົງ ໃນລາຍການຊຸມຊົນຊາວລາວ ໃນທະວີບອາເມຣິກາ

ຄົນລາວທີ່ຍົກຍ້າຍຖິ່ນຖານມາຢູ່ ສະຫະລັດ ມີອາຊີບທຳມາຫາກິນຫຼາຍປະເພດ, ສ່ວນຫຼາຍທີ່ເຮົາມັກໄດ້ຍິນຈະເປັນຄົນປາດຊີ້ນຢູ່ບໍລິສັດ, ເປັນຂ້າລັດຖະການ, ຊ່າງແປງລົດ, ແລະ ຮ້ານອາຫານ. ສຳລັບທ່ານ ແກ້ວ, ທ່ານເຄີຍເຮັດວຽກຢູ່ກາຊີໂນ, ເປັນນັກມວຍອາຊີບ ແລະ ປັດຈຸບັນນີ້ເປັນຄູສອນມວຍຢູ່ຄ້າຍຂອງລາວເອງໃນເມືອງ ເຟຣສໂນ, ລັດ ຄາລິຟໍເນຍ. ແຕ່ກ່ອນທີ່ເຮົາຈະເວົ້າ ກ່ຽວກັບ ອາຊີບນັກມວຍຂອງລາວນັ້ນ, ເຮົາຈະໄປຮູ້ຈັກ ກ່ຽວກັບ ຊີວິດສ່ວນຕົວຂອງລາວກ່ອນ.

ສຽງ 1 ການຍ້າຍມາຕັ້ງຖິ່ນຖານໃນ ສະຫະລັດ.mp3

ທ່ານ ແກ້ວ ແລະ ຄອບຄົວຢູ່ວັດລາວ.

ຄົນຈຳນວນຫຼາຍທີ່ອາໄສຢູ່ໃນ ສະຫະລັດ ມັກຈະຍ້າຍບ່ອນຢູ່ໄປຫຼາຍລັດ, ບາງຄົນແມ່ນໄດ້ຍ້າຍຍ້ອນວຽກງານຂອງເຂົາເຈົ້າ, ຄົນໄວໜຸ່ມກໍຍ້າຍໄປຢູ່ສະຖານທີ່ຕາມມະຫາວິທະຍາໄລຂອງເຂົາເຈົ້າ ແລະ ຜູ້ທີ່ອອກບຳນານແລ້ວກໍມັກຍ້າຍໄປຢູ່ໃນສະຖານທີ່ໆມີສະພາບອາກາດດີ ຫຼື ຢູ່ແຄມທະເລ. ທ່ານ ແກ້ວ ກໍເຊັ່ນກັນໄດ້ຍ້າຍໄປຢູ່ຫຼາຍບ່ອນ ເຊິ່ງລາວໄດ້ກ່າວວ່າ:

ສຽງ 2 ການຍ້າຍທີ່ຢຸ່ອາໄສໃນ ສະຫະລັດ.mp3

ຢູ່ເມືອງ ເຟຣສໂນ ຄົນລາວສ່ວນຫຼາຍທີ່ອາໄສຢູ່ທີ່ນັ້ນມີອາຊີບປູກຝັງ, ເປັນເຂດທີ່ມີຄົນລາວອາໄສຢູ່ຫຼາຍ. ມີສະມາຄົມລາວຫຼາຍສະມາຄົມ ແລະ ກໍມີວັດຫຼາຍແຫ່ງ.

ສຽງ 3 ຊຸມຊົນລາວ ໃນເມືອງ ເຟຣສໂນ.mp3

ທ່ານ ແກ້ວ ໃສ່ເຂັມຂັດແຊັ້ມ ສະໄໝເປັນນັກມວຍ.

