ທ່ານ Leopoldo Lopez ຜູ້ນຳຝ່າຍຄ້ານຂອງເວເນຊູເອລາທີ່
ຖືກຄຸມຂັງຢູ່ໃນເວລານີ້ ໄດ້ຖືກຕັດສິນໃຫ້ຈຳຄຸກດົນເກືອບ 14
ປີ ໃນວັນພະຫັດວານນີ້. ທ່ານໄດ້ຖືກກ່າວຫາວ່າ ຍຸຍົງ ໃຫ້ປະ
ຊາຊົນກໍ່ຄວາມບໍ່ສະຫງົບ ທຳລາຍຊັບສິນແລະສົມຮູ້ຮ່ວມຄິດ
ເພື່ອກະທຳຄວາມຜິດ ຫຼັງຈາກໄດ້ເກີດການປະທ້ວງ ພາຍໃຕ້
ການນຳພາຂອງພັກຝ່າຍຄ້ານໃນປີແລ້ວ ໄດ້ກາຍເປັນຄວາມ
ຮຸນແຮງ ຫລັງຈາກກຳລັງຮັກສາຄວາມສະຫງົບໄດ້ປະທະກັບ
ພວກເດີນຂະບວນທີ່ເຮັດໃຫ້ຫຼາຍສິບຄົນເສຍຊີວິດ.
ນັກເສດຖະສາດທີ່ຮຽນຈົບຈາກສະຫະລັດທ່ານນີ້ໄດ້ຖືກຕັດ
ສິນໃຫ້ຈຳຄຸກ ເປັນເວລາ 13 ປີ ກັບ 9 ເດືອນ ຍ້ອນຍຸຍົງໃຫ້ ເກີດຄວາມຮຸນແຮງຕໍ່ຕ້ານລັດຖະບານ ປະທານາທິບໍດີ Nicolas Maduro ໃນຄວາມພະ ຍາຍາມເພື່ອບັງຄັບໃຫ້ປະທານາທິບໍດີລາອອກ.
ອົງການນິລະໂທດກຳສາກົນກ່າວໃນຖະແຫຼງການສະບັບນຶ່ງວ່າ ການຕັດສິນລົງໂທດທ່ານ
Lopez ແມ່ນສະແດງໃຫ້ເຫັນເຖິງການ “ຂາດແຄນລະບົບຕຸລາການທີ່ເປັນອິດສະຫຼະແລະ ມີຄວາມຍຸຕິທຳຢ່າງສິ້ນເຊີງ” ໃນເວເນຊູເອລາ.
ທ່ານນາງ Erika Guevara-Rosas ຜູ້ອຳນວຍການຂອງອົງການນິລະໂທດກຳສາກົນຮັບ
ຜິດຊອບ ກ່ຽວກັບທະວີບອາເມຣິກາ ກ່າວວ່າ “ຄວາມຜິດຂອງທ່ານ ພຽງຢ່າງດຽວ ກໍຄືເປັນ ຜູ້ນຳຂອງພັກຝ່າຍຄ້ານ ໃນເວເນຊູເອລາ. ດ້ວຍການຕັດສິນໂທດນີ້ ເວເນຊູເອລາແມ່ນໄດ້ ເລືອກເອົາການປະຕິເສດ ບໍ່ຮັບຮູ້ຫລັກການສິດທິພື້ນຖານ ຂອງມະນຸດ ແລະເປີດໄຟຂຽວ ໃຫ້ມີການລະເມີດສິດທິມະນຸດເພີ້ມຕື່ມ.”
ທ່ານ Lopez ທີ່ມີອາຍຸ 44 ປີ ແມ່ນຜູ້ກໍ່ຕັ້ງ ພັກຄວາມປາຖະໜາ ຂອງມວນຊົນ ທີ່ເປັນພັກ ຝ່າຍຄ້ານໃນເວເນຊູເອລາ.
