ເຈົ້າໜ້າທີ່ຂັ້ນອາວຸໂສຂອງສະຫະປະຊາຊາດທ່ານນຶ່ງກ່າວວ່າ ລາຄາ ເຂົ້າປາອາຫານທີ່ແພງຂຶ້ນນັບມື້ ແລະໄພພິບັດທໍາມະຊາດທີ່ມັກເກີດຂຶ້ນເລື້ອຍໆ ເຮັດໃຫ້ຍາກຂຶ້ນທີ່ຈະຜ່ອນຄາຍຄວາມອຶດຫິວແລະການຂາດແຄນອາຫານໃນພາກພື້ນເອເຊຍປາຊີຟິກ.
ທ່ານ Hiroyuki Konuma ຜູ້ອໍານວຍການຊ່ວຍຂອງອົງການອາຫານແລະການກະເສດ ໄດ້ຖະແຫລງເຊ່ນນີ້ໃນວັນຈັນມື້ນີ້ຕໍ່ບັນດາຜູ້ຕາງໜ້າ ແລະພວກນັກສັງເກດການ ຈາກ 38
ປະເທດ ທີ່ກອງປະຊຸມຢູ່ຫວຽດ ນາມ.
ທ່ານ Konuma ກ່າວວ່າ ບັນຫາທ້າທາຍໃນການກໍາຈັດຄວາມອຶດຫິວໃຫ້ໝົດໄປນັ້ນ ໄດ້ປະສົບກັບຄວາມຫຍຸ້ງຍາກເພີ່ມຂຶ້ນ ຍ້ອນຜົນກະທົບຈາກການປ່ຽນແປງຂອງດິນຟ້າອາກາດ ນະໂຍບາຍດ້ານການຄ້າ ລາຄານໍ້າມັນດິບທີ່ຖີບໂຕສູງຂຶ້ນເລື້ອຍໆ ແລະການນໍາໃຊ້ພືດທັນຍາຫານຫລາຍຂຶ້ນນັບມື້ ເພື່ອເອົາໄປຜະລິດນໍ້າມັນຊີວະພາບນັ້ນ.
ທ່ານ Konuma ກ່າວຕື່ມວ່າ ການລົງທຶນຢ່າງມະຫາສານຈະເປັນສິ່ງຈໍາເປັນເພື່ອຈະຮັບມືກັບຄວາມຮຽກຮ້ອງຕ້ອງການອາຫານໃນອະນາຄົດ
ໂດຍໃຫ້ຂໍ້ສັງເກດວ່າ ການຜະລິດອາຫານຈະຕ້ອງເພີ່ມຂຶ້ນໃນອັດຕາ 60 ເປີເຊັນໃນທົ່ວໂລກ ຈຶ່ງຈະມີອາຫານພຽງພໍສໍາລັບປະຊາກອນທັງໝົດຂອງໂລກ ທີ່ທໍານາຍໄວ້ສໍາລັບປີ 2050 ນັ້ນ.
ກອງປະຊຸມທີ່ກຸງຮາໂນຍ ມີໝາຍກໍານົດທີ່ຈະດໍາເນີນໄປເປັນເວລາ 5 ມື້ ແລະຄາດວ່າຈະທໍາການໂອ້ລົມສົນທະນາກັນເລື້ອງນະໂຍບາຍແລະ ກົດລະບຽບຕ່າງໆ ຮວມທັງສະພາບການດ້ານອາຫານແລະການກະເສດ ໃນພາກພື້ນເອເຊຍປາຊີຟິກ ແລະການລິເລີ້ມເພື່ອວາງແຜນເລື້ອງຄວາມປອດໄພໃນດ້ານອາຫານແລະແລະການເຄື່ອນໄຫວຕ່າງໆໃນດ້ານອາຫານ.
ໃນທ້າຍສັບປະດານີ້ ພວກບັນດາລັດຖະມົນຕີເຫລົ່ານີ້ຈະທົບທວນເບິ່ງລາຍງານກ່ຽວກັບການເອົາມາດຕະການຕ່າງໆ ເພື່ອເລັ່ງລັດທໍາຄວາມ ຄືບໜ້າໄປສູ່ເປົ້າພາຍໃນການຕັດລະດັບຄວາມອຶດຫິວລົງເຄິ່ງນຶ່ງໃນ ຂົງເຂດເອເຊຍປາຊີຟິກພາຍໃນປີ 2015 ຊຶ່ງກອງປະຊຸມສຸດຍອດວ່າດ້ວຍອາຫານຂອງໂລກໄດ້ວາງເປົ້າໝາຍໄວ້ ໃນປີ 1996 ນັ້ນ.