ລິ້ງ ສຳຫລັບເຂົ້າຫາ

ສຸຂະພາບ: ເຂົ້າຂາວເພິ່ມການສ່ຽງຕໍ່ ການເປັນໂຣກເບົາຫວານ

  • ສາລີ ຈິດຕະວໍຣະວົງ

ພວກນັກຄົ້ນຄວ້າກ່າວວ່າ ການກິນເຂົ້າກ້ອງ ຫລື brown rice ຊ່ວຍຫລຸດຜ່ອນຄວາມສ່ຽງຕໍ່ການ ເປັນໂຣກເບົາຫວານ ປະເພດສອງ.

ບັນດານັກຄົ້ນຄວ້າຂະແໜງສາທາລະນະສຸກຂອງມະຫາວິທະຍາໄລ Harvard ​ໃນ​ສະຫະ ລັດ ໄດ້ເຜີຍແຜ່ລາຍ​ງານການຄົ້ນພົບໃໝ່ເມື່ອບໍ່ດົນມານີ້ ທີ່ສະແດງວ່າ ການກິນເຂົ້າຂາວ ພາ​ໃຫ້ອັດຕາສ່ຽງ ຕໍ່ການເປັນໂຣກເບົາຫວານປະເພດ 2 ​ມີເພິ່ມຂຶ້ນ​ ແຕ່ການກິນເຂົ້າກ້ອງ ຊ້ຳພັດ​ຫຼຸດຜ່ອນ​ການ​ສ່ຽງ​ນັ້ນລົງ.

ເຂົ້າ​ເປັນ​ອາຫານຜົນລະປູກທ່ີ​ມີ​ແຜ່​ຫຼາຍ​ທ່ີ​ສຸດແນວນ່ຶງຂອງ​ໂລກ. ຄວາມ​ສຳ​ເລັດໃນ​ການ​ປູກອາຫານ​ເມັດ​ທ່ີ​ວ່າ​ນີ້​ສາມາດ​ເວົ້າ​ໄດ້​ວ່າ ​ເປັນ​ຍ້ອນ​ທັງ​ແຮງ​ງານ​ທ່ີມີຢູ່ຢ່າງ​ຫຼວງ ຫຼາຍ ສຳລັບ​ການ​ປູກຝັງ​ແລະ​ເກັບ​ກ່ຽວ​ ຕະຫລອດ​ທັງ​ນ້ຳ​ຝົນ​ທ່ີ​ອຸດົມສົມບູນຢູ່​ໃນ​ດິນ​ແດນບ່ອນປູກຝັງ​ເຂົ້າ​ນັ້ນ. ​ເຂົ້າຂາ​ວ​ໄດ້​ກາຍ​ມາເປັນ​ທີ່​ນິຍົມ​ແລະ​ມີຫລາຍ​ເປັນ​ພິ​ເສດ ​ຍ້ອນ ການ​ເກັບ​ຮັກສາ​ໄວ້​ໄດ້​ເປັນ​ເວລາ​ດົນ​ນານ.​ ເນື່ອງ​ຈາກ​ເຂົ້າ​ເປັນ​ພາກ ສ່ວນ​ທ່ີ​ສຳຄັນ​ທ່ີ​ສຸດ​ຂອງ​ອາຫານການ​ກິນ​ຂອງ​ຄົນ​ໃນ​ທົ່ວ​ໂລກ ພວກ​ນັກ​ວິທະຍາສາດ​ຈ່ຶງ​ພາກັນ​ຄົ້ນຄວ້າ​ເບິ່ງ​ວ່​າ ​ມັນ​ມີ​ຄວາມ​ກ່ຽວ​ພັນ​ແນວ​ໃດ​ກັບ​ໂຣກຊ້ຳ​ເຮື້ອ​ຂອງ​ຄົນ.

ທ່ານ ຈີ ຊັນ ​ເປັນ​ຫົວໜ້າຄະນະ​ຂຽນ​ລາຍ​ງານສະບັບ​ໃໝ່ ຂອງສະ​ຖາ​ບັນສາທາລະນະ​ສຸກ​ຂອງມະຫາວິທະຍາ​ໄລ Harvard. ການຄົ້ນຄວ້າຂອງທ່ານສະ​ແດງ​ໃຫ້​ເຫັນ​ວ່າ ການ​ກິນ ອາການ​ທ່ີ​ເຕັມ​ໄປ​ດ້ວຍ​ເຂົ້າຂາ​ວ ມີ​ສ່ວນ​ພົວພັນກັບການ​ເພີ່ມຂຶ້ນ​ ໃນ​ການ​ສ່ຽງ​ຕໍ່​ການ​ເປັນ​ໂຣກ​ເບົາຫວານ​ປະ​ເທດ 2 ຊ່ຶງແມ່ນບັນຫາສຸຂະພາບ​ທ່ີ​ຮ້າຍ​ແຮງ​ອັນ​ນຶ່ງ ທ່ີເກີດ​ຂຶ້ນ​ເວລາ ຮ່າງກາຍ​ຂອງ​ເຮົາ​ ບໍ່​ສາມາດ​ໃຊ້​ນ້ຳຕານໃນເສ້ນ​ເລືອດໄດ້ ​ຢ່າງຖືກຕ້ອງ.

