ກໍາລັງທະຫານເຢເມັນໄດ້ເປີດສາກລະດົມຍິງໃສ່ພວກປະທ້ວງຕໍ່ຕ້ານລັດຖະບານຢູ່ໃນເມືອງ ຫລວງຊານາ ໃນວັນອາທິດມື້ນີ້ ຍັງຜົນໃຫ້ມີຜູ້ເສຍຊີວິດ ນຶ່ງຄົນ.
ການຍິງກັນໃນວັນອາທິດມື້ນີ້ ນັບວ່າເປັນການກໍ່ຄວາມຮຸນແຮງຄັ້ງລ່າສຸດໃນເຢເມັນ ນັບຕັ້ງ ແຕ່ປະທານາທິບໍດີ Ali Abdullah Saleh ໄດ້ເດີນ ທາງກັບຄືນປະເທດເມື່ອວັນສຸກ ຜ່ານມາ ຢ່າງບໍ່ໄດ້ມີໝາຍກໍານົດການ ຫລັງຈາກທ່ານໄດ້ໄປຢູ່ປະເທດເພື່ອນບ້ານ ຊາອູດີອາ ເຣເບຍ ເປັນເວລາສາມເດືອນ ເພື່ອປິ່ນປົວບາດແຜທີ່ໄດ້ຮັບ ຈາກການລອບສັງຫານ ທ່ານ ເມື່ອເດືອນມິຖຸນາຜ່ານມາ.
ໃນວັນເສົາວານນີ້ ໄດ້ເກີດການປະທະກັນຫລາຍບັ້ນລະຫວ່າງຝ່າຍກໍາລັງ ຈົ່ງຮັກພັກດີຕໍ່ ປະທານາທິບໍດີ Ali Abdullah Saleh ກັບພວກນັກສຶກສາປະທ້ວງ ທີ່ໜຸນຫລັງໂດຍ ຝ່າຍທະຫານ ຢູ່ໃນເມືອງຫລວງຊານາ ທີ່ຍັງ ຜົນໃຫ້ມີຜູ້ເສຍຊີວິດຢ່າງ ໜ້ອຍ 40 ຄົນ. ນອກນີ້ຝ່າຍກໍາລັງຂອງລັດຖະ ບານໄດ້ໂຈມຕີຄ້າຍ ຂອງພວກນັກສຶກສາປະທ້ວງ ເຮັດໃຫ້ມີ ຜູ້ບາດເຈັບລົ້ມຕາຍຫລາຍຄົນ.
ໂຄສົກຝ່າຍຄ້ານ ນາຍພົນ Ali Mohsen al Ahmar ກ່າວວ່າ ພວກທະຫານທີ່ຈົ່ງຮັກ ພັກດີຕໍ່ທ່ານຖືກຂ້າຕາຍຢ່າງໜ້ອຍ 11 ຄົນ ຫລັງຈາກທີ່ໝັ້ນຂອງພວກເຂົາເຈົ້າຖືກລະດົມ ຍິງໃສ່.
ມີລາຍງານວ່າຝ່າຍກໍາລັງທີ່ຈົ່ງຮັກພັກດີຕໍ່ປະທານາທິບໍດີ Saleh ໄດ້ແນ ເປົ້າໝາຍການໂຈມຕີໃສ່ພວກບ້ານເຮືອນຂອງຜູ້ນໍາຊົນເຜົ່າ Sheik Sadek al Ahmar ແລະພວກ ສະໜັບສະໜຸນທ່ານ ທີ່ບໍ່ສະໜັບສະໜຸນ ປະທານາທິບໍດີ Saleh ອີກຕໍ່ໄປແລ້ວນັ້ນ.
ທີວີ Al Arabiya ເວົ້າວ່າ ສະພາຮ່ວມມືແຫ່ງເຂດອ່າວເປີເຊຍ ທີ່ມີຫົກປະເທດນັ້ນ ໄດ້ຂໍ ຮ້ອງໃຫ້ໝົດທຸກຝ່າຍ ຈົ່ງປະຕິບັດການຢຸດຍິງ ແລະຢຸດຍິງປືນໃຫຍ່ ໃສ່ພວກປະທ້ວງ ທີ່ບໍ່ ມີອາວຸດໃດໆນັ້ນ.
ກະຊວງຕ່າງປະເທດສະຫະລັດ ໄດ້ສະແດງຄວາມເປັນຫ່ວງຢ່າງເລິກເຊິ່ງ ກ່ຽວກັບສະຖານະ ການທີ່ດໍາເນີນໄປຢູ່ເຢເມັນໃນເວລານີ້. ຖະແຫລງການສະບັບນຶ່ງເມື່ອວັນເສົາວານນີ້ ຮຽກ ຮ້ອງໃຫ້ໝົດທຸກພັກຝ່າຍ ຈົ່ງຍຸຕິການກໍ່ຄວາມຮຸນແຮງ ແລະໃຫ້ພາກັນຍັບຍັ້ງສັ່ງໃຈຢ່າງ ສຸດກໍາລັງ. ຖະແຫລງການດັ່ງກ່າວໄດ້ຮຽກຮ້ອງ ໃຫ້ປະທານາທິບໍດີ Saleh ຈົ່ງລິເລິ່ມ ການໂອນອໍານາດໂດຍເຕັມ ແລະຕຽມຈັດການເລືອກຕັ້ງປະທານາທິບໍດີຂຶ້ນ ກ່ອນສິ້ນປີນີ້.
