ສະຫະລັດແລະຣັດເຊຍຍັງສາມາດທຳລາຍກັນແລະກັນໄດ້ດ້ວຍການບີບປຸ່ມແລ້ວກໍປ່ອຍໃຫ້
ລູກສອນໄຟຫຼາຍໆພັນລູກຈາກພາກພື້ນດິນ ຈາກພື້ນທະເລທີ່ຕິດຫົວລະເບີດນິວເຄລຍເຂົ້າ
ຖະຫຼົ່ມກັນ.
ແຕ່ລູກສອນໄຟເຫຼົ່ານີ້ບໍ່ໄດ້ແນເປົ້າໝາຍໃສ່ຫົວເມືອງໃຫຍ່ໆຂອງກັນແລະກັນອີກແລ້ວດັ່ງ
ທີ່ເຄີຍກະທຳມາໃນລະຫວ່າງສົງຄາມເຢັນ.
ແລະດ້ວຍການທີ່ປະທານາທິບໍດີສະຫະລັດ ທ່ານບາຣັກໂອບາມາຖືເອົາການປັບປຸງຄວາມ
ສຳພັນທີ່ດີຂຶ້ນກັບຣັດເຊຍເປັນພື້ນຖານກ່ຽວກັບການດຳເນີນນະໂຍບາຍການຕ່າງປະເທດ
ຂອງທ່ານ ປະເທດທັງສອງຈຶ່ງໄດ້ໃຫ້ສັດຕະຍາບັນຕໍ່ສົນທິສັນຍາຫຼຸດກຳລັງອາວຸດນິວເຄລຍ
ທີ່ສາມາດຍິງໄດ້ໃນໄລຍະໄກຫຼື START ສະບັບໃໝ່.
ທ່ານນາງ Angela Stent ນັກຊ່ຽວຊານກ່ຽວກັບຣັດເຊຍ ທີ່ມະຫາວິທະຍາໄລ Geor-
getown ກ່າວວ່າ “ມັນບໍ່ມີຄວາມໝາຍຫຍັງແລ້ວ ທີ່ຈະມີຫົວລະເບີດນິວເຄລຍ
ເຫຼົ່ານັ້ນ ໃນເວລາສົງຄາມເຢັນສິ້ນສຸດລົງແລ້ວ ດັ່ງນັ້ນພວກເຮົາຈຶ່ງໄດ້ຕັດຫົວ
ລະເບີດເຫຼົ່ານີ້ ລົງຢ່າງຫຼວງຫຼາຍ ແລະພວກເຮົາຈະຫຼຸດຫົວລະເບີດເຫຼົ່ານີ້ລົງ
ຕື່ມ. ດັ່ງນັ້ນຂ້າພະເຈົ້າຄິດວ່າ ມັນເປັນສິ່ງສຳຄັນຫຼາຍທີ່ສາມາດເຮັດສຳເລັດ
ກ່ຽວກັບເລື່ອງ ນີ້.”
ທ່ານນາງ Stent ກ່າວວ່າ ນອກນັ້ນມົສກູແລະວໍຊິງຕັນຍັງມີການຕົກລົງທີ່ສຳຄັນກ່ຽວກັບ
ເລື່ອງອັຟການິສຖານ.
ທ່ານນາງໃຫ້ຂໍ້ສັງເກດວ່າ “ນັ້ນແມ່ນສາມາດເວົ້າໄດ້ວ່າ ພວກເຮົາກຳລັງສົ່ງເຮືອ
ບິນຂົນສົ່ງທະຫານ ຜ່ານດິນແດນຣັດເຊຍ ຜ່ານຕາໜ່າງແຈກຈ່າຍເຂດເໜືອ
ແລະໃນຂະນະທີ່ຄວາມສຳພັນກັບປາກິສຖານ ປະສົບກັບບັນຫາຍຸ່ງຍາກຫຼາຍ
ຂຶ້ນນັບມື້ສຳລັບສະຫະລັດ ເສັ້ນທາງລຳລຽງດັ່ງກ່າວແມ່ນມີຄວາມສຳຄັນຫຼາຍ
ສຳລັບຄວາມສາມາດຂອງພວກເຮົາໃນການປະຕິບັດງານຢູ່ໃນອັຟການິສຖານ.
ນອກຈາກນີ້ມົສກູຍັງໄດ້ໃຫ້ການສະໜັບສະໜຸນຢ່າງແຂງຂັນກວ່າເກົ່າໃນການລົງໂທດຕໍ່ອີ
ຣ່ານ ແລະໄດ້ຍົກເລີກການຈັດສົ່ງລູກສອນໄຟຕໍ່ຕ້ານອາກາດສະຍານ S-300 ໄປໃຫ້ເຕ
ຫະຣ່ານ. ຍິ່ງໄປກວ່ານັ້ນລັດຖະບານຣັດເຊຍ ກໍບໍ່ໄດ້ຄັດຄ້ານ ຕໍ່ການຈັດຕັ້ງເຂດຫ້າມບິນ
ເໜືອປະເທດລີເບຍ.
