ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ຄວາມຄືບໜ້າ ໃນການສ້າງວັດລາວ ທີ່ປະເທດອິນເດຍ


ພາບຈຳລອງກຸຕິຫໍພັກສົງ ຂອງວັດລາວພຸດທະຄະຍານາໆຊາດ ທີ່ເມືອງກາຍາ ລັດພິຫານ ປະເທດອິນເດຍ
ພາບຈຳລອງກຸຕິຫໍພັກສົງ ຂອງວັດລາວພຸດທະຄະຍານາໆຊາດ ທີ່ເມືອງກາຍາ ລັດພິຫານ ປະເທດອິນເດຍ

ການສ້າງ​ວັດ​ລາວ​ພຸດທະ​ຄະ​ຍານາໆ​ຊາດ ​ທີ່​ປະ​ເທດ​ອິນ​ເດຍ ຊຶ່ງ​​ເປັນວັດ​ລາວ​ແຫ່ງ​ທຳ​ອິດ​ໃນ​ດິນແດນພຸດທະ​ພູມທີ່ໄດ້​ເລີ່​ມລົງມື​ກໍ່ສ້າງມາ​ແຕ່​ທ້າຍ​ປີ 2010 ນັ້ນ ມີ​ຄວາມ​ຄືບ​ໜ້າ​ໄປ​ຮອດ​ຂັ້ນ​ໃດ​​ ແລະຈະແລ້ວ​ສຳ​ເລັດ​ໃນ​ປີ​ໃດ​ນັ້ນ ​ໄພສານ ​ມີ​ລາຍງານ​ກ່ຽວ​ກັບ​ເລື່ອງນີ້ມາ​ສະ​ເໜີ​ທ່ານ​ ໃນ​ລາຍການ​ຊາວ​ໃນຕ່າງ​ແດນ​ຂອງ​ເຮົາ​ແລງ​ມື້ນີ້​ ໃນ​ອັນດັບ​ຕໍ່​ໄປ

ການ​ສ້າງວັດ​ລາວ​ພຸດທະ​ຄະ​ຍານາໆ​ຊາດທີ່​ເມືອງ​ກາຍາ​ ລັດ​ພິຫານ​ໃນ ປະ​ເທດ​ອິນ​ເດຍ ຊຶ່ງ​ເປັນ​ສະຖານທີ່ຕັດສະຣູ້ຂອງ​ພະພຸດທະ​ເຈົ້າເມື່ອ 2554 ກ່ອນ​ນັ້ນໄດ້​ເລີ່​ມຂຶ້ນ​ແລ້ວໃນວັນ​ທີ 25 ພະຈິກ​ທ້າຍ​ປີ 2010 ໂດຍ​ມີ​ພະສົງ​ຈາກ​ວັດ​ຕ່າງໆ ໃນ​ເມືອງ​ກາຍາ 39 ອົງ​ ໄປຮ່ວມ​ສູດໄຊ​ຍະ​ມຸງ​ຄາຖາ ເພື່ອ ການເທ​ເສົາເລີ່ມຕົ້ນການກໍ່ສ້າງ​ກຸດຕິ​ທີ່​ພັກ​ສົງ .

ຄວາມ​ໄຝ່ຝັນ​ໃນ​ການ​ຢາກ​ມີ​ວັດ​ລາວ​ຢູ່​ໃນ​ດິນ​ແດນ​ພຸດທະ​ພູມນັ້ນ ​ແມ່ນມີມາ​ເປັນ​ເວລາ​ດົນ​ນານ​ສົມ​ແລ້ວ ດັ່ງ​ທີ່ພະ​ອາຈານມະຫາຈັນ​ດາພອນ ຈັກກະວາ​ໂຣຮອງ​ເຈົ້າອາວາດ ​ວັດ​ລາວ​ພຸດ​ທະ​ວົງ ພ້ອມ​ທັງ​ເປັນ​ປະທານອຳນວຍ​ການ​ບໍລິຫານຂອງ​ຄະນະ​ສົງ​ລາວ​ໃນ​ສະຫະລັດ ຊຶ່ງ​ເປັນຜູ້ກຳກັບແລະຜູ້ປະສານ​ໃນ​ໂຄງການ​ສ້າງ​ວັດ​ລາວພຸດທະ​ຄະ​ຍານາໆ​ຊາດກ່າວ​ກ່ຽວ​ກັບ​ເລື່ອງ​ນີ້ວ່າ:

