ຄະນະກະຊວງແຜນການ ແລະການລົງທຶນຂອງລາວລາຍງານວ່າ ການລົງທຶນຂອງຕ່າງປະເທດໃນລາວທີ່ມີມູນຄ່າຫຼາຍທີ່ສຸດໃນໄລຍະ 2 ເດືອນທຳອິດຂອງປີ 2011 ນີ້ ກໍຄືການລົງທຶນຈາກຫວຽດນາມຊຶ່ງມີມູນຄ່າຫຼາຍກ່ວາ 430 ລ້ານໂດລາຈາກການລົງທຶນໃນ 5 ໂຄງການ ແລະກໍໄດ້ເຮັດໃຫ້ຫວຽດນາມເປັນປະເທດອັນດັບທີ 3 ທີ່ມີມູນຄ່າການລົງທຶນໃນລາວຫຼາຍທີ່ສຸດ ຫຼືເປັນຮອງພຽງແຕ່ຈີນ ແລະໄທເທົ່ານັ້ນ.
ທັງນີ້ ລັດຖະບານຫວຽດນາມກໍໄດ້ໃຫ້ການສະໜັບສະໜູນ ແລະສົ່ງເສີມໃຫ້ບັນດາວິສະຫະ
ກິດ ທັງທີ່ເປັນຂອງລັດຖະບານ ແລະພາກເອກະຊົນໃນຫວຽດນາມນັ້ນ ໃຫ້ເຂົ້າມາລົງທຶນຢູ່ໃນລາວຫຼາຍຂຶ້ນຢ່າງຕໍ່ເນື່ອງ. ຈົນເຖິງເດືອນກຸມພາ 2011 ກໍປະກົດວ່າ ການລົງທຶນຂອງຫວຽດນາມໃນລາວ ມີມູນຄ່າລວມຫຼາຍກ່ວາ 3,300 ລ້ານໂດລາ ຈາກການລົງທຶນໃນ 225 ໂຄງການຢູ່ໃນເຂດ 16 ແຂວງ, ຈາກທັງໝົດ 17 ແຂວງໃນລາວ ໂດຍເຂດນຶ່ງທີ່ຫວຽດນາມໄດ້ເຂົ້າມາລົງທຶນຢ່າງໄວວາກໍຄື ແຂວງອັດຕະປື ເຊິ່ງລວມເຖິງການທີ່ແຂວງດັ່ງກ່າວນີ້ ໄດ້ຮັບການຊ່ວຍເຫຼືອຈາກບັນດາບໍລິສັດຈາກຫວຽດນາມເພີ່ມຫຼາຍຂຶ້ນອີກດ້ວຍ. ດັ່ງທີ່ທ່ານ ຄຳພັນ ພົມມະທັດ, ເຈົ້າແຂວງອັດຕະປືໄດ້ໃຫ້ການຢືນຢັນວ່າ:
“ບໍລິສັດ ຮ່ວງແອງ ຢາລາຍ ຊ່ວຍແຂວງກໍ່ສ້າງຂົວເຊສຸ, ກຽມລົງມືກໍ່ສ້າງຂົວຫ້ວຍເຕີ, ສ້າງຂົວຂ້າມຫ້ວຍນ້ອຍຈຳນວນໜຶ່ງ, ສ້າງໂຮງໝໍທັນສະໄໝສອງຮ້ອຍຕຽງ, ໃຫ້ທຶນການສຶກສາ, ໃຫ້ເງິນທຶນແກ້ໄຂຄວາມທຸກຍາກຢູ່ເມືອງຕ່າງໆ ກຳລັງຈະສ້າງຕົວເມືອງພູວົງໃໝ່ ແລະ ຫຼາຍບໍລິສັດກໍໄດ້ເຮັດເສັ້ນທາງໃຫ້ບ້ານ ແລະ ຕໍ່ຕາ ຂ່າຍໄຟຟ້າແຮງກາງ ແລະແຮງຕໍ່າໃຫ້ບ້ານ, ຖ້າຄິດໄລ່ການຊ່ວຍເຫຼືອລ້າກໍເປັນເງິນຈຳນວນຫຼາຍສິບລ້ານໂດລາ”
ສ່ວນໃນດ້ານການຄ້ານັ້ນ ທັງສອງຝ່າຍກໍໄດ້ສົ່ງເສີມໃຫ້ມີການຄ້າຫຼາຍຮູບແບບ ແລະ ມີການອຳນວຍຄວາມສະດວກໃຫ້ກັບພາກທຸລະກິດການຄ້າ, ການລົງທຶນ ແລະພັດທະນາການເຊື່ອມຕໍ່ທາງດ້ານການຄົມມະນາຄົມຂົນສົ່ງລະຫວ່າງກັນຢ່າງຄົບຊຸດ ແລະຢ່າງທົ່ວເຖິງຕະຫຼອດພາກເໜືອຮອດພາກໃຕ້.
ສຳລັບໃນດ້ານການຄ້ານັ້ນ, ທັງສອງຝ່າຍກໍໄດ້ວາງເປົ້າໝາຍທີ່ຈະເພີ່ມມູນຄ່າການຄ້າລະຫວ່າງກັນໃຫ້ເຖິງ 1 ພັນລ້ານໂດລາໃນປີນີ້ ແລະ ໃຫ້ເພີ່ມຂຶ້ນເປັນ 2 ພັນລ້ານໂດລາໃນປີ 2015 ແລະ 5 ພັນລ້ານໂດລາໃນປີ 2020. ສ່ວນໃນດ້ານການລົງທຶນນັ້ນ ທາງຝ່າຍຫວຽດນາມ ກໍໄດ້ສະແດງຄວາມເຊື່ອໝັ້ນວ່າ ມູນຄ່າການລົງທຶນຂອງຫວຽດນາມໃນລາວຈະເພີ່ມຂຶ້ນເປັນຫຼາຍກ່ວາ 5 ພັນລ້ານໂດລາໃນປີ 2015 ຢ່າງແນ່ນອນ, ທັງນີ້ກໍເນື່ອງຈາກວ່າ ກຸ່ມທຸລະກິດຈາກຫວຽດນາມ ໄດ້ໃຫ້ຄວາມສົນໃຈເປັນພິເສດໃນການເພີ່ມການລົງທຶນດ້ານພະລັງງານບໍ່ແຮ່ ແລະການປູກພືດເສດຖະກິດທີ່ຈະຕ້ອງໃຊ້ເງິນລົງທຶນຫຼາຍເປັນພິເສດນັ້ນເອງ.
ທາງດ້ານທ່ານ ຈູມມະລີ ໄຊຍະສອນ, ເລຂາທິການໃຫຍ່ພັກປະຊາຊົນປະຕິວັດລາວ ແລະປະທານປະເທດລາວ ກໍ່ໄດ້ໃຫ້ການຢືນຢັນເຖິງການເສີມຂະຫຍາຍສາຍພົວພັນມິດຕະພາບແບບພິເສດ ແລະການຮ່ວມມືຢ່າງຮອບດ້ານລະຫວ່າງສອງປະເທດນັ້ນວ່າ ເປັນມໍລະດົກອັນລ້ຳຄ່າທີ່ຈະຕ້ອງຖ່າຍທອດໄປສູ່ຄົນຮຸ່ນໃໝ່ ເພື່ອໃຫ້ຮ່ວມມືກັນພັດທະນາໄປສູ່ຄວາມຈະເລີນຮຸ່ງເຮືອງ ແລະວັດທະນາຖາວອນສືບຕໍ່ໄປ.
ນອກຈາກນີ້ ໃນຊ່ວງບຸນປີໃໝ່ລາວເມື່ອປີກາຍນັ້ນ ທ່ານ ນົງ
ດຶກແໝ໋ງ, ອະດີດເລຂາທິການໃຫຍ່ພັກຄອມມູນິດຫວຽດ
ນາມກໍໄດ້ເດີນທາງຢ້ຽມຢາມລາວຢ່າງເປັນທາງການມາແລ້ວນັ້ນ ກໍໄດ້ຖະແຫຼງການຮ່ວມກັນ
ກັບທ່ານ ຈູມມະລີວ່າ ທັງສອງພັກຈະເພີ່ມການພົບປະແລກປ່ຽນເຈົ້າໜ້າທີ່ຂັ້ນສູງລະ
ຫວ່າງກັນໃຫ້ຫຼາຍຂຶ້ນ ໂດຍຈະເນັ້ນໜັກການແລກປ່ຽນທາງດ້ານທິດສະດີ ແລະດ້ານແຜນ
ການປ່ຽນແປງໃໝ່ລວມເຖິງການພັດທະນາຊັບພະຍາກອນມະນຸດ, ການພັດທະນາທາງສັງ
ຄົມ, ການເມືອງ ແລະຄວາມໝັ້ນຄົງໃນທັງສອງປະເທດຮ່ວມກັນຢ່າງໃກ້ຊິດ.
