ສະຫະລັດ ລະຣັດເຊຍ ໄດ້ປະກາດກ່ຽວກັບແຜນການທີ່ສັບຊ້ອນແລະກວ້າງຂວາງ ໃນຕອນເຊົ້າວັນເສົາມື້ນີ້ທີ່ນະຄອນເຈນີວາ ເພື່ອຍຸຕິສົງຄາມເປັນເວລາ 5 ປີໃນຊີເຣຍແລະ ໃຫ້ປະເທດທັງສອງ ຮ່ວມມືກັນ ໃນການຕໍ່ສູ້ຕ້ານກຸ່ມກໍ່ການຮ້າຍຕ່າງໆຢູ່ໃນປະເທດດັ່ງ ກ່າວ.
ຂໍ້ຕົກລົງສະບັບນີ້ຮຽກຮ້ອງໃຫ້ທຸກພັກຝ່າຍ ໃຫ້ຄຳໝັ້ນສັນຍາຄືນອີກທີ່ຈະປະຕິບັດຕາມ ຂໍ້ຕົກລົງຢຸດຍິງໃນທົ່ວປະເທດ. ການສູ້ລົບກັນຈະຕ້ອງຍຸຕິລົງ ໃນເວລາຕາເວັນຕົກຂອງວັນທີ 12 ກັນຍາ ຊຶ່ງເປັນວັນເລີ້ມຕົ້ນບຸນ Eid ຂອງສາສະໜາອິສລາມ.
ລັດຖະມົນຕີການຕ່າງປະເທດສະຫະລັດ ທ່ານ John Kerry ກ່າວໃນຂະນະທີ່ຢືນຄຽງຂ້າງກັບລັດຖະມົນຕີການຕ່າງປະເທດຣັດເຊຍທ່ານ Sergei Lavrovວ່າ “ພວກເຮົາບໍ່ສາມາດຄິດຫຍັງໄດ້ ທີ່ເໝາະສົມຫລາຍໄປກວ່າ ໃຫ້ທຸກພັກຝ່າຍ ຕົກລົງກັນ ແລະເຮັດ ໃຫ້ບຸນ Eid ມີຄວາມໝາຍຫຼາຍຂຶ້ນສຳລັບຊາວຊີເຣຍແລະສຳລັບຂົງເຂດ.”
ທ່ານ Kerry ກ່າວຕື່ມວ່າ “ໃນການເຮັດວຽກຮ່ວມກັນນີ້ ຣັດເຊຍ ແລະສະຫະລັດແລະຄະ ນະທີມງານຂອງພວກເຮົາໄດ້ວາງແຜນທີ່ສັບຊ້ອນໃນອັນທີ່ພວກເຮົາຄິດວ່າເປັນວິທີການທີ່ສາມາດບັງຄັບໃຊ້ເພີ້ມຂຶ້ນແລະໃນຂອບເຂດທີ່ກວ້າງຂວາງ ຖ້າແຜນດັ່ງກ່າວນີ້ຫາກໄດ້ຮັບການຈັດຕັ້ງປະຕິບັດ ດ້ວຍຄວາມຈິງໃຈແລະສື່ຊັດແລ້ວ ນີ້ສາມາດເປັນໂອກາດເວລາບ່ອນທີ່ການດຳເນີນຄວາມພະຍາຍາມຫຼາຍຝ່າຍ ຢູ່ທີ່ໂຕະການທູດ ການເຈລະຈາ ອາດ ສາມາດມີຂຶ້ນໄດ້ ແລະທ່ານສາມາດ ສະໜອງໃຫ້ ປະຊາຊົນຊາວຊີເຣຍ ມີການໂອນອຳ ນາດ.”
ປະເທດທັງສອງໄດ້ຕົກລົງກັນກ່ຽວກັບບາດກ້າວຕ່າງໆເພື່ອປ້ອງກັນບໍ່ໃຫ້ກຳລັງຂອງລັດ ຖະບານຊີເຣຍ ໃຊ້ເຮືອບິນໂຈມຕີບ່ອນທີ່ພວກຕໍ່ຕ້ານມີໜ້າ ແລະເຂດອື່ນໆອີກທີ່ມີການຕົກລົງກັນ.
ທ່ານ Kerry ກ່າວຕື່ມວ່າ “ອີງຕາມຂໍ້ມູນທີ່ມີທັງໝົດແລ້ວ ການໂຈມຕີທາງອາກາດຂອງ Assad ແມ່ນສາເຫດສຳຄັນໃນການບາດເຈັບລົ້ມຕາຍຂອງພົນລະເຮືອນແລະການອົບ ພະຍົບຫຼົບໄພ ຊຶ່ງເປັນການລະເມີດທີ່ເກີດຂຶ້ນເລື້ອຍໆໃນການສູ້ລົບກັນ. ການຍຸຕິການປະຕິບັດງານທາງທະຫານທັງໝົດຂອງອຳນາດການປົກຄອງ ຢູ່ໃນເຂດສຳຄັນຕ່າງໆທີ່ ໄດ້ກຳນົດໄວ້ ຄວນຈະເປັນການສິ້ນສຸດໃນການຖິ້ມລະເບີດຖັງແລະການຖິ້ມລະເບີດລົງໃສ່ແບບບໍ່ມີການຈຳແນກຕໍ່ພົນລະເຮືອນຢູ່ຕາມຄຸ້ມຄ່າງໆ.”
ທ່ານ Kerry ກ່າວວ່າ ນີ້ອາດຈະ “ປ່ຽນແປງລັກສະນະຂອງການຂັດແຍ້ງ.”
ສ່ວນທ່ານ Lavrov ກ່າວວ່າ ທ່ານໄດ້ແຈ້ງໃຫ້ລັດຖະບານຊີເຣຍຊາບແລ້ວ ກ່ຽວກັບການ ຈັດແຈງແລະອຳນາດການປົກຄອງ Bashar al-Assad ກໍພ້ອມແລ້ວທີ່ຈະປະຕິບັດຕາມຂໍ້ຕົກລົງນີ້.