// ສຽງ //

ລຸນ​ຫຼັງທີ່​ໄດ້​ກັບ​ມາ​ຈາກ​ການ​ໄປ​ສັງ​ເວຫຼືກາບ​ໄຫວ້ສະຖານ​ທີ່​ພະ​ພຸດທະ​ເຈົ້າ ປະສູດ ຕັດສະຮູ້ ຊົງ​ສະ​ແດງ​ທຳ ​ແລະ​ປະຣິນິພານ​ແລ້ວ ພະ​ອາຈານໃຫຍ່ ມະຫາ​ບຸນ​ມີ ກິດ​ຕິ​ທຳ​ມະ​ວັນ​ໂນ ​ເຈົ້າອາວາດ​ວັດ​ລາວ​ພຸດ​ທະ​ວົງໃນ​ຂົງ​ເຂດ​ນະຄອນຫຼວງວໍ​ຊິງ​ຕັນ ພ້ອມ​ທັງ​ເປັນ​ປະມຸກ​ສົງໃນ​ສະຫະລັດ​ອະ​ເມຣິກາ ກໍ​ໄດ້​ມອບ​ໝາຍ​ໃຫ້ ພະ​ອາຈານມະຫາ​ຈັນ​ດາພອນໄປ​ສຶກສາຄົ້ນຄວ້າ​ວ່າເຮັດ​ວິທີ​ໃດຈຶ່ງ​ຈະ​ສາມາດເຮັດ​ໃຫ້​ຄວາ​ມ​ໄຝ່ຝັນ​ໃນ​ການ​ຢາກ​ມີ​ວັດ​ລາວແຫ່ງທໍາ​ອິດຢູ່​ໃນດິນ​ແດນ​ພຸດທະ​ພູມ​ເກີດ​ເປັນຄວາມ​ຈິງ​ຂຶ້ນມາ​ໄດ້.

ພະ​ອາຈານ​ມະຫາ​ຈັນ​ດາ​ພອນ​ກ່າວ​ວ່າ ຫຼັງຈາກ​ທີ່​ໄດ້​ຮັບ​ມອບ​ໝາຍ ​ຈາກ​ພະອ​າຈານ​ໃຫຍ່ ​ມະຫາ​ບຸນ​ມີ ກິດ​ຕິ​ທຳ​ມະ​ວັນ​ໂນ​ແລ້ວ​ເພິ່ນ​ກໍ​ໄດ້​ໄປ​ສຶກສາຄົ້ນຄວ້າ​ກ່ຽວ​ກັບ​ການ​ສ້າງວັດ​ລາວ​ ທີ່​ເມືອ​ງກາຍາ. ການ​ຕັ້ງວັດ​ລາວ​ທີ່​ລັດພິຫານ​ໃນ​ປະ​ເທດອິນ​ເດຍ​ເລີ່​ມຕົ້ນຂຶ້ນ ດ້ວຍ​ການ​ເຊົ່າ​ເຮືອນ​ຫຼັງນຶ່ງ ທີ່​ມີ 12 ຫ້ອງ ນອນ​ໃນ​ປີ 2008 ຕິດຕາມ​ດ້ວຍ​ການ​ກໍ່ຕັ້ງສະມາຄົມ​ວັດ​ລາວ​ພຸ​ດທະ​ຄະ​ຍານາໆ​ຊາດ​ໃນ​ປີ 2009 ຊຶ່ງ​ຕາມ​ລະບຽບ​ການ​ຂອງ​ປະ​ເທດ​ອິນ​ເດຍ​ແລ້ວຕ້ອງ​ມີຊາວ​ອິນເດຍ ຢ່າງ​ນ້ອຍ 3 ຄົນ​ເຂົ້າຮ່ວມນຳ ບໍ່​ວ່າ​ຈະ​ເປັນ​ການຈັດຕັ້ງວັດ ສະມາ​ຄົມ ຫຼືມູນ​ນິທິ​ໃດໆ​ກໍ​ຕາມ. ສະມາຄົມ​ວັດ​ລາວ​ພຸດທະ​ຄະ​ຍານາໆ​ຊາດ ໃນເວລາ​ນີ້ມີ​ທ່ານ S.K. Sing ​ເປັນ​ເລຂານຸການ.

