400 ວັນ ແມ່ນຄວາມດົນທີ່ນັກຂ່າວຊາວ ອາເມຣິກັນ ທ່ານ ເອແວນ ເກີສໂຄວິດຈ໌ ຖືກຂັງໃນຄຸກໃນ ຣັດເຊຍ.
ອົງການບໍລິການດ້ານຄວາມປອດໄພລັດຖະບານກາງຂອງ ຣັດເຊຍ ໄດ້ຄວບຄຸມຕົວລາວໃນເວລາທີ່ລາວເຮັດວຽກໃຫ້ໜັງສືພິມຂອງສະຫະລັດ Wall Street Journal ໃນເມືອງ ເຢກາເຕຣິນເບີກ ແລະ ໄດ້ກ່າວຫາລາວໃນຂໍ້ຫາກ່ຽວກັບການສອດແນມ.
ທາງໜັງສືພິມ ແລະ ລັດຖະບານ ສະຫະລັດ ໄດ້ປະຕິເສດຂໍ້ກ່າວຫາຕໍ່ນັກຂ່າວຄົນດັ່ງກ່າວ ທີ່ດຽວນີ້ມີອາຍຸ 32 ປີ.
ເອກອັກຄະລັດຖະທູດ ສະຫະລັດ ທ່ານນາງ ລິນດາ ທອມມາສ-ກຣີນຟີລດ໌ ໄດ້ກ່າວໃນວັນພະຫັດວານນີ້ ຢູ່ງານທີ່ຖືກຈັດຂຶ້ນໂດຍ ສະຫະລັດ ໃນຄືນກ່ອນວັນເສລີພາບໃນການນຳສະເໜີຂ່າວໂລກ ທີ່ບັນດານັກຂ່າວມັກຈະຖືກຈັບຢ່າງບໍ່ຖືກຕ້ອງສຳລັບ “ການບອກຄວາມຈິງພຽງເທົ່ານັ້ນ.”
ທ່ານນາງໄດ້ກ່າວວ່າ “ນັ້ນແມ່ນຄວາມຜິດທາງອາຍາຂອງ ທ່ານ ເອແວນ. ລາຍງານຂໍ້ເທັດຈິງກ່ຽວກັບສົງຄາມທີ່ຜິດກົດໝາຍຂອງ ຣັດເຊຍ ໃນ ຢູເຄຣນ.”
ຣັດເຊຍ ໄດ້ເປີດການບຸກລຸກເຕັມອັດຕາໃນ ຢູເຄຣນ ເມື່ອເດືອນມີນາ 2022. ທ່ານ ເກີສໂຄວິດຈ໌ ໄດ້ຖືກຈັບນຶ່ງວັນຫຼັງຈາກໄດ້ເປີດເຜີຍລາຍງານກ່ຽວກັບ ວິທີທີ່ສົງຄາມດັ່ງກ່າວໄດ້ກະທົບຕໍ່ເສດຖະກິດຂອງ ຣັດເຊຍ.
ທ່ານນາງ ທອມມາສ-ກຣີນຟີລດ໌ ໄດ້ກ່າວວ່າ ລັດຖະບານທ່ານ ໄບເດັນ ຈະບໍ່ຢູ່ລ້າໆຈົນກວ່າທ່ານ ເກີສໂຄວິດຈ໌ ໄດ້ກັບມາລວມຕົວກັບຄອບຄົວຂອງລາວຄືນ. ພໍ່ແມ່ ແລະ ນ້ອງສາວຂອງລາວ ກໍໄດ້ໄປຮ່ວມງານດັ່ງກ່າວນັ້ນ.
ທ່ານນາງ ມາເຣຍນາ ແຄັດຊາໂຣວາ, ຜູ້ລາຍງານພິເສດຂອງອົງການສະຫະປະຊາຊາດ ກ່ຽວກັບສະຖານະການສິດທິມະນຸດໃນສະຫະພັນ ຣັດເຊຍ, ໄດ້ກ່າວໃນການເຕົ້າໂຮມກັນຜ່ານທາງວິດີໂອຈາກປະເທດ ບຸລກາເຣຍ ວ່າ ທ່ານນາງມີຄວາມເປັນຫ່ວງຫຼາຍທີ່ ທ່ານ ເກີສໂຄວິດຈ໌ ຖືກຂັງດົນກວ່ານຶ່ງປີ ໂດຍປາສະຈາກການດຳເນີນຄະດີ ຫຼື ຫຼັກຖານ.
ຟໍຣັມສະແດງຄວາມຄິດເຫັນ