ການໂຈມຕີຂອງ ສະຫະລັດ ໃນພາກຕາເວັນອອກຂອງປະເທດ ຊີເຣຍ ຢູ່ໃກ້ກັບເຂດຊາຍແດນຂອງ ອີຣັກ ໄດ້ສັງຫານນັກລົບທະຫານບ້ານທີ່ໄດ້ຮັບການໜູນຫຼັງໂດຍ ອີຣ່ານ ຢ່າງໜ້ອຍຫ້າຄົນ, ອີງຕາມການກ່າວຂອງນັກຕິດຕາມສົງຄາມໃນວັນຈັນມື້ນີ້.
ອົງການສັງເກດການເພື່ອສິດທິມະນຸດ ຊີເຣຍ ທີ່ມີຫ້ອງການຕັ້ງຢູ່ປະເທດ ອັງກິດ ໄດ້ກ່າວວ່າ “ນັກລົບທະຫານບ້ານ ອີຣັກ ທີ່ໄດ້ຮັບການໜູນຫຼັງໂດຍ ອີຣ່ານ ຢ່າງໜ້ອຍຫ້າຄົນໄດ້ຖືກຂ້າຕາຍ ແລະ ຫຼາຍຄົນໄດ້ຮັບບາດເຈັບໃນການໂຈມຕີໂດຍເຮືອບິນລົບຂອງ ສະຫະລັດ“ ຢູ່ເຂດຊາຍແດນຟາກ ຂອງປະເທດ ຊີເຣຍ.”
ນັກຕິດຕາມສົງຄາມດັ່ງກ່າວ, ເຊິ່ງອາໄສເຄືອຂ່າຍຂອງແຫຼ່ງຊັບພະຍາກອນຕ່າງໆໃນ ຊີເຣຍ ເພື່ອເກັບກຳຂໍ້ມູນໄດ້ກ່າວວ່າຕຳແໜ່ງທາງທະຫານກໍລວມຢູ່ໃນເປົ້າໝາຍທີ່ຖືກໂຈມຕີ.
ອົງການຂ່າວ SANA ຂອງລັດຖະບານ ຊີເຣຍ ໄດ້ກ່າວວ່າເດັກນ້ອຍຄົນນຶ່ງໄດ້ເສຍຊີວິດ, ແລະ ວ່າຢ່າງໜ້ອຍອີກ 3 ຄົນໄດ້ຮັບບາດເຈັບ.
ການໂຈມຕີຕ່າງໆ, ເຊິ່ງຖືກຢືນຢັນໂດຍຖະແຫຼງການສະບັບນຶ່ງຂອງທຳນຽບຫ້າແຈນັ້ນ, ໄດ້ເປັນຂີດໝາຍຄັ້ງທີສອງຂອງການໂຈມຕີດັ່ງກ່າວຕໍ່ພວກທະຫານບ້ານທີ່ໄດ້ຮັບການໜູນຫຼັງໂດຍ ອີ ຣ່ານ ໃນ ຊີເຣຍ ນັບຕັ້ງແຕ່ປະທານາທິບໍດີ ໂຈ ໄບເດັນ ໄດ້ເຂົ້າກຳຕຳແໜ່ງ.
ເຂົາເຈົ້າໄດ້ແນເປົ້າໃສ່ສະຖານທີ່ປະຕິບັດການ ແລະ ຄັງເກັບອາວຸດຢູ່ສະຖານທີ່ສອງແຫ່ງໃນ ຊີ ເຣຍ ແລະ ແຫ່ງນຶ່ງໃນ ອີຣັກ, ອີງຕາມການກ່າວຂອງທຳນຽບຫ້າແຈໃນຖະແຫຼງການສະບັບນຶ່ງ.
ທຳນຽບຫ້າແຈ ໄດ້ກ່າວຕື່ມວ່າສະຖານທີ່ຕ່າງໆແມ່ນໄດ້ຖືກໃຊ້ໂດຍກຸ່ມທະຫານບ້ານ, ລວມທັງກຸ່ມ ເຮັສໂບລລາ ຄາຕາອີບ ແລະ ກຸ່ມ ຊາຢິດ ອາລ-ຊູຮາດາ ຄາຕາອີບ, ເຊິ່ງແມ່ນກຸ່ມຍ່ອຍທະ ຫານຫົວຮຸນແຮງຈັດ ອີຣັກ ທີ່ມີສາຍພົວພັນ ຢ່າງໃກ້ຊິດກັບລັດຖະບານ ເຕຫະຣ່ານ.
ໂຄສົກທຳນຽບຫ້າແຈ ທ່ານ ຈອນ ເຄີບີ ໄດ້ກ່າວວ່າ “ສະຖານທີ່ພວກນີ້ໄດ້ຖືກໃຊ້ໂດຍທະຫານບ້ານທີ່ໄດ້ຮັບການໜູນຫຼັງໂດຍ ອີຣ່ານ ທີ່ພົວພັນໃນການໂຈມຕີດ້ວຍເຮືອບິນບໍ່ມີຄົນຂັບຕໍ່ເຈົ້າໜ້າທີ່ ສະຫະລັດ ແລະ ສະຖານທີ່ຕ່າງໆໃນ ອີຣັກ.
