ທ່ານມິດ ຣອມນີ ພະຍາຍາມ ຫລີກລ່ຽງ ການປາໄຊ ໃນລັດ Michigan (ເບິ່ງສະໄລດ໌ກັບວີດີໂອ)

ທ່ານ​ມິດ ຣອມນີ ທີ່​ຫວັງ​ວ່າ​ຈະ​ໄດ້​ເປັນຜູ້​ສະໝັກ​ປະທານາທິບໍດີ​ສະຫະລັດ​ ຕາງໜ້າພັກ
Republican ກໍາລັງ​ພະຍາຍາມຫລີກ​ລ້ຽງການ​ປາ​ໄຊ ​ໃນ​ການ​ເລືອກ​ຕັ້ງ​ຂັ້ນ​ຕົ້ນ ​ໃນ​ລັດ
Michigan ​ບ້ານ​ເກີດ​ເມືອງ​ນອນ​ຂອງ​ທ່ານບ່ອນ​ທີ່​ທ່ານ​ເຄີຍ​ມີ​ສຽງ​ນໍາ​ໜ້າ​ຢ່າງ​ຫຼວງຫຼາຍ
ໃນ​ການ​ສໍາ​ຫລວດ​ຫາງ​ສຽງ​ປະຊາຊົນມາ​ກ່ອນ​ ​ແລະ​ເປັນບ່ອນ​ທີ່​ບິດາ​ຂອງ​ທ່ານ
ເຄີຍ​ເປັນ​ຜູ້​ປົກຄອງ​ລັດ​ທີ່​ຜູ້​ຄົນ​ນີຍົມ​ຫລາຍ​ນັ້ນ.

ການ​ແຂ່ງຂັນ​ກັນ​ໃນ​ລັດ Michigan ​ເປັນ​ນຶ່ງ​ໃນ 2 ລັດ​ທີ່​ມີ​ການ​ເລືອກຕັ້ງ​ຂັ້ນ​ຕົ້ນ​ທີ່​ສໍາຄັນ
ໃນ​ວັນ​ອັງຄານ​ມື້​ນີ້ ຂະນະ​ທີ່ພວກ​ປະຊາຊົນ​ສັງກັດ​ພັກ Republican ອອກ​ໄປ​ລົງ​ຄະ​ແນນ
ສຽງ​ເລືອກ​ຕັ້ງ​ເອົາ​ຜູ້​ສະໝັກຂອງ​ພັກ​ຂອງ​ຕົນ ​ເພື່ອຈະ​ໄປ​ແຂ່ງຂັນ​ກັບ​ປະທານາທິບໍດີ ບາຣັກ ​
ໂອ​ບາມາ ສັງກັດ​ພັກ​ເດ​ໂມ​ແກຣັດ ​ໃນ​ການ​ເລືອກ​ຕັ້ງ​ປະທານາທິບໍດີ​ສະຫະລັ​ດໃນ​ເດືອນ
​ພະຈິກ​ປີ​ນີ້.

ທ່ານຣອມນີ ອະດີດ​ຜູ້​ປົກຄອງ​ລັດ Massachusetts ກໍາລັງ​ປະ​ເຊີນກັບ​ຄວາມ​ຫຍຸ້ງຍາກ
ໃນ​ການ​ທີ່​ຈະ​ໄດ້​ຮັບ​ສຽງ​ສະໜັບສະໜຸນ​ຈາກ​ພວກນິຍົມ​ແນວທາງ​ເດີມທາງ​ດ້ານ​ສັງຄົມ​ນັ້ນ.
ພວກ​ຜູ້​ປ່ອນ​ບັດ​ນິຍົມ​ແນວທາງ​ເດີມ​ເຫລົ່າ​ນີ້ ​ກໍາລັງ​ໃຫ້ການ​ສະໜັບສະໜຸນ ​ຕໍ່​ທ່ານ Rick
Santorum ອະດີດ​ສະມາຊິກ​ສະພາ​ສູງ​ສະຫະລັດ​ຈາກ​ລັດ Pennsylvania.