ພະ​ອາຈານ​ມະຫາ​ຈັນ​ດາ​ພອນ​ກ່າວ​ວ່າ ລຸນ​ຫຼັງທີ່​ໄດ້​ມີ​ການ​ກໍ່ຕັ້ງສະມາຄົມ​ວັດລາວພຸດທະ​ຄະ​ຍານາໆຊາດ ເປັນ​ທີ່​ຮຽບຮ້ອຍແລ້ວ ກໍ​ໄດ້​ມີ​ການ​ຕົກລົງ ​ຊື້ທີ່​ດິນ 1 ​ໄຣ່​ (1600 ແມັດມົນ ທົນ) ແລະ​ຕໍ່​ມາ​ໃນ​ທ້າຍ​ປີ 2010 ກໍ​ໄດ້​ມີ​ການ​ເຊັນ​ສັນຍາ​ສ້າງ​ກຸດຕິ​ທີ່​ພັກ​ສົງ ກັບ​ບໍລິສັດ​ Techno Infrastructure ​ໂດຍ​ມີ​ທ່ານ Kamal Yusuf Ansara ​ເປັນວິສະວະກອນ​ໃຫຍ່​ຜູ້​ອອກ​ແບບ ​ແລະ​ວິສະວະກອນ A.J. Sing ​ເປັນ​ຜູ້​ກຳກັບ​ໃນ​ການ​ກໍ່​ສ້າງ.

ອີງ​ຕາມ​ໂຄງການກໍ່ສ້າງ​ແລ້ວ ວັດ​ລາວ​ພຸດທະ​ຄະ​ຍານາໆ​ຊາດ ​ຈະ​ປະກອບ​ດ້ວຍ​ກຸດຕິຫໍ​ພັກ 34 ຫ້ອງ ຊຶ່ງ​ໃນ​ນັ້ນຈະ​ມີ​ຫ້ອງ​ປະກອບ​ພິທີ​ທາງ​ສາສະໜາ ທີ່​ສາມາດ​ບັນຈຸ​ຜູ້ຄົນ​ໄດ້ 100 ຄົນ ຮວມຢູ່​ນຳ ​ປະຕູ​ໂຂງ ພັດທະ​ສີມາ ແລະ​ພະທາດ​ຫຼວງຈຳລອງ. ພະ​ອາຈານ​ມະຫາ​ຈັນ​ດາ​ພອນ​ກ່າວ​ວ່າ ​ເຖິງ​ແມ່ນ​ການ​ສ້າງສາ ມີ​ຂຶ້ນຢູ່​ທີ່​ປະ​ເທດ​ອິນ​ເດຍກໍ​ຈິງ ​ແຕ່​ກໍ​ຈະ​ພະຍາຍ​າມຮັກສາ​ໄວ້ ຊຶ່ງ​ຄວາມ​ເປັນ​ເອກ​ກະ​ລັກ ທາງ​ດ້ານ​ສິນລະປະຂອງ​ລາວ​. ພະ​ອາຈານ​ຈັນ​ດາ​ກ່າວ​ກ່ຽວ​ກັບ​ເລື່ອງ​ນີ້ວ່າ:

// ສຽງ //

ເພື່ອ​ໃຫ້ການ​ຖອດ​ແບບ​ໃນ​ການຈຳລອງ​ພັດທະ​ສິມາ​ຈາກວັດ​ຊຽງ​ທອງ​ແລະ​ພະທາດຫຼວງ​ ໃກ້​ຄຽງ​ກັບ​ຄວາມ​ເປັນ​ຈິງ ທ່ານ Kamal Yusuf Ansara ວິສະວະກອນ​ຜູ້​ອອກ​ແບບ ກໍ​ໄດ້​ເດີນທາງ​ໄປ​ຍັງ​ນະຄອນຫຼວງພະ​ບາງແລະວຽງ​ຈັນ ກ່ອນ​ການ​ສ້າງ​ວັດ​ລາວທີ່​ເມືອງ​ກາຍາຈະ​ເລິ່ມຂຶ້ນ.

