ສະພາຮ່ວມມືຂອງບັນດາປະເທດອາຣັບ ໄດ້ງົດຄວາມພະຍາຍາມຂອງຕົນໃນການໄກ່
ເກ່ຍບັນຫາທີ່ປະເທດ ຫລັງຈາກປະທານາທິບໍດີ Ali Abdullah Saleh ແຫ່ງເຢເມນ
ບໍ່ຍອມລົງນາມໃນຂໍ້ຕົກລົງມອບໂອນອໍານາດສໍາລັບໃຫ້ທ່ານລາອອກຈາກຕໍາແໜ່ງ
ໄປນັ້ນ.
ສະພາຮ່ວມມືຂອງພວກປະເທດໃນເຂດອ່າວເປີເຊຍ ໄດ້ຕັດສິນໃຈໂຈະຄວາມພະຍາ
ຍາມຂອງຕົນໃນວັນອາທິດວານນີ້ ຫລັງຈາກທ່ານຊາເລ ປ່ຽນໃຈກ່ຽວກັບຂໍ້ຕົກລົງ
ດັ່ງກ່າວ ນຶ່ງມື້ຫລັງຈາກພວກຝ່າຍຄ້ານໃນເຢເມນ ໄດ້ລົງນາມໃນຂໍ້ຕົກລົງສະບັບນັ້ນ
ດ້ວຍຄວາມເຂົ້າໃຈວ່າ ປະທານາທິບໍດີຊາເລຈະລົງນາມໃນຂໍ້ຕົກລົງດັ່ງກ່າວ ໃນວັນ
ອາທິດວານນີ້. ບັນວ່າເປັນຄັ້ງທີ 3 ແລ້ວທີ່ຜູ້ນໍາເຢເມນບໍ່ຍອມລົງນາມໃນຂໍ້ຕົກລົງດັ່ງ
ກ່າວ.
ຂໍ້ຕົກລົງທີ່ວ່ານີ້ສະເໜີທີ່ຈະບໍ່ເອົາໂທດກັບທ່ານຊາເລ ຄືບໍ່ດໍາເນີນຄະດີ ທ່ານ ຖ້າຫາກທ່ານໂອນອໍານາດໃຫ້ຜູ້ຮອງຂອງທ່ານພາຍໃນ 30 ມື້ຫລັງຈາກລົງນາມໃນຂໍ້ຕົກລົງແລ້ວ.
ທ່ານນາງຮີນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດກ່າວວ່າ ທ່ານນາງມີຄວາມຜິດຫວັງຢ່າງເລິກເຊິ່ງທີ່ທ່ານຊາເລ ບໍ່ຍອມລົງນາມໃນຂໍ້ຕົກລົງດັ່ງກ່າວ. ໃນຖະແຫລງການແລງວັນອາທິດວານນີ້ ທ່ານນາງຄລິນຕັນຍັງໄດ້ເວົ້າອີກວ່າ ທ່ານຊາເລກໍາລັງຫັນຫລັງໃຫ້ຄໍາໝັ້ນສັນຍາຂອງຕົນ ແລະບໍ່ເອົາຫົວຊານໍາຄວາມມຸ້ງມາດປາດຖະຫນາ ຂອງປະຊາຊົນເຢເມນ.
ກ່ອນໜ້ານີ້ ບັນດາເອກອັກຄະລັດຖະທູດຈາກຢູໂຣບ ສະຫະລັດແລະພວກປະເທດອາຣັບ ທີ່
ໄປລໍຖ້າເບິ່ງການເຊັນຂໍ້ຕົກລົງນັ້ນ ໄດ້ຖືກກັກໄວ້ເປັນເວລາຫລາຍຊົ່ວໂມງໃນສະຖານທູດ
ແຫ່ງນຶ່ງໃນນະຄອນຫລວງ ຊານາ ທີ່ຖືກປິດລ້ອມໂດຍພວກສະໜັບສະໜຸນລັດຖະບານທີ່
ປະກອບອາວຸດ.
ໃນເວລາຕໍ່ມາ ພວກເຮືອບິນເຮລີຄອບເຕີຂອງເຢເມນໄດ້ລໍາລຽງພວກນັກການທູດດັ່ງກ່າວ
ອອກໄປຈາກສະຖານທູດແຫ່ງນັ້ນ.
ທ່ານນາງຄລິນຕັນກ່າວວ່າ ສະຫະລັດມີຄວາມໂກດແຄ້ນນໍາເຫດການດັ່ງກ່າວ ແລະຮຽກ
ຮ້ອງໃຫ້ທ່ານຊາເລ ປະຕິບັດຕາມພັນທະຂອງທ່ານເພື່ອປົກປ້ອງພວກນັກການທູດຕ່າງປະ
ເທດພ້ອມດ້ວຍພວກພະນັກງານຂອງເຂົາເຈົ້າທີ່ເຮັດວຽກຢູ່ໃນເຢເມນນັ້ນ.
ໃນວັນອາທິດວານນີ້ ພວກປະທ້ວງຕໍ່ຕ້ານທ່ານຊາເລຫລາຍພັນຄົນ ພາກັນລຸລັ່ງເຂົ້າໄປໃນ
ຈະຕຸລັດໃນກາງນະຄອນຊານາ ຊຶ່ງໄດ້ກາຍມາເປັນສູນກາງຊຸມນຸມປະທ້ວງຂອງຝ່າຍຄ້ານນັ້ນ.