ການ​ສໍາ​ຫລວດ​ຫາງ​ສຽງ​ປະຊາຊົນ ​ສະ​ແດງ​ໃຫ້​ເຫັນ​ວ່າ ຄູ່​ແຂ່ງຂັນ​ທັງ​ສອງ​ທ່ານ​ມີ​ສຽງ​ສະ
ໜັບສະໜຸນ​ເກືອບ​ເທົ່າໆ​ກັນ​ແຕ່​ທ່ານ Ron Paul ສະມາຊິກ​ສະພາ​ຕໍ່າ​ສະຫະລັດ​ຈາກ​ລັດ
Texas ​ແລະ​ອະດີດ​ປະທານ​ສະພາ​ຕໍ່າ​ສະຫະລັດ​ທ່ານ Newt Gingrich ຊຶ່ງທັງ​ສອງມີ​ສຽງ​
ຫ່າງໆ ລາກ​ຫລັງຫຼາຍ. ພວກ​ຜູ້​ສະໝັກ​ແຂ່ງຂັນເຫລົ່າ​ນີ້ ສາມາດ​ແບ່ງປັນ​ຄະນະຜູ້​ຕາງໜ້າ​
ຂອງ​ລັດ​ໄດ້ ​ເພາະວ່າລັດ Michigan ຈະ​ແບ່ງປັນ​ຈໍານວນ​ຜູ້ຕາງໜ້າ​ຂອງ​ລັດ​ ອິງ​ຕາມ​ສັດ
ສ່ວນ​ຂອງ​ຈໍານວນ​ຄະ​ແນນ​ສຽງ​ທີ່​ພວກຄູ່​ແຂ່ງຂັນເຫລົ່າ​ນີ້​ໄດ້​ຮັບ​ນັ້ນ.

ສ່ວນ​ໃນ​ລັດ Arizona ​ໃນ​ພາກ​ຕາ​ເວັນ​ຕົກ​ສຽງ​ໃຕ້​ ຂອງ​ສະຫະລັດ​ນັ້ນ ຜູ້​ໃດ​ຊະນະ​ຈະ​ໄດ້​
ຮັບ​ຈໍານວນ​ຜູ້ຕາງໜ້າ​ຂອງ​ລັດ​ທັງ​ໝົດຊຶ່ງ​ການ​ສໍາຫຼວດ​ຫາງ​ສຽງ​ປະຊາຊົນ​ສະ​ແດງ​ໃຫ້​ເຫັນ
ວ່າ ທ່ານຣອມນີມີ​ສຽງ​ນໍາໜ້າ​ຢ່າງ​ຂາດ​ຮອຍ​ເໜືອ​ທ່ານ Santorum.

ການ​ເລືອກ​ຕັ້ງ​ຂັ້ນ​ຕົ້ນໃນ​ມື້​ນີ້ ​ມີ​ຂຶ້ນ​ໃນ​ເວລາ​ນຶ່ງ​ສັບປະດາ​ກ່ອນການເລືອກ​ຕັ້ງ​ຂັ້ນ​ຕົ້ນ​ທີ່​ມີ
ການ​ຄາດ​ກັນ​ໄວ້​ລ່ວງ​ໜ້າ​ຢ່າງ​ຫລວງຫລາຍ ທີ່​ເອີ້ນ​ກັນ​ວ່າ “Super Tuesday” ​ເວລາ
10 ລັດ​ຈັດການ​ແຂ່ງຂັນຂັ້ນ​ຕົ້ນ​ເພື່ອ​ສະ​ເໜີແຕ່ງ​ຕັ້ງ​ຜູ້​ສະໝັກເຂົ້າ​ແຂ່ງຂັນ​ປະທານາທິບໍດີ​
ສະຫະລັດ​ນັ້ນ.

ເບິ່ງວີດີໂອກ່ຽວຂ້ອງ