ແຕ່ໃນຂະນະດຽວກັນທ່ານນາງ Stent ເວົ້າວ່າ ທັງສອງຝ່າຍຍັງບໍ່ສາມາດຕົກລົງກັນໄດ້
ກ່ຽວກັບແຜນການຂອງສະຫະລັດທີ່ຈະສ້າງລະບົບຕໍ່ຕ້ານລູກສອນໄຟໃນຢູໂຣບ.
ທ່ານນາງເວົ້າວ່າ “ພວກເຮົາໄດ້ໃຫ້ການອະທິບາຍຕໍ່ຣັດເຊຍ ລັດຖະບານຂອງ
ພວກເຮົາໄດ້ໃຫ້ການອະທິບາຍໃນຫຼາຍໆໂອກາດວ່າ ລະບົບດັ່ງກ່າວນີ້ ແມ່ນ
ແນໃສ່ຄວາມເປັນຫ່ວງກັງວົນ ກ່ຽວກັບການໄດ້ມາຊຶ່ງອາວຸດນິວເຄລຍຂອງອີ
ຣ່ານກ່ຽວກັບເກົາຫຼີເໜືອ ກ່ຽວກັບປະເທດອື່ນໆທີ່ອາດສາມາດຂົ່ມຂູ່ພວກເຮົາ
ທັງໝົດມັນບໍ່ໄດ້ແນໃສ່ຣັດເຊຍ.”
ໃນເດືອນມີນາຈະມານີ້ ປະຊາຊົນຊາວຣັດເຊຍຈະພາກັນໄປປ່ອນບັດເລືອກເອົາປະທານາ
ທິບໍດີຄົນໃໝ່ ເພື່ອເຂົ້າຮັບຕຳແໜ່ງ ແທນທ່ານ Dmitry Medvedev. ຜູ້ທີ່ຄາດວ່າຈະ
ໄດ້ຮັບໄຊຊະນະກໍແມ່ນ ທ່ານ Vladimir Putin ອະດີດປະທານາທິບໍດີແລະກຳຕຳແໜ່ງ
ນາຍົກລັດຖະມົນຕີຣັດເຊຍໃນເວລານີ້.
ພວກນັກຊ່ຽວຊານຫຼາຍໆຄົນຍັງສົງໄສຢູ່ວ່າ ການເປັນປະທານາທິບໍດີຂອງທ່ານ Putin
ຈະມີຄວາມແຕກຕ່າງຫຼືບໍ່ໄປຈາກລັດຖະບານຂອງທ່ານ Medvedev.
ທ່ານ Brent Scowcroft ອະດີດທີ່ປຶກສາດ້ານຄວາມໝັ້ນຄົງແຫ່ງຊາດ ຂອງສະຫະລັດ
ກ່າວວ່າ “ບໍ່ ຂ້າພະເຈົ້າບໍ່ຄິດດັ່ງນັ້ນ ຍ້ອນສິ່ງທີ່ຈະແຈ້ງທີ່ສຸດ ກໍຄືທ່ານ Putin
ເປັນອຳນາດທີ່ເດັດຂາດ ຕະຫຼອດມາ ດັ່ງນັ້ນຂ້າພະເຈົ້າຈຶ່ງບໍ່ຄິດວ່າ ບໍ່ຄິດວ່າ
ມັນຈະມີການປ່ຽນແປງຫຍັງຫຼາຍ.”
ສ່ວນທ່ານ Thomas Pickering ອະດີດເອກອັກຄະລັດຖະທູດສະຫະລັດປະຈຳກຸງມົສກູ
ກ່າວວ່າຣັດເຊຍເປັນປະເທດທີ່ຕ້ອງການຢາກໃຫ້ໄດ້ຮັບຄວາມສົນໃຈບໍ່ວ່າຜູ້ໃດກໍຕາມປົກ
ຄອງປະເທດດັ່ງກ່າວ.
ທ່ານເວົ້າວ່າ “ຂ້າພະເຈົ້າຄິດວ່າມີຫຼາຍໆ ສິ່ງຫຼາຍໆຢ່າງທີ່ພວກເຮົາບໍ່ມັກກ່ຽວກັບ
ຣັດເຊຍ ມັນຈະມີຢູ່ສະເໝີໄປ. ມີຫຼາຍໆສິ່ງຫຼາຍໆຢ່າງ ທີ່ຣັດເຊຍບໍ່ມັກ ກ່ຽວກັບ
ພວກເຮົາ ແຕ່ກໍມີບາງສິ່ງບາງຢ່າງທີ່ພວກເຮົາມັກນຳກັນຮວມທັງຄວາມຈຳເປັນ
ສຳລັບການຢູ່ຮ່ວມກັນນຳດ້ວຍ.”
ຊາວອະເມຣິກັນຈະພາກັນໄປປ່ອນບັດໃນເດືອນພະຈິກປີ 2012 ເພື່ອເລືອກເອົາປະທານາທິ
ບໍດີຄົນໃໝ່. ດັ່ງນັ້ນຈຶ່ງມີຄວາມເປັນໄປໄດ້ທີ່ວ່າປະເທດທັງສອງອາດຈະມີຜູ້ນຳຄົນໃໝ່ເລີ່ມໃນ
ປີ 2013 ນີ້.
