ລິ້ງ ສຳຫລັບເຂົ້າຫາ

logo-print

FB ກ່າວວ່າອິດສະລະພາບ ດ້ານສື່ມວນຊົນ ຕົກຕໍ່າລົງ ຢູ່ໃນຫລາຍປະເທດ


ນັກຂ່າວແລະນັກເຄື່ອນໄຫວພາກັນເດີນຂະບວນປະທ້ວງ ຮຽກຮ້ອງເອົາເສລີພາບດ້ານການຂ່າວ ກາງນະຄອນຫລວງ Ankara ຂອງປະເທດ Turkey, ເມື່ອວັນທີ 19 ມີນາ 2011. (file photo)

ອົງການ Freedom House ຫລື “​ເຄຫາ​ອິດ​ສະລະ​ພາບ” ຊຶ່ງ​ເປັນກຸ່ມ​ຈັດຕັ້ງທີ່​ມີສູນ​ກາງ​ຢູ່​ໃນ​ສະຫະລັດ ທີ່​ຕິດຕາມ​ເບິ່ງ​ສະພາບ​ຄວາມ​ເປັນ​ໄປ​ດ້ານສິດທິ​ມະນຸດຢູ່​ໃນ​ທົ່ວ​ໂລກ​ໃນ​ເວລາ​ນີ້ ກ່າວ​ວ່າ ຈໍານວນ​ປະຊາ​ຊົນ​ທີ່​ສາມາດ​ເຂົ້າຫາ​ເຂົ້າ​ເຖິງ​ສື່​ມວນ​ຊົນ​ທີ່​ເສລີ​ແລະ​ອິດສະຫລະ ​ນັ້ນ​ ໄດ້​ຫລຸດລົງ​ໄປສູ່ລະ​ດັບ​ຕໍ່າສຸດ​ ໃນ​ໄລຍະ​ສິບ​ກວ່າ​ປີຜ່າ​ນມາ. ​ໃນ​ລາຍ​ງານຜົນ​ການ​ສໍາ​ຫລວດປະ​ຈໍາປີ​ທີ່​ຫາ​ກໍນໍາອອກ​​ເປີດ​ເຜີຍ​ໃໝ່ໆ​ ອົງການ Freedom House ​ເວົ້າ​ວ່າ ມີ ຫລາຍ​ປະເທດສໍາຄັນໆທີ່ໄດ້ເຫັນການຕົກຕໍ່າລົງຢ່າງໃຫຍ່ຫລວງ ເມື່ອປີຜ່ານມາ ແລະວ່າໃນ ທຸກ 6 ຄົນໃດ ມີພຽງ 1 ຄົນ​ເທົ່າ​ນັ້ນ​ທີ່ອາໃສຢູ່ໃນພວກປະເທດ ທີ່ຖືກຈັດວ່າມີເສລີພາບ ດ້ານການຂ່າວ. ຜູ້​ສື່​ຂ່າວ​ວີ​ໂອ​ເອ William Ide ມີ​ລາຍ​ງານ​ກ່ຽວກັບ​ເລື້ອງ​ນີ້ ດັ່ງທອງປານ ຈະ​ນໍາມາສະເໜີທ່ານ.

ໃນດັດຊະນີກ່ຽວກັບເສລີພາບຂອງສື່ມວນຊົນໂລກປະຈໍາປີນີ້
ຢູ່​ໃນ 196 ປະເທດແລະອານາເຂດນັ້ນ ອົງການ ຟຣີດົມ
ເຮົ້າສ໌ ກ່າວວ່າ ຕົນໄດ້ຈັດ​ໃຫ້ 68 ປະເທດ ເປັນປະເທດມີ
ເສລີພາບດ້ານສື່ມວນຊົນ ແລະສ່ວນປະເທດທີ່ເຫລືອໃນ
ສອງສ່ວນສາມນັ້ນ ເປັນປະເທດທີ່ມີເສລີພາບເປັນບາງສ່ວນ ຫລືບໍ່ມີເລີຍ.

ນາງ Karin Karlekar ບັນນາທິການອາວຸໂສຂອງຟຣີ
ດົມ ເຮົ້າສ໌ ກ່າວວ່າ ນີ້ເປັນການຈັດ​ອັນ​ດັບ​ແບບ​ເທົ່າໆ
ກັນ ແຕ່ຖ້າ​ພິຈາລະນາ​ຢ່າງລະອຽດຫລາຍຂຶ້ນ​ແລ້ວ ຈະ
ເຫັນສະພາບການທີ່ແຕກຕ່າງໄປຈາກນີ້ ຊຶ່ງ​ນາງ​ອະທິບາຍ​ວ່າ:

“ຖ້າພວກເຮົາເບິ່ງສະຖິຕິປະຊາກອນແລ້ວ ສະຖານ​
ນະ​ການ​ແມ່ນ​ໜັກຫລາຍກ່ວາ​ນັ້ນ​ອີກ ຄືມີພຽງ 15
ເປີເຊັນຂອງ​ປະຊາກອນ​ໂລກ ຫລືເທົ່າກັບນຶ່ງໃນຫົກ
ຄົນໃດ​ເທົ່າ​ນັ້ນ ທີ່ອາໃສຢູ່ໃນປະເທດທີ່ມີເສລີພາບດ້ານຂ່າວສານ​ຫລືສື່ມວນຊົນ
ໃນຂະນະທີ່ອີກ 42 ເປີເຊັນນັ້ນ ມີເສລີພາບດ້ານ​ການ​ຂ່າວເປັນບາງສ່ວນແລະອີກ
43 ເປີເຊັນ ຊຶ່ງ​ແມ່ນສ່ວນໃຫຍ່ນັ້ນເປັນປະເທດບໍ່ມີເສລີພາບດ້ານສື່ມວນຊົນເລີຍ.”

ນາງ Karin Karlekar ບັນນາທິການ ອາວຸໂສຂອງ Freedom House.
ນາງ Karin Karlekar ບັນນາທິການ ອາວຸໂສຂອງ Freedom House.

ທ່ານນາງ Karlekar ໄດ້ຖະ​ແຫລ​ງກ່ຽວ​ກັບ
ເລື້ອງ​ນີ້ຢູ່ທີ່ຫໍພິພິທະພັນຂ່າວຫລື Newseum
ຊຶ່ງເປັນຫໍພິພິທະພັນປະວັດສາດການຂຽນຂ່າວ
ທີ່ນະຄອນຫລວງວໍຊິງຕັນດີຊີ ໃນກອງປະຊຸມ
ບັ້ນນຶ່ງທີ່​ຈັດ​ຂຶ້ນ​ ເພື່ອເປັນຂີດໝາຍວັນເສລີ
ພາບດ້ານຂ່າວສານໂລກ​ເມື່ອ​ວັນ​ທີ 3 ພຶດສະ
ພາ​ຜ່ານ​ມາ​ນີ້. ທ່ານນາງກ່າວຕື່ມວ່າ ຍ້ອນ
ຫລັງຄືນໄປເບິ່ງ​ໄລຍະສາມສິບປີຜ່ານມາ ທີ່​
ອົງການ Freedom House ໄດ້ຕິດຕາມ
ເບິ່ງເສລີພາບຂອງ​ສື່​ມວນ​ຊົນ​ໃນ​ທົ່ວໂລກ
ກໍເຫັນວ່າ​ໄດ້ມີການປັບປຸງ​ໃຫ້ດີຂຶ້ນຫລາຍ
ແຕ່ພ້ອມດຽວ​ກັນ​ນັ້ນ ກໍ​ມີ​ອັນທີ່ທ່ານນາງ
ເວົ້າວ່າ ການຕົກຕໍ່າລົງທີ່​ໜ້າເປັນຫ່ວງເມື່ອ ບໍ່ດົນຜ່ານມານີ້.

“ຖ້າຈະເວົ້າໃນແງ່ທ່າອຽງໂດຍລວມ​ແລ້ວ ສິ່ງທີ່ພວກເຮົາເຫັນນັ້ນ ກໍແມ່ນວ່າ ​ໃນ​
ຂະນະ​ທີ່ການຄວບຄຸມແບບເປີດເຜີຍ ແລະການກວດກາ​ພວກສື່ ທາງດ້ານການພິມ ແລະການອອກອາກາດນັ້ນ ​ໄດ້ໂຍະຍານລົງໄປແດ່ນັ້ນ ຊໍ້າພັດ​ມີ​ການເອົາວິທີການ
ຊັກ​ຈູງ​ແບບອື່ນໆມາໃຊ້ ຊຶ່ງ​ມີ​ຕັ້ງ​ແຕ່ການຮາວີ​ກັ່ນ​ແກ້ງທາງດ້ານກົດໝາຍແລະກົດ
ເກນ ​ໄປ​ຈົນ​ເຖິງ​ການນາບຂູ່​ໃຫ້ຢ້ານ​ກົວ ແລະການໂຈມຕີທໍາຮ້າຍ​ຮ່າງກາຍພວກ
ນັກຂ່າວຢ່າງ​ໂຈ່ງ​ແຈ້ງ.”

