ທຳນຽບຂາວກ່າວໃນວັນພະຫັດວານນີ້ວ່າ ພວກເຮົາກຳລັງຕິດຕາມເບິ່ງຄຳຮ້ອງຮຽນຕໍ່ອົງການການຄ້າໂລກ (WTO) ຂອງ ຈີນ ທີ່ກ່າວຫາ ສະຫະລັດວ່າ ໄດ້ທໍາການ “ກ່າວຫາແບບບິດເບືອນ ແລະບໍ່ມີມູນຄວາມຈິງ” ກ່ຽວກັບບົດບາດຂອງ ຈີນ ໃນການຄ້າ ຢາ ເຟນຕານອລ ເພື່ອເປັນເຫດຜົນໃນການເກັບພາສີຂອງສິນຄ້າຈາກ ຈີນ.
ຄຳຮ້ອງດັ່ງກ່າວ ມີຂຶ້ນໃນວັນພຸດແລ້ວນີ້, ພຽງນຶ່ງມື້ລຸນຫຼັງປະທານາທິບໍດີສະຫະລັດ ທ່ານ ດໍໂນລ ທຣຳ ເພີ້ມອັດຕາພາສີຕໍ່ສິນຄ້າຈາກ ຈີນ ຂຶ້ນເປັນ 1 0 ເປີເຊັນ. ທຳນຽບຂາວກ່າວວ່າ ພາສີໃໝ່ຕໍ່ສິນຄ້າຂອງ ຈີນ ແມ່ນແນ່ເປົ້າໝາຍໃສ່ເພື່ອຢຸດການຫຼັ່ງໄຫຼຂອງຢາ ເຟນຕານອລ, ຢາຝິ່ນ ແລະສານເຄມີຕົ້ນຂອງຢາດັ່ງກ່າວ.
ຈີນ ກ່າວວ່າ ຕົນຈະຕອບໂຕ້ຄືນດ້ວຍການຂຶ້ນພາສີຕໍ່ສິນຄ້າ ສະຫະລັດ ບາງປະເພດ, ໂດຍເລີ້ມແຕ່ວັນທີ 10 ກຸມພາ ນີ້ເປັນຕົ້ນໄປ, ລວມທັງພາສີ ໃນການນຳເຂົ້າຖ່ານຫີນ ແລະອາຍແກັສທຳມະຊາດ 15 ເປີເຊັນ, ພ້ອມກັນນັ້ນ 10 ເປີເຊັນ ສໍາລັບພາສີນໍາເຂົ້ານ້ຳມັນ, ອຸປະກອນການກະເສດ, ຍານພາຫະນະທີ່ປ່ອຍອາຍພິດສູງ ແລະ ລົດກະບະ. ຈີນ ຍັງໄດ້ປະຕິບັດຂໍ້ຈໍາກັດໃນການສົ່ງອອກແຮ່ທາດທີ່ສໍາຄັນບາງປະເພດໃນທັນທີ ແລະເລີ້ມການສືບສວນການຜູກຂາດຕໍ່ບໍລິສັດເທັກໂນໂລຈີຍັກໃຫຍ່ຂອງ ສະຫະລັດ ເຊັ່ນ ບໍລິສັດ Google.
ໃນການຍື່ນເອກະສານຕໍ່ອົງການ WTO, ຈີນ ກ່າວວ່າ ມາດຕະການພາສີຂອງສະຫະລັດ ແມ່ນການ “ເລືອກປະຕິບັດ ແລະຂັດຂວາງ,” ເຊິ່ງເປັນການລະເມີດຕໍ່ກົດລະບຽບການຄ້າລະຫວ່າງປະເທດ. ປັກກິ່ງ ໄດ້ທໍາການຮ້ອງຂໍໃຫ້ມີການຫາລືກັບ ວໍຊິງຕັນ.
ຄໍາຮຽກຮ້ອງຂອງ ຈີນ ຈະເລີ້ມຕົ້ນດ້ວຍຂັ້ນຕອນພາຍໃນວຽກງານການອຸທອນຂອງອົງການ WTO, ເຊິ່ງມີອໍານາດສຸດທ້າຍໃນການຍຸຕິຂໍ້ພິພາດກັນ. ເຈົ້າໜ້າທີ່ທຳນຽບຂາວຄົນນຶ່ງກ່າວຕໍ່ VOA ວ່າ ລັດຖະບານກຳລັງຕິດຕາມກວດກາເອກະສານຂອງ ປັກກິ່ງ, ແຕ່ບໍ່ໄດ້ໃຫ້ລາຍລະອຽດໃດໆເພີ້ມເຕີມ.
ບັນດານັກວິເຄາະກ່າວວ່າ ການເຄື່ອນໄຫວຂອງ ປັກກິ່ງ ເປັນພຽງການສະແດງເທົ່ານັ້ນ ແລະຈະບໍ່ໄດ້ຮັບການຫຼຸດຜ່ອນຫຼາຍປານໃດ. ຄະນະກໍາມະການການອຸທອນ ຖືກໂຈະການເຮັດວຽກຢ່າງຫຼວງຫຼາຍ ລຸນຫຼັງຄະນະລັດຖະບານຊຸດທຳອິດຂອງ ທ່ານ ທຣໍາ ໃນປີ 2019 ເຄື່ອນໄຫວຄັ້ງທໍາອິດ ເພື່ອສະກັດກັ້ນການແຕ່ງຕັ້ງຜູ້ພິພາກສາສານອຸທອນ, ເນື່ອງຈາກຖືວ່າ ເປັນການໃຊ້ອໍານາດຕຸລາການເກີນຂອບເຂດຂອງສານ. ຄະນະລັດຖະບານຂອງ ທ່ານ ໄບເດັນ ຍັງຄົງສືບຕໍ່ດໍາເນີນນະໂຍບາຍດັ່ງກ່າວນີ້.
ທ່ານ ເຈັບຟຣີ ຊອດທ໌ (Jeffrey Schott), ຜູ້ຊ່ວຍອາວຸໂສຂອງສະຖາບັນເສດຖະກິດສາກົນ Peterson ກ່າວວ່າ ຈີນ ຮັບຮູ້ວ່າອົງການ WTO ຈະບໍ່ກົດດັນຕໍ່ ສະຫະລັດ ຫຼາຍ ເນື່ອງຈາກວໍຊິງຕັນມີຄວາມສາມາດເຕັມອັດຕາ ທີ່ຈະຂັດຂວາງຂັ້ນຕອນຕ່າງໆທາງດ້ານກົດໝາຍຢູ່ທີ່ນັ້ນ.
ຟໍຣັມສະແດງຄວາມຄິດເຫັນ