ປະກອບສ່ວນ​ໃນ​ການ​ສຶກສາ​ນີ້​ ມີ​ຜູ້​ຊາຍ​ຫຼາຍ​ກວ່າ 39 ພັນ​ຄົນ​ແລະ​ແມ່ຍິງຫຼາຍ​ກວ່າ 157 ພັນຄົນ ຊຶ່ງພວກ​ເຂົາ​ເຈົ້າ​ໄດ້​ຖືກສອບ​ຖາມ​ກ່ຽວ​ກັບ​ວິຖີ​ຊີວິດ​ຂອງ​ເຂົາ​ເຈົ້າ ກ່ຽວ​ກັບວ່າພວກ​ເຂົາ​ເຈົ້າ​ພາກັນ​ຢູ່ກິນ​ແບບ​ໃດ ​ແລະ​ເຂົາ​ເຈົ້າມີ​ໂຣຄາ​ພະຍາດ​ແນວ​ໃດ​ຫລື​ບໍ່ ​ກ່ອນ​ໜ້າເຂົ້າມາ ​ຮ່ວມໃນ​ການຄົ້ນຄວ້າ​.

ພວກ​ນັກຄົ້ນຄວ້າ​ໄດ້​ພົບ​ເຫັນ​ວ່າ ພວກ​ປະກອບສ່ວນ​ທ່ີ​ກິນ​ເຂົ້າຂາວ​ 5 ​ຈາ​ນ ຫລືຫຼາຍ​ກວ່າ ​ໃນ​ແຕ່​ລະອາ​ທິດ ​ແມ່ນ​ມີການ​ສ່ຽງເພ່ີມຂຶ້ນເຖິງ 17% ​ໃນ​ການ​ທ່ີ​ຈະເປັນ​ໂຣກ​ເບົາ ຫວານ​ປະ​ເພດ 2. ກົງກັນຂ້າມ ພວກ​ທ່ີ​ກິນ​ເຂົ້າກ້ອງຫລື​ເຂົ້າ​ແພ່​ແດງ 2 ​ຈານ ຫຼື​ຫຼາຍ ກວ່າ​ນັ້ນ ​ຕໍ່​ອາທິດ ​ແມ່ນ​ມີ​ການ​ສ່ຽງ​ ຫຼຸດ​ລົງ 11%.

ເຂົ້າກ້ອງ ທີ່​ພາສາ​ອັງກິດ​ເອີ້ນ​ວ່າ brown rice ນັ້ນ ​ແມ່ນ​ຮູບ​ແບບ​ຕາມ​ທຳ​ມະ​ຊາດຂອງ​ເມັດ​ເຂົ້າ ທີ່ໄດ້​ມາຫລັງ​ຈາກ​ຕຳ​ເອົາເປືອກມັນ ອອກ​ແລ້ວ. ​ແຕ່ຖ້າ​ເຮົາ​ເອົາ​ເຂົ້າກ້ອງ​ໄປ​ເຮັດ​ໃຫ້​ມັນຫຼ້ອນ​ແລະ​ຂາວ​ງາມ​ຂຶ້ນ ກໍຄື​ສີເອົາ​ເປືອກ​ຊັ້ນນອກ​ຂອງ​ມັນ​ອອກ ​ລວມທັງ​ແກບກັບ​ຮຳນຳ​ນັ້ນ ເຮົາ​ກໍ​ຈະ​ໄດ້​ເມັດ​ເຂົ້າຂາ​ວໆ​ມາ. ຢ່າງ​ໃດ​ກໍ​ດີ ເວົ້າ​ແທ້​ແລ້ວ ເຂົ້າຂາວ​ແມ່ນ​ເປັນ​ແຕ່​ພຽງ​ແປ້ງ​ຊ່ືໆ.