ນັບ​ແຕ່​ໄດ້​ຊື້ທີ່​ດິນ​ແລະ​ເລີ່​ມລົງມື​ກໍ່ສ້າງມາ​ເຖິງ​ປັດຈຸບັນນີ້​ໃຊ້​ເງິນ​ໄປ​ແລ້ວປະມານ 300,000
ໂດ​ລາຊຶ່ງ​ພະ​ອາຈານ​ມະຫາ​ຈັນ​ດາ​ພອນ ​ກ່າວຊີ້ແຈງກ່ຽວກັບຄ່າໃຊ້ຈ່າຍສຳລັບແຜນການກໍ່
ສ້າງທັງໝົດສູ່ຟັງ​ວ່າ​:

// ສຽງ //

ທ່ານ Kamal Yusuf Ansara ຊຶ່ງ​ເປັນ​ວິສະວະກອນ​ຜູ້​ອອກ​ແບບ​ວັດ​ລາວພຸດທະ​ຄະ​ຍາ
ນາໆ​ຊາດ​ກ່າ​ວວ່າ ການ​ກໍ່ສ້າງ​ກຸດຕິຫໍພັກມາ​ຮອດ​ປັດຈຸບັນ​ນີ້ແມ່ນ​ໄດ້ດຳ​ເນີນ​ໄປ​ດ້ວຍ​ດີ.

// ສຽງ //

ທ່ານ Ansara ​ເວົ້າວ່າ ອາຄານ​ຫຼັງນີ້​ແມ່ນ​ໄດ້​ຮັບ​ການ​ອອກ​ແບບ​ໃຫ້​ໄດ້​ຕາມ​ມາດຕະຖານ
ຂອງ​ອິນ​ເດຍແລະ​ແມ່ນ​ຫຍັງ​ກໍ​ຕາມ​ທີ່​ກົດໝາຍ​ບັງຄັບເຊັ່ນຂ່າວ ຂາງ​ແລະ​ຂື່ທ່ານ AJ ແມ່ນ
ໄດ້​ກະທຳ​ຢ່າງ​ຖືກຕ້ອງ​ຕາມທີ່​ຂ້າພະ​ເຈົ້າ​ໄດ້​ອອກແບບ​ໄປ​ ດັ່ງນັ້ນຂ້າພະ​ເຈົ້າເຫັນ​ວ່າຄຸນນະ
ພາ​ບ​ໃນ​ການ​ກໍ່ສ້າງ​ແມ່ນ​ດຳ​ເນີນ​ໄປໄດ້ດີຫຼາຍ​ແລະ​ການ​ເຮັດ​ວຽກ​ກໍ​ມີ​ຄຸນ​ນະພາ​ບດີ.

ສ່ວນທ່ານ S.K Singh ​ເລຂາ​ນຸການ​ຂອງ​ວັດ​ລາວ​ພຸດທະ​ຄະ​ຍານາໆຊາດ ກ່າວ​ວ່າ ການ​
ສ້າງ​ກຸດຕິ​ຫໍ​ພັກ​ສົງ​ຈະຕ້ອງ​ແລ້ວສຳ​ເລັດພາຍ​ໃນ​ປີ 2012 ຊຶ່ງທ່ານ​ກ່າວ​ກ່ຽວ​ກັບ​ເລື່ອງ​ນີ້ວ່າ:

// ສຽງ //

ທ່ານ S.K Singh ​ເວົ້າວ່າ ການ​ກໍ່ສ້າງ​ໄດ້​ເລີ່ມຂຶ້ນ​ແລ້ວ​ແຕ່​ວັນ​ທີ 2 ມັງກອນມາ​ຈົນ​ຮອດ
ປັດຈຸບັນ ວຽກ​ງານ​ໄດ້​ດຳ​ເນີນ​ໄປ​ຢ່າງ​ວ່ອງ​ໄວຄວາມ​ຮັບຜິດຊອບກ່ຽວ​ກັບ​ເລື່ອງ​ສັນຍາແມ່ນ​
ເຮັດ​ກັບ​ບໍລິສັດ​ທີ່​ມີ​ຊື່​ສຽງບໍລິສັດ​ນຶ່ງ ຈາກ​ເມືອງ​ປັກນາ ພວກ​ເຂົາ​ເຈົ້າ​ເຮັດ​ວຽກໃນ​ເຂດ​ເມືອງ​
ປັກ​ນາແລະ​ພາລະ​ນະ​ສີ ບໍລິສັດກໍ່ສ້າງ Techno Infrastructure ​ແລະ​ພວກ​ເຮົາມີ​ສັນຍາ
ເພື່ອ​ສ້າງ​ວັດ​ຫຼັງນີ້ພາຍ​ໃນ​ໄລຍະ​ເວລາ​ນຶ່ງ​ປີແລະ 2 ​ເດືອນ​ຊຶ່ງທັງ​ໝົດ​ແລ້ວ​ເປັນ​ເກືອບ 15
ເດືອນພວກ​ເຮົາ​ຕ້ອງ​ສ້າງ​ວັດ​ນີ້​ໃຫ້​ແລ້ວ.

ການ​ກໍ່ສ້າງ​ວັດ​ລາວ​ພຸດທະ​ຄະ​ຍານາໆ​ຊາດ​ ທີ່​ໄດ້​ເລີ່​ມມາ​ແຕ່​ທ້າຍ​ປີ 2010 ນັ້ນຈະດຳ​ເນີນ​
ໄປ​ເປັນ​ຂັ້ນໆ ​ແລະ​ຈະ​ແລ້ວ​ສຳ​ເລັດທັງໝົດ ພາຍໃນ​ປີ 2015 ຊຶ່ງ​ພະ​ອາຈານມະຫາ​ຈັນ​ດາ​
ພອນ ກ່າວຊີ້​ແຈງ​ເພີ່ມ​ຕື່ມກ່ຽວ​ກັບ​ເລື່ອງ​ນີ້ວ່າ:

// ສຽງ //

ຕໍ່​ຄໍາຖາມ​ທີ່​ວ່າ ​ເປັນ​ຫຍັງ​ຈຶ່ງ​ຕ້ອງ​ໄປ​ສ້າງ​ວັດ​ລາວ​ເມືອ​ງກາຍາ ປະ​ເທດ​ອິນ​ ​ເດຍ​ໃນ​ເມື່ອ​ວ່າ
ການ​ເຜີຍ​ແຜ່​ພະ​ພຸດທະ​ສາສະໜາ​ຢູ່​ໃນ​ອະ​ເມ​ລິ​ກາ​ກໍ​ເປັນ​ພາລະ​ກິດ​ທີ່​ໜັກໜ່ວງ​ຢູ່​ແລ້ວ ພະ
ອາຈານ​ມະຫາ​ຈັນ​ດາ​ພອນຮອງ​ເຈົ້າອາວາດ​ວັດ​ລາວ​ພຸດ​ທະ​ວົງພ້ອມ​ທັງ​ເປັນ​ປະທານອຳນວຍ
ການ​ບໍລິຫານຂອງ​ຄະນະ​ສົງ​ລາວ​ໃນ​ສະຫະລັດ​ໃຫ້​ເຫດຜົນ​ວ່າ:

// ສຽງ //

ວັດ​ລາວ​ພຸດທະ​ຄະ​ຍານາໆ​ຊາດ​ເກີດ​ຂຶ້ນ​ໄດ້ກໍ​ຍ້ອນ​ການ​ບໍລິຈາກ​ສົມທົບ​ທຶນ​ຂອງ​ຊາວ​ລາວ​
ທັງຫຼາຍທັງຢູ່​ໃນ​ແລະ​ຕ່າງປະ​ເທດຕະຫຼອດທັງ​ຜູ້​ມີ​ຈິດ​ໃຈ​ໃສ​ສັດທາ​ຈາກ​ທົ່ວ​ໂລກທັງຫຼາຍ.

// ສຽງ //

ສຳລັບການສະ​ເຫຼີມສະຫຼອງຕ່າງໆ​ນັ້ນຈະ​ໄດ້​ຈັດ​ຂຶ້ນ​ເປັນ​ຮອບໆ ​ແຕ່​ການສະ​ເຫຼີມສະຫຼອງ​
ເປີດ​ວັດ​ລາວ​ພຸດທະ​ຄະ​ຍານາໆ​ຊາດຢ່າງ​ເປັນ​ທາງ​ການນັ້ນ ຈະ​ໄດ້ຈັດ​ຂຶ້ນ​ໃນ​ທ້າຍ​ປີ 2013. ​
ພະ​ອາຈານ​ມະຫາ​ຈັນ​ດາ​ພອນກ່າວຊີ້​ແຈງ​ເພີ່ມ​ຕື່ມ​ວ່າ:

// ສຽງ //

ເມື່ອສ້າງສຳເລັດວັດລາວທີ່ເມືອງກາຍາ ລັດພິຫານ ປະເທດອິນເດຍ ກໍຈະເປັນວັດລາວແຫ່ງ
ທຳອິດຢູ່​ໃນ​ດິນແດນ​ພຸດທະ​ພູມ ຊຶ່ງເປັນສັງ​ເວ​ສະ​ນີຍະສະ​ຖານອັນ​ສັກສິດ​ແລະ​ເປັນ​ມໍ​ລະ​ດົກ
ຂອງ​ໂລກນໍາດ້ວຍ.


XS
SM
MD
LG