ນັກການທູດຂັ້ນອາວຸໂສຂອງສະຫະລັດທ່ານນຶ່ງກ່າວວ່າ ກຸງວໍຊິງຕັນແມ່ນເປີດກວ້າງສໍາລັບການດໍາເນີນການທາງການທູດກັບເກົາຫລີເໜືອ ກ່ຽວກັບໂຄງການນີວເຄລຍຂອງເກົາຫລີເໜືອທີ່ເປັນບັນຫາຂັດແຍ້ງກັນນັ້ນ ແຕ່ວ່າ ທໍາອິດທາງກຸງພຽງຢ້າງຈະຕ້ອງປະຕິບັດຕາມຄໍາໝັ້ນສັນຍາຂອງຕົນກ່ຽວກັບນີວເຄລຍທີ່ໄດ້ໃຫ້ໄວ້ ແລະປັບປຸງສາຍພົວພັນກັບເກົາຫລີໃຕ້ໃຫ້ດີຂຶ້ນເສຍກ່ອນ.
ທ່ານ Kurt Campbell ລັດຖະມົນຕີຊ່ອຍວ່າການກະຊວງການຕ່າງປະເທດສະຫະລັດ ໃຫ້ຄວາມເຫັນດັ່ງກ່າວໃນວັນພຸດມື້ນີ້ ຫລັງຈາກທໍາການໂອ້ລົມສົນທະນາກັນທີ່ກຸງໂຊນ ກັບທ່ານ Lim Sung-nam ທູດພິເສດດ້ານນີວເຄລຍຂອງເກົາຫລີໃຕ້.
ທ່ານ Campbell ກ່າວວ່າ ສະຫະລັດກໍາລັງລໍຖ້າເບິ່ງວ່າ ທ່ານກິມຈົງອຸນ ຜູ້ນໍາຄົນໃໝ່ຂອງເກົາຫລີເໜືອຕຽມພ້ອມແລ້ວຫລືບໍ ເພື່ອຈະເອົາບາດກ້າວຕ່າງໆທີ່ຈໍາເປັນ ກ່ອນການພົບປະເຈລະຈາເລື້ອງການປົດອາ ວຸດນີວເຄລຍເກົາຫຼີເໜືອ 6 ຝ່າຍທີ່ຕົກຢູ່ໃນສະພາບບໍ່ໄປບໍ່ມາດົນນານ ແລ້ວນັ້ນ ສາມາດໄຂຄືນໄດ້ນັ້ນ.
ສະຫະລັດແລະເກົາຫລີໃຕ້ໄດ້ຢືນຢັດໃຫ້ກຸງພຽງຢ້າງ ປະລະຖິ້ມໂຮງ ງານຫລອມທາດຢູເຣນຽມຂອງຕົນ ອັນເປັນເງື່ອນໄຂລ່ວງໜ້າສໍາລັບການຟື້ນການພົບປະເຈລະຈາກັນຄືນນັ້ນ.
ນາຍົກລັດຖະມົນຕີເກົາຫລີໃຕ້ ທ່ານ Kim Hwang-sik ກ່າວໃນວັນ ພຸດມື້ນີ້ວ່າ ການເຈລະຈາ 6 ຝ່າຍສາມາດໄຂຄືນໄດ້ ຖ້າຫາກເກົາຫລີ ເໜືອສະແດງໃຫ້ເຫັນຄວາມຈິງໃຈຂອງຕົນແທ້.
ນັບແຕ່ການເຖິງແກ່ອະສັນຍະກໍາຂອງມື້ລາງຜູ້ນໍາ ກິມຈົງອີລ ຂອງເກົາຫລີເໜືອທີ່ ບໍ່ຄາດໄວ້ກ່ອນໃນເດືອນທັນວາຜ່ານມາ ລູກຊາຍພ້ອມທັງ ເປັນຜູ້ສືບທອດອໍານາດຂອງທ່ານ ຄືທ່ານກິມຈົງອຸນນັ້ນ ບໍ່ໄດ້ສະແດງຮ່ອງຮອຍໃດໆໃຫ້ເຫັນວ່າ ທ່ານຈະທໍາການຍິນຍອມ ເພື່ອປັບປຸງສາຍພົວພັນກັບປະເທດອື່ນໆໃນໂລກໃຫ້ດີຂຶ້ນນັ້ນ.
ແຕ່ໃນຫວ່າງບໍ່ເທົ່າໃດສັບປະດາຜ່ານມານີ້ ທາງກຸງພຽງຢ້າງໄດ້ກ່າວ ແຍ້ມອອກມາວ່າ ຕົນເປີດກວ້າງໃນການງົດໂຄງການຫລອມທາດຢູເຣນຽມຂອງຕົນໄວ້ ຖ້າຫາກຕົນສາມາດໄດ້ຮັບການຊ່ອຍເຫລືອເຂົ້າ ປາອາຫານທີ່ຕົນຕ້ອງການທີ່ສຸດຈາກສະຫະລັດນັ້ນ.
