ທ່ານມິດຣອມນີ ອະດີດຜູ້ວ່າການລັດ Massachusetts ພວມທຳການໂຄສະນາຫາ
ສຽງທີ່ລັດ South Carolina ຫລື Carolina ໃຕ້ ຢູ່ໃນພາກໃຕ້ຂອງສະຫະລັດທີ່ແນໃສ່
ເພື່ອເສີມຂະຫຍາຍການສະໜັບ ສະໜຸນ ໃຫ້ທ່ານໄດ້ຮັບການແຕ່ງຕັ້ງ ເປັນຜູ້ສະມັກ
ເລືອກຕັ້ງປະທານາທິບໍດີຂອງພັກ Republican.
ທ່ານຣອມນີ ໄດ້ເລີ້ມທໍາການອອກຫາສຽງໃນລັດ South Carolina ໃນວັນພຸດວານນີ້ ລຸນຫລັງທີ່ໄດ້ຊະນະການເລືອກຕັ້ງປະທານາທິບໍດີຂັ້ນຕົ້ນຂອງພັກ Republican ໃນລັດ New Hampshire ໃໝ່ໆ ໃນວັນອັງຄານ ນຶ່ງມື້ກ່ອນນັ້ນ ໂດຍໄດ້ຮັບຄະແນນສຽງ 39%. ທ່ານ Ron Paul ສະມາຊິກສະພາຕໍ່າສະຫະລັດຈາກລັດ Texas ແມ່ນ ເປັນອັນດັບສອງ ໄດ້ຮັບຄະແນນສຽງ 23% ໃນຂະນະທີ່ທ່ານ Jon Huntsman ອະດີດເອກອັກຄະລັດຖະທູດສະຫະລັດປະຈໍາປະເທດຈີນ ມາໃນອັນດັບ 3 ໂດຍໄດ້ຮັບສຽງສະໜັບສະໜຸນ 17 ເປີເຊັນ.
ທ່ານ Newt Gingrich ອະດີດປະທານສະພາຕໍ່າສະຫະລັດ ແລະອະດີດສະມາຊິກສະພາສູງສະຫະລັດ ທ່ານ Rick Santorum ຊຶ່ງຕ່າງກໍໄດ້ຮັບຄະແນນສຽງເກືອບທໍ່ໆ ກັນເປັນທີ 4 ນັ້ນ ແມ່ນໄດ້ຮັບຄະແນນຕໍ່າກວ່າ 10% ນ້ອຍນຶ່ງ.
ພວກນັກວິເຄາະທາງການເມືອງ ເຊ່ນທ່ານ Chris Galdieri ທີ່ວິທະ ຍາໄລ St. Anselms College ໃນລັດ New Hampshire ກ່າວ ວ່າ ການເລືອກຕັ້ງປະທານາທິບໍດີຂັ້ນຕົ້ນ ໃນລັດ Carolina ໃຕ້ ທີ່ ຈະຈັດຂຶ້ນໃນວັນທີ 21 ມັງກອນນີ້ ອາດສາມາດຕັດສິນຊີ້ຂາດໄດ້ວ່າ ຄູ່ແຂ່ງຂັນໃນການເລືອກຕັ້ງຈາກພັກ Republican ຂອງທ່ານຣອມນີ ຍັງຈະສາມາດທ້າທາຍຢ່າງໜັກຕໍ່ທ່ານໄດ້ອີກຫລືບໍ່.
ເບິ່ງວີດິໂອລາຍງານຂ່າວກ່ຽວຂ້ອງເປັນພາສາອັງກິດ
