ລິ້ງ ສຳຫລັບເຂົ້າຫາ

logo-print

ສະຫະລັດ ແລະອີຣ່ານ ເຫັນວ່າ ການເຈລະຈາທາງອ້ອມ ເປັນການພົບປະທີ່ມີລັກສະນະສ້າງສັນ


ຮອງເລຂາທິການນໃຫຍ່ຂອງ EEAS, ທ່ານ Enrique Mora ແລະຮອງລັດຖະມົນຕີກະຊວງການຕ່າງປະເທດອີຣ່ານ, ທ່ານ Abbas Araghchi ລໍຖ້າໃຫ້ກອງປະຊຸມຂອງຄະນະກໍາມະການຮ່ວມ JCPOA ຢູ່ນະຄອນ Vienna ໄຂຂຶ້ນໃນວັນທີ 6 ເມສາ 2021 (ພາບໂດຍ EU Delegation in Vienna/via Reuters)

ເຈົ້າໜ້າທີ່ສະຫະລັດແລະອີຣ່ານກຳລັງເອີ້ນການເຈລະຈາກັນ ໃນນະຄອນວຽນນານັ້ນວ່າ ມີປະສິດທິຜົນຂະນະທີ່ທັງສອງຝ່າຍ ແລະຜູ້ລົງນາມອື່ນໆຢູ່ໃນຂໍ້ຕົກ ລົງປີ 2015 ກ່ຽວກັບໂຄງການນິວເຄຼຍຂອງອີຣ່ານ ກໍາລັງເຮັດວຽກເພື່ອຟື້ນຟູຂໍ້ຕົກລົງດັ່ງກ່າວ.

ໂຄສົກກະຊວງການຕ່າງປະເທດສະຫະລັດ, ທ່ານ ເນດ ