ສະຫະລັດ ແລະຣັດເຊຍ ຈະຈັດການເຈລະຈາໃນເດືອນມັງກອນຈະມາເຖິງນີ້ ກ່ຽວກັບການຄວບຄຸມອາວຸດນິວເຄລຍ ແລະຄວາມເຄັ່ງຕຶງຢູ່ຕາມຊາຍແດນລະຫວ່າງ ຣັດເຊຍແລະຢູເຄຣນ.
ໂຄສົກປະຈຳສະພາຄວາມໝັ້ນຄົງແຫ່ງຊາດຂອງທຳນຽບຂາວ ໄດ້ກ່າວຕໍ່ບັນດານັກຂ່າວວ່າ ທັງສອງຝ່າຍຈະພົບປະກັນໃນວັນທີ 10 ມັງກອນ ຕິດຕາມດ້ວຍການເຈລະຈາ ລະຫວ່າງ ຣັດເຊຍກັບອົງການເນໂຕ້ ໃນວັນທີ 12 ມັງກອນ ແລະກອງປະຊຸມ ໃນວັນທີ 13 ມັງກອນ ກັບ ຣັດເຊຍ, ສະຫະລັດ ແລະບັນດາສະມາຊິກຂອງອົງການເພື່ອຄວາມໝັ້ນຄົງແລະການຮ່ວມມື ຢູ່ໃນຢູໂຣບ.
ໂຄສົກຂອງທຳນຽບຂາວທ່ານນີ້ ໄດ້ກ່າວວ່າ “ເມື່ອພວກເຮົານັ່ງລົງເຈລະຈາ, ຣັດເຊຍ ສາມາດນຳເອົາຄວາມເປັນຫ່ວງຕ່າງໆຂຶ້ນມາປຶກສາຫາລືກັນ ແລະພວກເຮົາຈະນຳເອົາຄວາມເປັນຫ່ວງຂອງພວກເຮົາຂຶ້ນມາປຶກສາກັບກິດຈະກຳຕ່າງໆຂອງຣັດເຊຍເຊັ່ນດຽວກັນ.” ທ່ານກ່າວຕໍ່ໄປວ່າ “ຍັງມີພາກສ່ວນ ບ່ອນທີ່ພວກເຮົາສາມາດເຮັດໃຫ້ມີຄວາມກ້າວໜ້າ ແລະພາກສ່ວນບ່ອນທີ່ພວກເຮົາຈະບໍ່ເຫັນດີນຳກັນ. ອັນນັ້ນເປັນສິ່ງທີ່ກ່ຽວກັບການທູດ.”
ບັນດາລັດຖະບານຂອງປະເທດຕາເວັນຕົກ ໄດ້ກັງວົນ ກ່ຽວກັບ ການເສີມກຳລັງທະຫານຂອງ ຣັດເຊຍ ຢູ່ຕາມຊາຍແດນຕິດກັບ ຢູເຄຣນ ໂດຍການສະແດງຄວາມເປັນຫ່ວງກ່ຽວກັບແຜນການບຸກລຸກທີ່ອາດເປັນໄປໄດ້ຂອງຣັດເຊຍ. ຜູ້ນຳຂອງຣັດເຊຍ ທ່ານ ວລາດີເມຍ ປູຕິນ ໄດ້ປະຕິເສດຕໍ່ແຜນການໃດໆເຊັ່ນນັ້ນ ແລະໄດ້ຮຽກຮ້ອງໃຫ້ຮັບປະກັນ ຕໍ່ການບໍ່ໃຫ້ອົງການເນໂຕ້ຂະຫຍາຍເຂົ້າໄປໃກ້ຜືນແຜ່ນດິນຂອງຕົນ.
ໂຄສົກສະພາຄວາມໝັ້ນຄົງແຫ່ງຊາດໄດ້ກ່າວວ່າ ໃນດ້ານຜົນປະໂຫຍດຂອງ ຢູເຄຣນ ເອງ ການເຈລະຈາລະຫວ່າງ ສະຫະລັດກັບຣັດເຊຍ ຈະບໍ່ບັນລຸການຕັດສິນໃຈໃດໆກ່ຽວກັບຢູເຄຣນ.
ທ່ານໂຄສົກໄດ້ເວົ້າວ່າ “ວິທີການແກ້ໄຂບັນຫາຂອງປະທານາທິບໍດີ ໄບເດັນ ກ່ຽວກັບ ຢູເຄຣນ ແມ່ນເປັນທີ່ຈະແຈ້ງແລະສອດຄ່ອງກັນ ກໍຄືຮ່ວມມືກັນໃນສອງດ້ານຄື: ການສະກັດກັ້ນ ແລະການທູດ. ພວກເຮົາສາມັກຄີກັນເປັນພັນທະມິດນຶ່ງ ກ່ຽວກັບ ຜົນຕິດຕາມມາທີ່ ຣັດເຊຍ ຈະປະເຊີນຖ້າຫາກຕົນທຳການເຄື່ອນໄຫວຕໍ່ ຢູເຄຣນ.”