ຢູ່ ສະຫະລັດ ມີອາຊີບວຽກງານໃຫ້ເຮັດຫຼາຍຢ່າງ, ສຳລັບຄ່າຈ້າງ ແລະ ເງິນ ເດືອນຕ່າງໆນັ້ນກໍມີຫຼາຍລະດັບ, ເຊິ່ງບາງບ່ອນຄ່າຈ້າງຂັ້ນຕໍ່າແມ່ນ 15 ໂດລາຕໍ່ນຶ່ງຊົ່ວໂມງ. ທ່ານ ແກ້ວ ກໍເຄີຍເຮັດວຽກໃຫ້ບໍລິສັດມາກ່ອນ, ເປັນສະຖານທີ່ການພະນັນ ຫຼື ກາຊີໂນ. ທ່ານເຮັດວຽກຢູ່ທີ່ນັ້ນໄດ້ໄລຍະໃດນຶ່ງ ຫຼັງຈາກນັ້ນກໍໄດ້ປ່ຽນມາເອົາຈິງເອົາຈັງກັບອາຊີບມວຍ.

ສຽງ 4 ວຽກງານຂອງທ່ານ ແກ້ວ.mp3

ທ່ານ ແກ້ວ ໄດ້ເລີ່ມຕີມວຍຕັ້ງແຕ່ຕອນຍັງນ້ອຍ. ທ່ານເຄີຍຕີມວຍອາຊີບ ແລະ ເຄີຍໄດ້ເປັນແຊັ້ມເຂັມຂັດສອງເສັ້ນ ເຊິ່ງທ່ານໄດ້ກ່າວວ່າ

ສຽງ 5 ອາຊີບນັກມວຍ.mp3

ທ່ານ ແກ້ວ ເປັນອ້າຍລ້ຽງໃນນັກມວຍໃນລະຫວ່າງການແຂ່ງຂັນ.

ປັດຈຸບັນນີ້ທ່ານ ແກ້ວ ໄດ້ຫັນມາເປັນຄູສອນມວຍ ນັບຕັ້ງແຕ່ຂາຫັກເວລາທີ່ລາວໄປເຕະບານ. ທ່ານມີຄ້າຍມວຍເປັນຂອງຕົນເອງ ແລະ ມີລູກສິດຈຳນວນຫຼວງຫຼາຍ.

ສຽງ 6 ຄ້າຍມວຍ.mp3

ຄົນຕ່າງປະເທດມັກມວຍໄທ ຫຼື Kickboxing ຫຼາຍ, ກິລາດັ່ງກ່າວແມ່ນໄດ້ແຜ່ອອກໄປທົ່ວໂລກ. ເຂົາເຈົ້າມັກຮຽນເພື່ອການອອກກຳລັງກາຍ ແລະ ບາງຄົນກໍໄດ້ຊ້ອມເປັນອາຊີບ. ລູກສິດຂອງທ່ານ ແກ້ວ ສ່ວນຫຼາຍກໍແມ່ນຄົນຕ່າງປະເທດ ເຊິ່ງທ່ານໄດ້ກ່າວວ່າ

ລູກສິດຢູ່ຄ້າຍມວຍຂອງທ່ານ ແກ້ວ.

ສຽງ 7 ລູກສິດ.mp3

ໃນອີກບໍ່ເທົ່າໃດອາທິດລູກສິດຂອງທ່ານ ແກ້ວກໍຈະຂຶ້ນເວທີແຂ່ງຂັນໃນລະດັບລັດ. ທຸກຄັ້ງທີ່ລູກສິດຂຶ້ນຊົກ ທ່ານ ແກ້ວ ກໍຈະໄປຮ່ວມ ແລະ ເປັນອ້າຍລ້ຽງໃຫ້ເຂົາເຈົ້າ. ພວກເຮົາຫວັງວ່າ ເຂົາເຈົ້າຈະພົບກັບໄຊຊະນະ ແລະ ຫວັງວ່າທ່ານ ແກ້ວ ຈະປະສົບຄວາມສຳເລັດຕື່ມອີກໃນອະນາຄົດຂ້າງໜ້າ.