ຂົງເຂດອາກຕິກໄດ້ປະສົບກັບລະດູຮ້ອນ ທີ່ອົບອຸ່ນທີ່ສຸດ ເປັນປະຫວັດການໃນປີນີ້, ເຊິ່ງໄດ້ເຮັດໃຫ້ເກີດໄຟໄໝ້ປ່າທີ່ຜິດປົກກະຕິ ແລະແຜ່ນນ້ຳກ້ອນລະລາຍ ໃນຂະນະທີ່ໄພຂົ່ມຂູ່ຢູ່ໃນທົ່ວໂລກພົບກັບບັນຫາ ລວມມີລະດັບນ້ຳທະເລທີ່ສູງຂຶ້ນ, ອີງຕາມລາຍງານຂອງສະຫະລັດ ທີ່ໄດ້ເປີດເຜີຍ ໃນວັນອັງຄານວານນີ້.
ອຸນຫະພູມຄວາມຮ້ອນໃນລະດູຮ້ອນຢູ່ບໍລິເວນອາກຕິກ ແມ່ນສູງທີ່ສຸດນັບຕັ້ງແຕ່ຢ່າງຫນ້ອຍຊຸມປີ 1900 ໃນຂະນະທີ່ຂົງເຂດອາກຕິກ ຍັງສືບຕໍ່ມີຄວາມອົບອຸ່ນຂຶ້ນໄວເປັນສອງເທົ່າຂອງໂລກ ເນື່ອງຈາກການປ່ຽນແປງທາງດິນຟ້າອາກາດທີ່ເກີດຈາກມະນຸດ, ອີງຕາມລາຍງານກ່ຽວກັບຂົງເຂດອາກຕິກ ຂອງອົງການຄຸ້ມຄອງມະຫາສະຫມຸດ ແລະບັນຍາກາດແຫ່ງຊາດ ຫຼື NOAA ປະຈໍາປີ 2023.
ບົດລາຍງານປະຈໍາປີໄດ້ສະແດງໃຫ້ເຫັນເຫດການກ່ຽວກັບສະພາບອາກາດຮ້າຍແຮງທີ່ເກີດຂຶ້ນເລື້ອຍໆ ເຊິ່ງມີຜົນກະທົບຢູ່ໃນທົ່ວໂລກ.
ອາກາດຮ້ອນພວມປົກຄຸມບາງເຂດໃນພາກເຫນືອຂອງການາດາ ແລະ ບັນດາໝູ່ເກາະອາກຕິກຂອງການາດາ ກໍມີເຫດການເກີດຂຶ້ນຄ້າຍຄືກັນເຊັ່ນປະລິມານ ນໍ້າຝົນທີ່ຕົກລົງມາຕໍ່າກວ່າປົກກະຕິຢູ່ບໍລິເວນພື້ນທີ່ເຫຼົ່ານັ້ນ, ອັນມີສ່ວນເຮັດໃຫ້ເກີດລະດູໄຟປ່າທີ່ຮ້າຍແຮງຢູ່ທີ່ນັ້ນ.
ເກາະກຣີນແລນ ສູນເສຍແຜ່ນນໍ້າກ້ອນ 350 ພັນຕື້ປອນ ຫຼື 158.7 ຕື້ໂຕນ ຈາກແຜ່ນນ້ຳກ້ອນຂອງເກາະ, ເຊິ່ງເຮັດໃຫ້ມີທ່າອ່ຽງໃນການສູນເສຍນ້ຳກ້ອນຕໍ່ເນື່ອງນັບຕັ້ງແຕ່ປີ 1998 ເປັນຕົ້ນມາ.
