ທ່ານ Jon Huntsman ຄູ່ແຂ່ງຂັນໃນການເລືອກຕັ້ງປະທານາທິບໍດີສະຫະລັດຈາກພັກ
ຣີພັບບລິກັນ ທີ່ປະອຸປສັກຫລາຍນັ້ນ ໄດ້ຮັບການສະໜັບສະໜູນຈາກໜັງສືພິມທີ່ສໍາຄັນ
ຂອງສະຫະລັດ ໃນຂະນະທີ່ບັນດາຜູ້ສະມັກເລືອກຕັ້ງທັງຫລາຍກະກຽມໃສ່ການແຂ່ງຂັນ
ເປັນຜູ້ຖືກແຕ່ງຕັ້ງຈາກພັກຣີພັບບລິກັນໃນລັດ New Hampshire ຢູ່ທາງຕາເວັນອອກ
ສຽງເໜືອຂອງສະຫະລັດ.
ໜັງສືພິມ Boston Globe ໄດ້ຍົກສູງຄຸນນະວຸດທິຂອງອະດີດຜູ້ປົກຄອງລັດຢູທາ ແລະ
ເວົ້າວ່າທ່ານ Huntsman ເປັນ “ຜູ້ສະມັກ ທີ່ດີທີ່ສຸດໃນປະຫວັດຂອງພັກຣີພັບບລິກັນ
ທີ່ຈະຍາດເອົາໂອກາດອັນສໍາຄັນນີ້ໄດ້” ແລະກໍເປັນຜູ້ທີ່ໄດ້ຮັບການກຽມຕົວດີທີ່ສຸດທີ່ຈະ
ເປັນປະທານາທິບໍດີ.
ໜັງສືພິມ ທີ່ມີສໍານັກງານຕັ້ງຢູ່ລັດ Massachusetts ໄດ້ກ່າວຢູ່ໃນບົດບັນນາທິການຂອງ
ຕົນ ທີ່ພິມເຜີຍແຜ່ໃນວັນສຸກມື້ນີ້ວ່າ ທ່ານ Huntsman ມີສາຍຕາກວ້າງໄກໃນບັນຫາຕ່າງໆ
ເຊ່ນ ດ້ານພະລັງງານທີ່ນໍາຄືນມາໃຊ້ໄດ້, ການສຶກສາ ແລະເລື້ອງຄົນເຂົ້າເມືອງ.
ໜັງສືພິມດັ່ງກ່າວຍັງເອີ້ນປະສົບການຂອງທ່ານ Huntsman ໃນການເປັນເອກຄະລັດ
ຖະທູດປະຈໍາຈີນ ພາຍໃຕ້ລັດຖະບານຂອງທ່ານ ໂອບາມານັ້ນວ່າ “ເປັນຄຸນນະວຸດທິທີ່ມີ
ຄວາມໝາຍອັນເລິກເຊິ່ງ” ທີ່ເຮັດໃຫ້ທ່ານມີ “ວິໃສທັດດ້ານເສດຖະກິດ ແລະພັນທະມິດ
ທາງຍຸດທະສາດ ໃນນະໂຍບາຍຕ່າງປະເທດທີ່ມີຄວາມເໝາະສົມຍິ່ງນັ້ນ.”
ໜັງສືພິມ The Globe ເປັນໜັງສືພິມ ທີ່ມີຄົນອ່ານຫລາຍຢູ່ໃນລັດ New Hampshire
ທີ່ຈະເປັນລັດຈັດການເລືອກຕັ້ງຂັ້ນຕົ້ນ ເອົາຜູ້ຕາງໜ້າພັກຣີພັບບລິກັນເຂົ້າຮ່ວມແຂ່ງຂັນ
ການເລືອກຕັ້ງປະທານາທິບໍດີສະຫະລັດ ຊຶ່ງກໍານົດຈະມີຂຶ້ນໃນວັນທີ 10 ເດືອນນີ້.
ໜັງສືພິມດັ່ງກ່າວຍັງໄດ້ເອີ້ນທ່ານ Huntsman ແລະທ່ານ Mitt Romney ອະດີດຜູ້ວ່າ
ການລັດ Massachusetts ວ່າ ເປັນດາວດວງເດັ່ນໃນກຸ່ມທີ່ແຂ່ງຂັນ “ເປັນປະທານາທິບໍດີ
ໄດ້ແທ້ໆ”. ແຕ່ວ່າ ໜັງສືພິມໄດ້ເວົ້າວ່າ ທ່ານ Huntsman ແມ່ນເປັນຜູ້ກ້າຫານ ໃນຂະນະ
ທີ່ເວົ້າວ່າ ທ່ານ Romney ເປັນຜູ້ທີ່ມີຄວາມຮອບຄອບ ແລະມີຍຸດທະສາດກວ່າ ໃນການ
ທີ່ຈະຊັກຊວນເອົາຜູ້ໄປເລືອກຕັ້ງ ແຕ່ງຕັ້ງເອົາຜູ້ກ່ຽວໃຫ້ເປັນຜູ້ສະມັກຈາກພັກຣີພັບບລິກັນ
ໄດ້.
ຜົນການຕິດຕາມໃນການຢັ່ງຫາງສຽງຂອງມະຫາວິທະຍາໄລ Suffolk ສໍາລັບການແຕ່ງຕັ້ງ
ໃຫ້ເປັນຜູ້ສະມັກຈາກພັກຣີພັບບລິກັນນັ້ນ ໄດ້ສະແດງໃຫ້ເຫັນວ່າ ທ່ານ Huntsman ແມ່ນ
ຢູ່ຕໍາແໜ່ງທາງທ້າຍຕິດກັບອະດີດ ໂຄສົກປະຈໍາສະພາຕໍ່າຂອງສະຫະລັດ ທ່ານ New
Gingrich ໂດຍມີຜູ້ສະໜັບສະໜູນ 7% ໃນຂະນະທີ່ທ່ານ Romney ທີ່ເປັນຜູ້ນໍາໜ້າໃນ ການແຂ່ງຂັນເປັນປະທານາທິບໍດີຈາກພັກຣີພັບບລິກັນ ເປັນຜູ້ທີ່ໄດ້ຮັບການສະໜັບສະໜຸນ
41% ຊຶ່ງເປັນຄະແນນນໍາໜ້າໝູ່ນັ້ນ.
