ກະເສດຕະກອນທີ່ບໍ່ພໍໃຈ ຫຼາຍຮ້ອຍຄົນ ຢູ່ພາກກາງຂອງ
ຫວຽດນາມ ໄດ້ພາກັນນຳເອົາປາ ແລະ ກຸ້ງຕາຍ ໄປຖິ້ມລົງ
ຢູ່ຕາມຖະໜົນໃຫຍ່ ຕໍ່ໜ້າຫ້ອງການລັດຖະບານທ້ອງຖິ່ນ
ເພື່ອປະທ້ວງຕໍ່ຕ້ານການປ່ອຍມົນລະພິດ.
ການປະທ້ວງເທື່ອຫຼ້າສຸດ ໃນດ້ານສະພາບແວດລອມ ທີ່ມີມາ
ເປັນລຳດັບ ຂອງປະຊາຊົນຫວຽດນາມ ໃນວັນອັງຄານວານນີ້
ຝູງຊົນໄດ້ພາກັນໂຮມຊຸມນຸມປະທ້ວງ ຕໍ່ຕ້ານກິດຈະກຳຕ່າງໆ
ກ່ຽວກັບການດູດຊາຍ ທີ່ໄດ້ສ້າງຄວາມເປິະເປື້ອນ ແລະຄວາມ
ເສຍຫາຍໃນອ່າວແຫ່ງນຶ່ງ ບ່ອນທີ່ພວກກະເສດຕະກອນ ໄດ້ປູກ
ພືດທະເລ ແລະ ລ້ຽງສັດຕ່າງໆ ທີ່ພວກເຂົາເຈົ້າກາງຕໍ່ເພື່ອລ້ຽງ
ຊີບນັ້ນ.
ທ້າວ Hoang Thi Hong ຜູ້ທີ່ອາໄສຢູ່ໃກ້ໆ ກັບບ່ອນເກີດເຫດ ບອກກັບວີໂອເອພາສາ
ຫວຽດນາມ ວ່າ ພວກປະທ້ວງໄດ້ຕັນທາງເສັ້ນຫລັກ ທີ່ເຊື່ອມຕໍ່ກັນລະຫວ່າງ ພາກເໜືອ
ຫາ ພາກໃຕ້ ຂອງຫວຽດນາມ. ລາວເວົ້າວ່າ “ພວກເຂົາເຈົ້າພາກັນໄປປະທ້ວງຢູ່
ຖະໜົນ ເພາະວ່າ ສັດນ້ຳຂອງພວກເຂົ້າເຈົ້າ ໄດ້ຮັບຜົນກະທົບ ໂດຍວຽກງານ
ຂອງການດູດເອົາຊາຍນັ້ນ. ການສັນຈອນ ໄດ້ຕິດຂັດເປັນເວລາຫຼາຍໆຊົ່ວໂມງ.”
ການປະທ້ວງໄດ້ມີຂຶ້ນ ຫຼັງຈາກທີ່ປະຊາຊົນຫຼາຍພັນຄົນ ໄດ້ພາກັນອອກໄປປະທ້ວງຢູ່
ຕາມຖະໜົນສາຍຕ່າງໆ ຢູ່ທັງໃນພາກ ເໜືອ ແລະ ພາກໃຕ້ຂອງຫວຽດນາມ ເພື່ອສະແດງ
ໃຫ້ເຫັນ ເຖິງຄວາມກັງວົນຕ່າງໆ ກ່ຽວກັບບັນຫາສະພາບແວດລ້ອມນັ້ນ.
ຊາວບ້ານຢູ່ທາງພາກກາງຂອງຫວຽດນາມ ຫຼາຍຮ້ອຍຄົນ ເມື່ອອາທິດແລ້ວນີ້ ໄດ້ພາກັນ
ແກວ່ງກ້ອນຫິນ ດິນຈີ່ ແລະ ລະເບີດນ້ຳມັນ ເຂົ້າໃສ່ຕຳຫລວດປາບຈະລາຈົນ ທີ່ພະຍາຍາມ ຂັບໄລ່ພວກປະທ້ວງຕໍ່ຕ້ານການປ່ອຍມົນລະພິດ ຈາກໂຮງຜະລິດໄຟຟ້າ ທີ່ແລ່ນດ້ວຍຖ່ານຫິນນັ້ນ.
ກ່ອນໜ້ານັ້ນ ຫລາຍພັນຄົນໄດ້ພາກັນໂຮມຊຸມນຸມ ທີ່ນະຄອນຫຼວງຮາໂນ່ຍ ເພື່ອປະທ້ວງ
ຕໍ່ການຕັດກົກໄມ້ ຫຼາຍພັນຕົ້ນ ຊຶ່ງໄດ້ບັງຄັບໃຫ້ເຈົ້າໜ້າທີ່ ຕ້ອງໄດ້ຍົກເລີກແຜນການ
ດັ່ງກ່າວ.