ທ່ານ ຈີ ຊັນ​ ອະທິບາຍ​ວ່າ ການ​ສູນ​ເສຽຊັ້ນນອກທ່ີ​ເຕັມ​ໄປ​ດ້ວຍ​ເສ້ນ​ຟາຍ​ເບີ້​ນັ້ນ ຈະ​ປ່ອຍ​ໃຫ້​ທາດ​ແປ້ງ​ຖືກ​ດູດ​ຊືມ​ເອົາເຂົ້າ​ໄປ​ໃນ​ຮ່າງກາຍໄດ້ໂດຍ​ໄວ ຊຶ່ງທ່ານ​ອະທິບາຍວ່າ:

“ຊັ້ນນອກຂອງ​ເມັດເຂົ້າ ຈະ​ເຮັດ​ໃຫ້​ທາດ enzyme ທ່ີຍ່ອຍ​ອາຫານ​ນັ້ນ ​ເຊື່ອມ​ຊຶມ​ເຂົ້າ​ໄປ​ໃນ​ທາດແປ້ງ ຊ້າ​ລົງ ​ສົ່ງ​ຜົນ​ໃຫ້ການປ່ອຍນ້ຳຕານ​ເຂົ້າ​ໄປ​ໃນ​ເສັ້ນ​ເລືອດ ​ຊ້າລົງ​ໄປ​ນຳກັນ ສຳລັບ​ເຂົ້າກ້ອງ ​ເມື່ອສົມ​ທຽບ​ໃສ່​ກັບ​ເຂົ້າຂາວ.”

ເຖິງ​ແມ່ນ​ວ່າເຫດຜົນ​ແທ້ໆ ຍັງ​ບໍ່​ທັນ​ຮູ້ກັນ​ຄັກ​ເທື່ອ​ກໍ​ຕາມ ແຕ່ເຮົາ​ກໍ​ເວົ້າ​ໄດ້​ວ່າ ການ​ກິນ​ອາຫານ​ອັນໃດ​ທ່ີ​ປ່ອຍ​ໃຫ້​ນ້ຳຕານ​ເຂົ້າ​ໄປ​ໃນ​ເສັ້ນ​ເລືອດ​ຢ່າງວ່ອງ​ໄວ ​ແມ່ນ​ມີ​ສ່ວນ​ພົວພັນກັບ​ການ​ສ່ຽງ​ຢ່າງ​ສູງ​ ກັບການເປັນໂຣກ​ເບົາຫວານ​ປະ​ເພດ 2. ດ່ັງ​ນັ້ນ​ ການ​ເລືອກ​ກິນ​ອາ ຫານ ​ເຊັ່ນ​ເຂົ້າກ້ອງ​ນັ້ນ​ ຈ່ຶງ​ເປັນ​ສ່ິງ​ສຳຄັນ​ໃນ​ການ​ປ້ອງ​ກັນ​ໂຣກດ່ັງກ່າວ.

ດອກ​ເຕີ້ ຊັນ ຊີ້​ໃຫ້​ເຫັນ​ວ່າ ນອກຈາກ​ຜົນ​ປະ​ໂຫຽດອັນ​ໃຫຽ່ຫຼວງ​ທ່ີ​ວ່າ​ນີ້​ແລ້ວ ​ເຂົ້າທ່ີ​ບໍ່​ຫຼ້ອນ​ດີ​ປານ​ໃດ ມັກ​ຈະ​ມີ​ຄຸນ​ປະ​ໂຫຽດ​ໃນ​ດ້ານ​ໂພ​ຊະນາ​ການ​ຫຼາຍ​ກວ່າ​ຈຳພວກ​ທ່ີ​ຫຼ້ອນ​ກວ່າ. ຄວາມ​ຈິງ​ແລ້ວ ການ​ກິນ​ເຂົ້າ​ທ່ີ​ເອົາ​ແຕ່​ແກບ​ອອກ​ຊ່ືໆ ​ເຊັ່ນ​ເຂົ້າ ble ປະ​ເພດທ່ີ​ເອີ້ນ​ໃນ​ພາສາ​ອັງກິດ​ວ່າ whole wheat ແລະ​ເຂົ້າ barley ນັ້ນ ​ແມ່ນ​ອາດ​ສາມາດ​ຫຼຸດຜ່ອນ​ ການ​ເປັນ​ໂຣກ​ເບົາຫວານ​ປະ​ເພດ 2 ​ໄດ້​ຫຼາຍ​ເຖິງ 36% ຊ່ຶງ​ທ່ານ​ຊັນກ່າວ​ວ່າ:

“ຂ້າພະ​ເຈົ້າ​ຄິດ​ວ່າ ການຄົ້ນຄວ້າ​ກ່ຽວ​ກັບ​ເຂົ້າຂອງ​ພວກ​ເຮົາ​ໃນ​ເວລາ​ນີ້ ​ແມ່ນ​ສອດຄ່ອງກັບ​ພາບ​ໂດຍ​ລວມ ທີ່​ວ່າ​ເມື່ອ​ໃດ​ຫາກເປັນ​ໄປ​ໄດ້ ມັນ​ກໍ​ສົມຄວນ​ທ່ີ​ຈະ​ແນະນຳ​ໃຫ້​ຜູ້​ຄົນຫັນ​ມາ​ກິ​ນອາຫານ​ເມັດ ທ່ີ​ເອົາ​ແຕ່​ແກບ​ຊ່ືໆອອກ​ນັ້ນ ​ແທນ​ການ​ກິນ​ທາດ​ຄາ​ໂບຮາ​ຍ​ເດຣດທ່ີ​ລະອຽດ​ອ່ອນ ​ເຊັ່ນ​ເຂົ້າຂາວໆ, ​ເຂົ້າຈ່ີ​ສີຂາວ​ແລະ​ສິ່ງ​ຕ່າງໆ​ທ່ີ​ເພ່ີມ​ນ້ຳຕານ​ນັ້ນ.”

ແຕ່ກໍ​ບໍ່​ເປັນ​ຈ່ັງ​ໂຊກ ທ່ີ​ເຂົ້າກ້ອງແມ່ນຈະບູດ​ເໜົ່າ​ໄວ​ກວ່າ. ຍ້ອນ​ວ່າຊັ້ນ ​ຮຳຂອງ​ມັນເຕັມ​ໄປ​ດ້ວຍ​ນ້ຳມັນ ມັນ​ຈ່ຶງ​ບູດ​ເໜົ່າ​ໄວ ຖ້າ​ບໍ່​ເກັບ​ມ້ຽນ​ໄວ້​ໃນ​ຕູ້​ເຢັນ ຫລື​ມຽນ​ໄວ້​ດີໆ​ໃນ​ຖົງ ບໍ່​ໃຫ້​ລົມ​ເຂົ້າ. ສະ​ນັ້ນມັນ​ຈຶ່ງ​ບໍ່​ແມ່​ນ ອາຫານ​ທີ່​ເໝາະ​ສົມ ສຳລັບ​ປະຊາ​ຄົມທຸກຍາກ​ແລະ​ຢູ່​ຫ່າງ​ໄກ. ​ເພ່ືອ​ຮັບມື​ກັບ​ບັນຫາ​ດ່ັງກ່າວ ສະ​ຖາ​ບັນ​ຄົ້ນຄວ້າ​ເຂົ້າ​ລະຫວ່າງ​ຊາດ​ ຫຼື IRRI ຈ່ຶງພວມ​ປະຕິ​ບັດງານ ເພ່ືອຊອກ​ຫາຊະນິດ​ຂອງ​ເຂົ້າຂາ​ວ ທ່ີ​ປ່ອຍ​ໃຫ້​ແປ້ງ​ຂອງ​ມັນເຊ່ືອມ​ຊືມ​ເຂົ້າ​ໃນ​ເສ້ນ​ເລືອດຢ່າງຊ້າ​ໆ. ທ່ານ​ນາງ Melisa Fitzgerald ນັກ​ຄົ້ນຄວ້າ​ປະຈຳ​ສະ​ຖາ​ບັນ IRRI ກ່າວ​ວ່າ ການ​ຊອກ​ຄົ້ນ​ຫາ​ຊະນິດຂອງ​ເຂົ້າ ​ທ່ີ​ຄວບ​ຄຸມການ​ເຊ່ືອມ​ຊືມຂອງ​ທາດ​ແປ້ງ​ນັ້ນ ກໍ​ແມ່ນ​ເປັນບາດກ້າວ​ອັນ​ທຳ​ອິດ ໄປ​ສູ່​ການ​ປະດິດ​ຄິດ​ສ້າງ​ອາຫານ​ເມັດ​ ທ່ີ​ຜູ້​ຄົນ​ຈະ​ຮັບ​ເອົາ​ໄດ້ ​ໃຫ້​ເປັນ​ພາກ​ສ່ວນຂອງ​ອາຫານ​ການ​ກິນ​ຂອງ​ພວກ​ເຂົາ​ເຈົ້າ.

XS
SM
MD
LG