ລິ້ງ ສຳຫລັບເຂົ້າຫາ

logo-print

ເສດ​ຖະ​ກິດ​ ໃນນະ​ຄອນຫຼວງ ວຽງ​ຈັນ ຂ​ະ​ຫຍາຍ​ຕົວ​​ເຖິງ 9.58 ເປີ​ເຊັນ ແຕ່​ບັນ​ດາ​ໂຄງ​ການ​ ພັດ​ທະ​ນາ​ ໃນ​ພາ​ກ​ລັດ ​ກັບ​ມີ​ຄຸນ​ນະ​ພາບ​ຕ່ຳ


ກຳ​ມະ​ກອນ​ລາວ ກຳ​ລັງ​ສ້ອມ​ແປງ​ຖະ​ນົນ, ແຂວງຫຼວງ​ພະ​ບາງ.

ເສດ​ຖະ​ກິດ​ໃນ​ເຂດ​ນະ​ຄອນຫຼວງ ວຽງ​ຈັນ ຂ​ະ​ຫຍາຍ​ຕົວ​ເພີ່ມ​ຂຶ້ນ​ເຖິງ 9.58 ເປີ​ເຊັນ ແຕ່​ບັນ​ດາ​ໂຄງ​ການ​ພັດ​ທະ​ນາ​ໃນ​ພາ​ກ​ລັດ​ກັບ​ມີ​ຄຸນ​ນະ​ພາບ​ຕ່ຳ ເພາະ​ການ​ທຸ​ຈະ​ລິດ ແລະ ການ​ຈັດ​ຕັ້ງ​ປະ​ຕິ​ບັດ​ທີ່​ດ້ອຍ​ປະ​ສິດ​ທິ​ພາບ​ຢ່າງ​ຍິ່ງ.


ທ່ານ ສິນ​ລະ​ວົງ ຄຸດ​ໄພ​ທູນ ເຈົ້າ​ຄອງ​ນະ​ຄອນຫຼວງ ວຽງ​ຈັນ ຖະ​ແຫຼງວ່າ​ໃນ​ປີ 2019 ເສດ​ຖະ​ກິດ​ຂອງ​ນະ​ຄອນຫຼວງວຽງ​ຈັນ​ໄດ້​ຂະ​ຫຍາຍ​ຕົວ​ເພີ່ມ​ຂຶ້ນ​ໃນ​ອັດ​ຕາ​ສະ​ເລ່ຍ 9.58 ເປີ​ເຊັນ​ທຽບ​ໃສ່​ປີ 2018 ໂດຍ​ມີ​ມູນ​ຄ່າ​ຜະ​ລິດ​ຕະ​ພັນ​ພາຍ​ໃນ (GDP) ເກີນກວ່າ 48,865 ຕື້​ກີບ ຄິດ​ສະ​ເລ່ຍ​ເປັນ​ລາຍ​ຮັບ​ຂອງ​ປະ​ຊາ​ຊົນ ລາວ ຢູ່​ໃນ​ເຂດ​ສະ​ຄອນຫຼວງວຽງ​ຈັນ ໄດ້​ເຖິງ 5,699 ຕໍ່​ຄົນ​ຕໍ່​ປີ ສ່ວນ​ໂຄງ​ປະ​ກອບ​ດ້ານ​ເສດ​ຖະ​ກິດ​ນັ້ນ​ກໍ​ປາ​ກົດ​ວ່າ​ພາກ​ອຸດ​ສາ​ຫະ​ກຳ ແລະ ຫັດ​ຖະ​ກຳ​ໄດ້​ຂະ​ຫຍາຍ​ຕົວ​ເພີ່ມ​ຂຶ້ນ​ເຖິງ 12.79 ເປີ​ເຊັນ ແລະ ກວມ​ເອົາ 50.28 ເປີ​ເຊັນ​ຂອງ GDP ໃນ​ຂະ​ນະ​ທີ່​ພາກ​ບໍ​ລິ​ການ​ຂະ​ຫຍາຍ​ຕົວ​ເພີ່ມ​ຂຶ້ນ 9.3 ເປີ​ເຊັນ ແລະ ພາກ​ກະ​ສິ​ກຳ-ປ່າ​ໄມ້​ຂະ​ຫຍາຍ​ຕົວ​ເພີ່ມ​ຂຶ້ນ 3.54 ເປີ​ເຊັນ ໂດຍກວມ​ເອົາ 34.43 ເປີ​ເຊັນ ແລະ 13.81 ເປີ​ເຊັນ​ຂອງ GDP ຕາມ​ລຳ​ດັບ.

ສ່ວນ​ໃນ​ແຜນ​ການ​ພັດ​ທະ​ນາ​ປີ 2020 ອຳ​ນາດ​ການ​ປົກ​ຄອງ​ເຂດ​ນະ​ຄອນຫຼວງວຽງ​ຈັນ ໄດ້​ວາງ​ຄາດ​ໝາຍ​ການ​ຂະ​ຫຍາຍ​ຕົວ​ທາງ​ເສດ​ຖະ​ກິດ​ໄວ້​ທີ່​ອັດ​ຕາ​ສະ​ເລ່ຍ​ຕ່ຳ​ກວ່າ 9.5 ເປີ​ເຊັນ​ຊຶ່ງ​ຈະ​ເຮັດ​ໃຫ້ GDP ມີ​ມູນ​ຄ່າ​ລວມ​ເກີນກວ່າ 54,080 ຕື້​ກີບ​ທີ່​ຖົວ​ສະ​ເລ່ຍ​ເປັນ​ລາຍ​ຮັບ​ຂອງ​ປະ​ຊາ​ຊົນ ລາວ ໃນ​ນະ​ຄອນຫຼວງວຽງ​ຈັນ​ໄດ້​ເຖິງ 6,120 ໂດ​ລາ​ຕໍ່​ຄົນ​ໃນ​ປີ 2020 ຫາກ​ແຕ່​ກໍ​ບໍ່​ແມ່ນ​ເລື່ອງ​ງ່າຍ​ເພາະ​ນອກ​ຈາກ​ຈະ​ເປັນ​ຜົນ​ກະ​ທົບ​ຈາກ​ການ​ລະ​ບາດ​ຂອງ​ເຊື້ອ​ໄວ​ຣັ​ສ​ໂຄ​ໂຣ​ນາ ຫຼື Covid-19 ແລ້ວ ການ​ນຳ​ໃຊ້​ງົບ​ປະ​ມານ​ທີ່ບໍ່​ມີ​ປະ​ສິດ​ທິ​ພາບ ແລະ ມີ​ການ​ທຸ​ຈະ​ລິດ​ເກີດ​ຂຶ້ນ​ຢ່າງກວ້າງ​ຂວາງ​ໃນ​ບັນ​ດາ​ໂຄງ​ການ​ພັດ​ທະ​ນາ​ທີ່​ລັດ​ລົງ​ທຶນ​ນັ້ນ​ກໍ​ຖື​ວ່າ​ເປັນ​ສາ​ເຫດ​ທີ່​ສຳ​ຄັນ​ທີ່​ເຮັດ​ໃຫ້​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ໂຄງ​ການ​ພັດ​ທະ​ນາ​ຕ່າງໆ​ບໍ່​ໄດ້​ຕາມ​ເປົ້າ​ໝາຍ​ທີ່​ວາງ​ເອົາ​ໄວ້ ທັງ​ຍັງ​ເຮັດ​ໃຫ້​ລັດ​ຖະ​ບານ ສູນ​ເສຍ​ລາຍ​ຮັບ​ໄປ​ຢ່າງຫຼວງຫຼາຍ ຂະ​ນະ​ທີ່​ພະ​ນັກ​ງານ​ຂອງ​ລັດ​ມີ​ຖາ​ນະ​ຮັ່ງ​ມີ​ຂຶ້ນ​ດັ່ງ​ທີ່ ທ່ານ ສາຍ​ທອງ ແກ້ວດວງ​ດີ ສະ​ມາ​ຊິກ​ສະ​ພາ​ແຫ່ງ​ຊາດ ລາວ ຈາກ​ເຂດ​ນະ​ຄອນຫຼວງ ວຽງ​ຈັນ ຢືນ​ຢັນ​ວ່າ

"ກົດ​ໝາຍ​ເລີ່ມ​ເຂັ້ມ​ແຂງ ປະ​ຊາ​ຊົນ​ເລີ່ມ​ນັບ​ຖື​ກົດ​ໝາຍ​ຜູ້​ປະ​ກອບ​ການ 2 ແສນກວ່າ​ລາຍ ນັບ​ຖື​ກົດ​ໝາຍ​ເງິນ​ຖືກ​ເຂົ້າ​ມາ​ລັດ ແລະ ເສຍ​ຢູ່​ກາງ​ທາງ​ຍ້ອນ​ໜ່ວຍ​ງານ​ຂອງ​ລັດ​ເອົາ​ເງິນ​ໄປ​ຝາດ​ທະ​ນາ​ຄານ​ລັດ ແລະ ເອົາ​ໄປ​ປັນ​ກັນ​ເຂົ້າ​ຖົງ​ຕົນ​ເອງ ເຫຼືອ​ໜ້ອຍ​ນຶ່ງ​ສົ່ງ​ເຂົ້າ​ລັດ ຄັນ​ເປັນ​ແນວ​ນັ້ນ​ເສດ​ຖະ​ກິດ​ຂອງ​ປະ​ເທດ​ຂະ​ຫຍາຍ​ຕົວ​ຂຶ້ນ ປ​ະ​ຊາ​ຊົນ ຜູ້​ປະ​ກອບ​ການ​ເສຍ​ອາ​ກອນ​ພາ​ສີ​ໃຫ້​ລັດ​ຢ່າງ​ເອົາ​ໃຈ​ໃສ່ ລາຍ​ຮັບ​ເຂົ້າ​ງົບ​ປະ​ມານ​ລັດ​ຖະ​ບານໜ້ອຍ​ນຶ່ງ ກໍ​ສະ​ແດງວ່າ​ລັດ​ຖະ​ບານ​ເຮົາ​ນີ້​ທຸກ​ລົງ​ພະ​ນັກ​ງານ​ຮັ່ງ​ຂຶ້ນ."

ສ່ວນ​ເຈົ້າ​ໜ້າ​ທີ່​ຂັ້ນ​ສູງ​ໃນ​ຄະ​ນະ​ກວດ​ກາ​ພັກ-ລັດ​ປະ​ຈຳ​ສະ​ພາ​ແຫ່ງ​ຊາດ ລາວ ເປີດ​ເຜີຍ​ວ່າ ການ​ກໍ່​ສ້າງ​ຖະ​ນົນ​ໃນ​ເຂດ​ນະ​ຄ​ອນຫຼວງວຽງ​ຈັນ ປະ​ເຊີນ​ບັນ​ຫາ​ຊັກ​ຊ້າ​ໃນ​ທຸກ​ໂຄງ​ການ​ທີ່​ບັນ​ດາ​ບໍ​ລິ​ສັດ​ເອ​ກະ​ຊົນ​ເປັນ​ພາ​ກ​ສ່ວນ​ທີ່​ອອກ​ທຶນ​ໃຫ້​ກ່ອນ ຕົວ​ຢ່າງ​ຄື​ໂຄງ​ການ​ກໍ່​ສ້າ​ງ​ຖະ​ນົນ​ຈາກ 3 ແຍກ​ບ້ານບໍ່​ໂອ ໄປ​ຫາ​ບ້ານ​ສີ​ຖານ​ໃຕ້ ຊຶ່ງ​ໄດ້​ເລີ່ມ​ລົງ​ມື​ກໍ່​ສ້າງ​ນັບ​ແຕ່​ປີ 2015 ເປັນ​ຕົ້ນ​ມາ​ຈົນ​ເຖິງ​ປັດ​ຈຸ​ບັນ​ນີ້​ກໍ​ປາ​ກົດ​ວ່າ​ມີ​ຄວາມ​ຄືບ​ໜ້າບໍ່​ເຖິງ 70 ເປີ​ເຊັນຂອງ​ແຜນ​ການ ແລະ ການ​ທີ່​ບໍ​ລິ​ສັດ​ເອ​ກະ​ຊົນ​ໄດ້​ປະ​ສົບ​ບັນ​ຫາ​ຂາດ​ເງິນ​ທຶນ​ໝຸນ​ວຽນ​ນັ້ນ​ກໍ​ຍັງ​ເຮັດ​ໃຫ້​ໂຄງ​ການ​ຕ້ອງ​ຢຸດຊະ​ງັກ​ນັບ​ເປັນ​ເວ​ລາກວ່າ 1 ປີ​ມາ​ແລ້ວ​ອີກ​ດ້ວຍ.

ບັນ​ຫາ​ດຽວ​ກັນ​ນີ​ໄດ້​ເກີດ​ຂ​ຶ້ນ​ກັບ​ໂຄງ​ການ​ກໍ່​ສ້າງ​ຖະ​ໜົນ T5 ແລະ ຖະ​ໜົນ T6 ດ້ວ​ຍ​ເຊັ່ນ​ກັນ​ໂດຍ​ບໍ​ລິ​ສັດ​ເອ​ກະ​ຊົນ ລາວ ທີ່​ລົງ​ທຶນ​ໃຫ້​ກ່ອນ​ໃນ​ທັງ​ສອງ​ໂຄງ​ການ​ດັ່ງ​ກ່າວບໍ່​ມີ​ເງິນ​ທຶນ​ດຳ​ເນີນ​ການ​ກໍ່​ສ້າງ​ນັບ​ແຕ່​ປີ 2014 ເປັ​ນ​ຕົ້ນ​ມາ​ແລ້ວ​ເຊັ່ນ​ກັນ​ກັບ​ໂຄງ​ການ​ກໍ່​ສ້າງ​ຖະ​ໜົນ​ຈາກ 3 ແຍກ​ບ້ານບໍ​ໂອ ໄປ​ບ້ານ​ສີ​ຖານ​ໃຕ້ ຊຶ່ງ​ຍັງ​ບໍ່​ມີ​ຄວາມ​ຊັດ​ເຈນ​ວ່າ​ບໍ​ລິ​ສັດ​ຜູ້​ຮັບ​ເໝົາ​ຈະ​ສາ​ມາດ​ຫາ​ເງິນ​ທຶນ​ເພື່ອ​ດຳ​ເນີນ​ການ​ຕໍ່​ໄປ​ໄດ້​ເມື່ອ​ໃດ​ແທ້.

ຍິ່ງ​ໄປ​ກວ່າ​ນັ້ນ ການ​ກໍ່​ສ້າງ​ຖະ​ນົນ​ເຫຼົ່າ​ນີ້​ຍັງ​ບໍ່​ໄດ້​ມາດ​ຕະ​ຖານ​ຕາມ​ແບບ​ທີ່​ກຳ​ນົດ ແລະ ປາ​ກົດ​ມີຫຼາຍ​ໂຄງ​ການ​ທີ່​ມີ​ຄຸນ​ນະ​ພາບ​ຕ່ຳ ແຕ່​ກັບ​ມີ​ການ​ປະ​ເມີນ​ຄ່າ​ການ​ກໍ່​ສ້າງ​ສູງກວ່າ​ຄວາມ​ເປັນ​ຈິງ ໂດຍ​ສາ​ເຫດ​ທີ່​ເຮັດ​ໃຫ້​ເກີດ​ບັນ​ຫາ​ດັ່ງ​ກ່າວ​ກໍ​ຍ້ອນ​ວ່າ ໂຄງ​ການ​ສ່ວນ​ໃຫຍ່ບໍ່​ໄດ້​ຈັດ​ການ​ປະ​ມູນ​ຢ່າງ​ເປີດກວ້າງ ຈຶ່ງດ​ຳ​ເນີນ​ໂຄງ​ການ​ໃນ​ທຸກ​ຂັ້ນ​ຕອນ​ໂດຍ​ຜູ້​ຮັບ​ເໝົາ​ລາຍ​ດຽວ ໂດຍ​ສະ​ເພາະ​ໂຄງ​ການ​ຂອງ​ລັດ​ທີ່​ເອ​ກະ​ຊົນ​ລົງ​ທຶນ​ໃຫ້​ກ່ອນ​ນັ້ນ​ຖື​ເປັນ​ໂຄງ​ການ​ທີ່​ມີ​ມາດ​ຕະ​ຖານ​ການ​ກໍ່​ສ້າງ​ຕ່ຳ​ສຸດ​ໂດຍ​ໃນ​ປີ 2019 ໄດ້​ກວດ​ພົບ 209 ໂຄງ​ການ​ທີ່​ປະ​ຕິ​ບັດ​ບໍ່​ຖືກ​ກົດ​ໝາຍ​ເຮັດ​ໃຫ້​ລັດ​ຖະ​ບານ ລາວ ເສຍ​ຫາຍ​ເຖິງ 5,331 ຕື້​ກີບ.

ເບິ່ງຄວາມເຫັນ (1)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ທ່ານອາດຈະມັກເລື້ອງນີ້ຄືກັນ

XS
SM
MD
LG