ອັຟການີສຖານແມ່ນຍິນດີຕໍ່ລາຍງານທີ່ສະຫະລັດຈະຍົກເລີກ
ແຜນການທີ່ຈະຕັດກຳລັງທະຫານໃນອັຟການີສຖານ ໃຫ້ເຫຼືອ
5,500 ຄົນພາຍໃນທ້າຍປີ 2015 ໂດຍອ້າງການຮ້ອງຂໍຈາກ
ບັນດາຜູ້ບັງຄັບບັນຊາ ທີ່ຢາກໃຫ້ຮັກສາກຳລັງທະຫານໃນ
ຈຳນວນຫຼາຍຂຶ້ນໄວ້ ໃນປະເທດດັ່ງກ່າວ.
ຜູ້ຕາງໜ້າອັຟກາ ນີສຖານທີ່ອົງການສະຫະປະຊາຊາດ ທ່ານ Zahir Tanin ໄດ້ບອກກັບພວກນັກຂ່າວໃນນະຄອນ New York ວ່າ ມັນມີຄວາມຈຳເປັນທີ່ສະຫະລັດຈະຕ້ອງມີກອງກຳລັງທາງພາກພື້ນດິນ ທີ່ອິງໃສ່ສະຖານະການຕົວຈິງ ພາຍໃນຂອບຂອງຍຸດທະສາດການ
ເປັນພາຄີກັບອັຟການີສຖານ ເພື່ອກວດຄືນແລະປັບປ່ຽນລາຍລະອຽດຂອງການຖອນ ທະຫານນັ້ນ.
ທ່ານ Tanin ໄດ້ກ່າວວ່າ “ຂ້າພະເຈົ້າຄິດວ່າ ພວກເຮົາໜ້າຈະເຊື່ອວ່າ ແຜນການຖອນ ກຳລັງ ຄວນຈະປັບປ່ຽນຕາມສະພາບຄວາມເປັນຈິງ ທາງພາກພື້ນດິນເພື່ອຊ່ອຍໃຫ້ອັຟການີສຖານ ສາມາດຮັບມືໄດ້ດີຂຶ້ນ ຕໍ່ການທ້າທາຍດ້ານການຮັກສາຄວາມປອດໄພ ທີ່ອັຟກາ ນິສຖານປະເຊີນຢູ່ນັ້ນ.”
ເຈົ້າໜ້າທີ່ສະຫະລັດ ໄດ້ກ່າວວ່າ ເຖິງແມ່ນວ່າ ຍັງບໍ່ທັນມີການຕັດສິນໃຈຂັ້ນສຸດທ້າຍ ກ່ຽວກັບຈຳນວນຂອງທະຫານເທື່ອກໍຕາມ. ສ່ວນໃຫຍ່ຂອງທະຫານ 10 ພັນ ຄົນ ທີ່ປະຈຳການ
ຢູ່ໃນອັຟການີສຖານ ໃນຂະນະນີ້ ແມ່ນຄາດວ່າ ຍັງຈະສືບຕໍ່ປະຕິບັດພາລະກິດໄປຈົນກາຍ
ປີໜ້າ. ການປະກາດຢ່າງເປັນທາງການນັ້ນ ຄາດວ່າຈະມີຂຶ້ນໃນສັບປະດາໜ້າ ຕອນທີ່ປະທາ
ນາທິບໍດີອັຟການີສຖານ ທ່ານ Ashraf Ghani ຈະພົບປະກັບປະທານາທິບໍດີສະຫະລັດ
ທ່ານ ບາຣັກ ໂອບາມາ ໃນນະຄອນຫຼວງວໍຊີງຕັນ.
ໃນກອງປະຊຸມຖະແຫຼງຂ່າວທີ່ທຳນຽບຂາວໃນວັນຈັນວານນີ້ ໂຄສົກຂອງທຳນຽບຂາວ ທ່ານ Josh Earnest ບໍ່ໄດ້ໃຫ້ຄວາມເຫັນໃດໆ ກ່ຽວກັບຈຳນວນແທ້ຈິງນັ້ນ ແຕ່ກັບໄດ້ກ່າວວ່າ “ຂ້າພະເຈົ້າສາມາດບອກພວກທ່ານໄດ້ວ່າ ປະທານາທິບໍດີ ໄດ້ປຶກສາຫາລືຢ່າງໃກ້ຊິດກັບຄະນະທີ່ປຶກສາດ້ານຄວາມປອດໄພແລະກັບ ຜູ້ບັງຄັບບັນຊາທາງພາກພື້ນດິນ ກ່ຽວກັບການຖອນກຳລັງທະຫານ ໃຫ້ເປັນໄປຕາມຄວາມເໝາະສົມນັ້ນ.”