ອົງການ Freedom House ກ່າວອີກວ່າ ອີຈິບ ຮອນດູຣັສ ຮັງກາຣີ ເມັກຊິໂກ ເກົາຫລີ
ໃຕ້ ໄທ ແລະ ຢູເຄຣນ ແມ່ນ​ໂຮມ​ຢູ່​ໃນພວກປະເທດທີ່​ໄດ້ມີການຕົກຕໍ່າລົງຢ່າງສໍາຄັນ.

ການກໍ່ຄວາມຮຸນແຮງຢູ່ໃນປະເທດແມ໊ກຊິໂກນັ້ນ ທີ່​ສືບ​ເນື່ອງມາຈາກບັນຫາການຄ້າຢາເສບ
ຕິດ ແລະສົງຄາມປາບຢາເສບຕິດທີ່ກໍາລັງດໍາເນີນໄປ ຢູ່ໃນຂະນະນີ້ ​ແມ່ນ​ໄດ້ນໍາໄປສູ່ການ
ເພີ່ມທະວີ​ຂຶ້ນ​ຢ່າງ​ຫລວງຫລາຍ​ໃນການໂຈມຕີ​ຕໍ່ພວກນັກຂ່າວ ພ້ອມກັບ​ໃນລະດັບຂອງ​ການ
ກວດກາ​ຕົນ​ເອງ ແລະສິດທິພິເສດ​ໃນ​ການ​ຖືກ​ຍົກ​ເວ້ນ​ຈາກ​ການ​ຖືກ​ລົງ​ໂທດຂອງ​ພວກ​ຕໍາ
ຫລວດ ທີ່​ກະທໍາ​ຮຸນ​ແຮງ​ຕໍ່​ນັກ​ຂ່າວ​ນັ້ນ.

ຮູບກຣາຟິກທີ່ສະແດງໃຫ້ເຫັນຈໍານວນປະເທດທີ່ມີເສຮີພາບ ດ້ານຂ່າວສານ(68 ປະເທດ) ມີເປັນບາງສ່ວນ(65 ປະເທດ) ແລະບໍ່ມີເລີຍ(63 ປະເທດ) ຕາມການສໍາຫລວດຂອງອົງການ Freedom House.
ຮູບກຣາຟິກທີ່ສະແດງໃຫ້ເຫັນຈໍານວນປະເທດທີ່ມີເສຮີພາບ ດ້ານຂ່າວສານ(68 ປະເທດ) ມີເປັນບາງສ່ວນ(65 ປະເທດ) ແລະບໍ່ມີເລີຍ(63 ປະເທດ) ຕາມການສໍາຫລວດຂອງອົງການ Freedom House.

ທີ່​ປະ​ເທດ​ອີ​ຈິບ​ນັ້ນ Freedom
House ກ່າວວ່າ ການກວາດ
ລ້າງຢ່າງໜັກໜ່ວງ ກ່ອນໜ້າ
ການເລືອກຕັ້ງສະພາ​ແຫ່ງ​ຊາດ
ເມື່ອເດືອນພະຈິກປີຜ່ານມານັ້ນ
ໄດ້​ສົ່ງ​ຜົນ​ໃຫ້ລະດັບເສລີພາບ
ດ້ານການຂ່າວຂອງປະເທດດັ່ງ
ກ່າວ ຕົກລົງໄປຢູ່ລະດັບ ບໍ່​ມີ
ເສລີພາບ​ເລີຍ. ການຖອຍຫລັງ​
ໃນ​ລະດັບນ້ອຍກ່ວາ ກໍ​ໄດ້ປາ
ກົດໃຫ້ເຫັນ​ເຊ່ນ​ກັນຢູ່ໃນອີຣັກ ອິຣ່ານ ຄູເວດ ໂມຣອັກໂກ ແລະເຢເມັນ.

ທ່ານນາງ Karlekar ກ່າວອີກວ່າ ເຫດການຕ່າງໆໃນພາກຕາເວັນອອກກາງ ແລະອາຟຣິ
ກາເໜືອເມື່ອໝໍ່ໆມານີ້ ອາດສາມາດຊ່ວຍຕ່າວປີ້ນທ່າອ່ຽງຂອງໂລກ ແລະນໍາ​ໄປ​ສູ່ການ
ເຄຶ່ອນໄຫວໃນທາງບວກຫລາຍຂຶ້ນ ຢູ່​ໃນການສໍາຫລວດໃນຄັ້ງຕໍ່ໄປ. ທ່ານນາງ Karlekar ກ່າວວ່າ:

"ພວກເຮົາຫວັງຢ່າງຍິ່ງວ່າ ໃນປີຕໍ່ໜ້ານີ້ ພວກເຮົາຈະເຫັນການເຄຶ່ອນໄຫວ ໃນ
ທາງບວກ
ຫລາຍ​ຂຶ້ນ ແລະຫວັງວ່າການເຄຶ່ອນໄຫວບັ້ນຕ່າງໆ ໃນຂົງເຂດຕາເວັນ
ອອກ
ກາງ ແລະການປະຕິວັດຕ່າງໆໃນຕົ້ນປີ 2011 ນີ້ ຈະ​ໃຫ້​ຄວາມຫວັງແກ່
ພວກເຮົາວ່າ
ບາງທີທ່າອຽງຂອງການຕົກ​ຕໍ່າລົງ ທີ່ພວກເຮົາໄດ້ເຫັນໃນໄລຍະ 8
ປີຜ່ານມາ
ນັ້ນ ອາດມາເຖິງຈຸດຈົບໄດ້.”

ລາຍ​ງານຜົນການສໍາຫລວດຍັງໃຫ້ຂໍ້ສັງເກດອີກວ່າ ພວກລັດຖະບານທີ່ກົດຂີ່ປາບປາມປະຊາ
ຊົນນັ້ນ ໄດ້​ເພິ່ມທະວີຄວາມພະຍາຍາມຂຶ້ນ ເພື່ອຄວບຄຸມພວກພາຫະນະໃໝ່ໆຂອງການສື່
ສານ ເຊັ່ນລະບົບໂທະລະພາບຜ່ານດາວທຽມ ອິນເທີເນັດ ແລະໂທລະສັບມືຖື ເປັນຕົ້ນ.

ການເດີນຂະບວນຮຽກຮ້ອງເອົາເສລີພາບດ້ານການ ຂ່າວ ຢູ່ຟີລິບປີນ ໃນວັນເສລີພາບດ້ານການຂ່າວໂລກ ຫລື World Press Freedom Day, ວັນທີ 3 ພຶດສະພາ 2011.
ການເດີນຂະບວນຮຽກຮ້ອງເອົາເສລີພາບດ້ານການ ຂ່າວ ຢູ່ຟີລິບປີນ ໃນວັນເສລີພາບດ້ານການຂ່າວໂລກ ຫລື World Press Freedom Day, ວັນທີ 3 ພຶດສະພາ 2011.

ລາຍງານເວົ້າວ່າ ໂທລະພາບຜ່ານດາວທຽມ​
ໄດ້ປິດກັ້ນຢູ່ໃນອີຈິບແລະອິຣ່ານ. ເວບໄຊ້
ເຄືອຂ່າຍສັງຄົມ Facebook ນັ້ນ ກໍຖືກປິດ
ລົງຊົ່ວຄາວຢູ່ ໃນປາກີສຖານໃນປີ 2010
ແລະຍັງຄົງອັດ​ຢູ່ ບໍ່ເປີດບໍລິການຢູ່ໃນຈີນ
ຊີເຣຍ ແລະຫວຽດນາມ ເມື່ອປີກາຍ​ນີ້.

ເກົາຫລີໃຕ້ໄດ້ຖືກຄັດອອກຈາກບັນຊີພວກ
ປະເທດທີ່​ມີເສລີພາບ​ດ້ານການຂ່າວ ລົງມາ
ຢູ່​ໃນ​ລະດັບ ມີເສລີພາບ​ເປັນ​ບາງ​ສ່ວນ
ຂະນະ​ທີ່ປະ​ເທດໄທຕົກລົງ​ມາຈາກເປັນປະ
ເທດທີ່​ມີເສລີພາບ​ເປັນ​ບາງ​ສ່ວນຫລື​ເຄິ່ງໆ
ກາງໆ ມາເປັນປະເທດບໍ່ມີເສລີພາບເລີຍ
ລຸນຫລັງມີ​ການ​ດໍາ​ເນີນຄວາມພະຍາຍາມ
ເພີ່ມຂື້ນໃນທັງສອງປະເທດເພື່ອ​ກວດກາ​ຂ່າວ ​ທາງອິນເທີເນັດນັ້ນ

ທ່ານ Frank LaRue ຜູ້ສໍາຫລວດຂອງອົງການສະຫະປະຊາຊາດວ່າດ້ວຍເສລີພາບໃນ
ການສະແດງຄວາມຄິດຄວາມເຫັນ ກ່າວວ່າ ພວກນັກການເມືອງຫລາຍໆຄົນແມ່ນພາກັນ
ວິຕົກຮ້ອນຮົນ ເນຶ່ອງຈາກພວກເຂົາເຈົ້າເຊຶ່ອວ່າ ອິນເທີເນັດແມ່ນເປັນ​ໄພຂົ່ມຂູ່ ໃນຖານະ
ເປັນ​ລະບົບການສື່ສານທີ່ມີຮູບແບບຫ້າວຫັນ ແລະສ້າງປະຕິກິລິຍາຕໍ່​ເນື່ອງ. ທ່ານ LaRue ກ່າວ​ວ່າ:

“ເວລານີ້ ພວກເຮົາປາກົດເຫັນມີການກວດກາເພີ່ມຂຶ້ນ ບາງເທື່ອກໍມາໃນຮູບແບບ
ເກົ່າຂອງການ​ເຮັດ​ໃຫ້​ເປັນອາຊະຍາກໍາ ຫລື​ກະທໍາ​ຜິດ​ກົດໝາຍ ອາຊະຍາກໍາ​ໃນ​
ການທໍາລາຍຊື່ສຽງ ທີ່ມີຢູ່ໃນກະບວນການນິຕິບັດຢັດຂອງຫລາຍໆປະເທດ ແຕ່ບໍ່
ໄດ້ມີ​ການ​ນໍາ​ໃຊ້ມາເປັນເວລາດົນນານນັ້ນ ກໍໄດ້ຖືກຮື້ຟື້ນ​ຄືນ​ມາ​ໃນ​ເວລາ​ນີ້. ເກົາ
ຫລີໃຕ້ໄດ້ຖືກຈັດ​ໃຫ້ຢູ່ໃນສະຖານະພາບໃໝ່ໃນລາຍງານຂອງ Freedom House
ກໍ​ຍ້ອນ​ວ່າ​ໄດ້​ມີ​ການ​ກວດກາລະບົບອິນເທີເນັດ ​ແລະ​ພວກ​ທີ່​ສະ​ແດງ​ຄວາມ​ເຫັນ​
ລົງ​ທາງ​ອິນ​ເທີ​ເນັດ ກໍ​ໄດ້ຖືກຕໍາໜິຕິຕຽນ.”

Freedom House ກ່າວຕໍ່ໄປວ່າ ການກົດດັນເພີ່ມຕື່ມຕໍ່ວົງການສື່ມວນຊົນຢູ່ໃນປະ​ເທດ
ໄທ ທີ່​ປະສົບ​ກັບຄວາມວຸ້ນວາຍທາງການເມືອງນັ້ນ ໄດ້ນໍາໄປສູ່ລະດັບທີ່ຕົກຕໍ່າລົງ.

ທ່ານນາງ Karlekar ກ່າວອີກວ່າ ​ໂດຍສ່ວນໃຫຍ່​ແລ້ວ ລະດັບຂອງເສລີພາບທາງອິນເທີ
ເນັດແລະເສລີພາບດ້ານການຂ່າວນັ້ນ ​ແມ່ນ​ປະມານ​ເທົ່າໆ​ກັນ ຢູ່ໃນທັງພວກປະເທດທີ່​ດີ​ ແລະ​ບໍ່​ດີ.

ທ່ານນາງ Karlekar ກ່າວໃນທີ່ສຸດວ່າ ​ເຖິງ​ແມ່ນມີການ​ດໍາ​ເນີນຄວາມພະຍາຍາມເພີ່ມຂື້ນ
ນັບມື້ ​ເພື່ອຈໍາກັດຮັດແຄບແລະຈໍາກັດອິດທິພົນຂອງອິນເທີເນັດນັ້ນກໍ​ຕາມ ​ແຕ່​ສື່​ທີ່​ວ່າ​ນີ້
ກໍ​ຄື​ອິນ​ເທີເນັດ​ນັ້ນ ກໍມີສ່ວນໃນການເປີດເສລີພາບດ້ານສະຕິປັນຍາ ແລະ​ເປັນແຫລ່ງທີ່ມີ
ຄວາມສາມາດບົ່ມຊ້ອນ ທີ່ຈະໃຫ້ຄວາມຫວັງສໍາລັບການປ່ຽນແປງ.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG