ລິ້ງ ສຳຫລັບເຂົ້າຫາ

logo-print

ການຂະຫຍາຍ ສະໜາມບິນສາກົນ ວັດໄຕ ຈະສຳເລັດໃນຕົ້ນປີ 2018


ສະໜາມບິນສາກົນວັດໄຕ ເປັນສະໜາມບິນທີ່ໃຫຍ່ທີ່ສຸດໃນ ລາວ. ຖືກສ້າງຂຶ້ນດ້ວຍການສະໜັບສະໜູນຂອງລັດຖະບານ ຍີ່ປຸ່ນ.

ການຂະຫຍາຍສະໜາມບິນສາກົນວັດໄຕ ໃນນະຄອນຫຼວງ ວຽງຈັນ ຈະສຳເລັດໃນຕົ້ນ
ປີ 2018 ໂດຍໄດ້ຮັບການຊ່ວຍເຫຼືອຈາກອົງການ JICA ຂອງລັດຖະບານ ຍີ່ປຸ່ນ ໃນມູນ ຄ່າລວມ 9,000 ລ້ານເຢນ.

please wait

No media source currently available

0:00 0:05:13 0:00

ທາງການສະຖານທູດ ຍີ່ປຸ່ນ ໃນນະຄອນຫຼວງວຽງຈັນ ລາຍງານວ່າການພັດທະນາ-ປັບ
ປຸງສິ່ງອຳນວຍຄວາມສະດວກຕ່າງໆພາຍໃນສະໜາມບິນ ນານາຊາດວັດໄຕ ໃນນະ
ຄອນຫຼວງວຽງຈັນ ຊຶ່ງໄດ້ເລີ່ມລົງມືດຳເນີນການໃນພາກຕົວຈິງນັບແຕ່ທ້າຍປີ 2015 ເປັນ ຕົ້ນມາດ້ວຍເງິນທຶນສະໜັບສະໜູນຈາກອົງການເພື່ອການຮ່ວມມືສາກົນຂອງລັດຖະບານ
ຍີ່ປຸ່ນ JICA ໃນມູນຄ່າລວມ 9,000 ລ້ານເຢນ ຫຼື ປະມານ 80 ລ້ານໂດລານັ້ນມາເຖິງປະ ຈຸບັນນີ້ ໄດ້ຄືບໜ້າຕາມແຜນການທີ່ວາງໄວ້ເປັນຢ່າງດີ ໂດຍຄາດວ່າຈະແລ້ວສຳເລັດ
ແລະ ເປີດນຳໃຊ້ໄດ້ທັງໂຄງການພາຍໃນຕົ້ນປີ 2018.

ໂດຍການພັດທະນາ-ປັບປຸງສະໜາມບິນນານາຊາດວັດໄຕ ດັ່ງກ່າວນີ້ໄດ້ນຳໃຊ້ເທັກນິກ ສະໄໝໄໝ່ຂອງ ຍີ່ປຸ່ນ ທັງໃນດ້ານການຄວບຄຸມການບິນ, ການຮັກສາຄວາມປອດໄພ
ແລະ ການອຳນວຍຄວາມສະດວກໃຫ້ແກ່ການບິນ ແລະ ຜູ້ໂດຍສານ ດ້ວຍການພັດທະ ນາ-ປັບປຸງອາຄານຜູ້ໂດຍສານຫຼັງເກົ່າໃຫ້ທັນສະໄໝເພື່ອໃຫ້ສາມາດຮອງ ຮັບຜູ້ໂດຍ ສານໃຫ້ໄດ້ເຖິງ 2 ລ້ານຄົນໃນແຕ່ລະປີ.

ແຕ່ຢ່າງໃດກໍຕາມ ສະໜາມບິນນານາຊາດວັດໄຕ ໃນປະຈຸບັນນີ້ກໍປະເຊີນກັບບັນຫາແອ
ອັດທັງຈຳນວນຖ້ຽວບິນ ແລະ ຜູ້ໂດຍສານທີ່ເພີ່ມຂຶ້ນນັບມື້ ໂດຍຄາດວ່າຈະບໍ່ສາມາດ
ຮອງຮັບຈຳນວນຖ້ຽວບິນ ແລະ ຜູ້ໂດຍສານທີ່ເພີ່ມຂຶ້ນໄດ້ຢ່າງພຽງພໍພາຍໃນປີ 2023 ຊຶ່ງ
ກໍເຮັດໃຫ້ກົມການບິນພົນລະເຮືອນໄດ້ຕົກລົງໃນບັນທຶກຄວາມເຂົ້າໃຈ (MOU) ຮ່ວມກັບ
ບໍລິສັດ ເອກະຊົນ ຈີນ ເພື່ອດຳເນີນການສຶກສາຄວາມເປັນໄປໄດ້ຂອງໂຄງການກໍ່ສ້າງສະ ໜາມບິນ ນານາຊາດແຫ່ງໃໝ່ ໃນເຂດນະຄອນຫຼວງວຽງຈັນ ເມື່ອບໍ່ນານມານີ້ໂດຍໄດ້
ອະນຸຍາດໃຫ້ ບໍລິສັດເອກະຊົນ ຈີນ ເປັນຜູ້ຮັບຜິດຊອບການສຶກສາຄວາມເປັນໄປໄດ້
ຂອງໂຄງການໃຫ້ແລ້ວພາຍໃນ 2 ປີ ແລະ ຖ້າຫາກພົບວ່າໂຄງການມີຄວາມຄຸ້ມຄ່າທີ່ຈະ
ລົງທຶນລັດຖະບານ ລາວ ກໍຈະສົ່ງເສີມການລົງທຶນໃນໂຄງການໃຫ້ໄວທີ່ສຸດ.

ກ່ອນໜ້ານີ້ ລັດຖະບານ ລາວ ໄດ້ວາງແຜນການໄວ້ວ່າຈະກໍ່ສ້າງສະໜາມບິນນານາຊາດ
ແຫ່ງໃໝ່ຢູ່ເຂດບ້ານດົງໝາຍຄາຍ ເມືອງ ໄຊທານີ ຫ່າງຈາກເທດສະບານນະຄອນຫຼວງ
ວຽງຈັນ 18 ກິໂລແມັດໄປຕາມເສັ້ນທາງເລກ 10 ໂດຍມີເນື້ອທີ່ປະມານ 5,000 ເຮັກຕາ ແຕ່ການສຶກສາພົບວ່າມີຄວາມເປັນໄປໄດ້ຍາກເນື່ອງຈາກເປັນເຂດທີ່ມີບ້ານເຮືອນຂອງປະ
ຊາຊົນ ຢູ່ຢ່າງໜາແໜ້ນ, ມີຫ້ອງການ, ມີຕະຫຼາດ ແລະ ມີສະໜາມກິລາຢູ່ບໍລິເວນໃກ້ຄຽງ ທັງຍັງເປັນພື້ນທີ່ຮອງຮັບການຂະຫຍາຍຕົວເມືອງຂອງເຂດນະຄອນຫຼວງວຽງຈັນອີກດ້ວຍ.

ສຳລັບພື້ນທີ່ທີ່ຈະທຳການສຶກສາຕາມບົດບັນທຶກຄວາມເຂົ້າໃຈສະບັບໃໝ່ນີ້ຢູ່ທີ່ຫຼັກ 35
ຖະໜົນເລກ 13 ໃຕ້ ຊຶ່ງຫາກຜົນການສຶກສາພົບວ່າມີຄວາມເໝາະສົມ ແລະ ຄຸ້ມຄ່າທີ່ຈະ
ລົງທຶນ ລັດຖະບານ ລາວ ກໍຈະສົ່ງເສີມການລົງທຶນທັງຈາກພາຍໃນ ແລະ ຕ່າງປະເທດ
ທັນທີ ພາຍໃຕ້ເປົ້າໝາຍທີ່ຈະຊຸກຍູ້ໃຫ້ການກໍ່ສ້າງສະໜາມບິນແຫ່ງໃໝ່ນີ້ໃຫ້ແລ້ວສຳ
ເລັດແລະ ເປີດໃຊ້ຢ່າງເປັນທາງການພາຍໃນປີ 2025 ເປັນຢ່າງຊ້າ.

ແຕ່ສຳລັບໃນໄລຍະສະເພາະນີ້ ທາງການ ລາວ ກໍໄດ້ແກ້ໄຂບັນຫາແອອັດຢູ່ສະໜາມບິນ ວັດໄຕດ້ວຍການພັດທະນາ-ປັບປຸງເພື່ອຍົກລະດັບ ສະໜາມບິນວັດໄຕດ້ວຍການພັດທະ ນາ-ປັບປຸງສະໜາມບິນວັດໄຕໃຫ້ໄດ້ມາດຕະຖານສາກົນຫຼາຍຂຶ້ນ ດັ່ງເຈົ້າໜ້າທີ່ຂັ້ນສູງ ໃນກະຊວງໂຍທາທິການ ແລະ ຂົນສົ່ງໄດ້ໃຫ້ການຢືນຢັນວ່າ.

"ລັດຖະບານເນາະ ພວກເຮົານີ້ກໍໄດ້ເອົາໃຈໃສ່ໃນການພັດທະນາການບິນໃນໄລຍະ ຜ່ານມານີ້ ຖືວ່າໝາຍຄວາມວ່າລານຈອດເຮືອບິນບໍ່ ຫຼືວ່າ ທາງຂຶ້ນ-ລົງ, ລະບົບບັນ ຊາການບິນນີ້ ດຽວນີ້ ບັນຫາທີ່ວ່າພວກເຮົາກໍຈະຕ້ອງໄດ້ປັບປຸງນີ້ແມ່ນຍົກລະດັບອາ
ຄານຜູ້ໂດຍສານນີ້."

ກ່ອນໜ້ານີ້ ລັດຖະບານ ລາວ ກໍໄດ້ຮັບການສະໜັບສະໜູນເງິນທຶນຈາກລັດຖະບານ ຍີ່
ປຸ່ນ 1,246 ລ້ານເຢນ ແລະ ກູ້ຢືມຈາກລັດຖະບານ ຈີນ ຫຼາຍກວ່າ 37 ລ້ານໂດລາ ສຳ
ລັບນຳໃຊ້ໃນການພັດທະນາສະໜາມບິນວັດໄຕ ເພື່ອຮອງຮັບການເປັນເຈົ້າພາບຈັດ
ກອງປະຊຸມສຸດຍອດອາຊຽນ-ຢູໂຣບ ຄັ້ງທີ 9 ເມື່ອທ້າຍປີ 2012 ທີ່ນະຄອນຫຼວງວຽງຈັນ
ໂດຍໄດ້ຂະຫຍາຍລານຈອດໃຫ້ສາມາດຮອງຮັບເຮືອບິນຂະໜາດໃຫຍ່ໄດ້ເຖິງ 40 ລຳ
ພ້ອມທັງຕິດຕັ້ງລະບົບຮັກສາຄວາມປອດໄພ ແລະ ສິ່ງອຳນວຍຄວາມສະດວກຕ່າງໆ
ຢ່າງຄົບຊຸດມາແລ້ວ ຫາກແຕ່ວ່າມາຮອດປະຈຸບັນນີ້ ສິ່ງອຳນວຍຄວາມສະດວກດັ່ງກ່າວ
ກໍບໍ່ສາມາດຮອງຮັບໄດ້ຢ່າງພຽງພໍກັບການເພີ່ມຂຶ້ນທັງຈຳນວນຖ້ຽວບິນ ແລະ ຈຳນວນ
ຜູ້ໂດຍສານທີ່ເພີ່ມຂຶ້ນຢ່າງຕໍ່ເນື່ອງດັ່ງກ່າວ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG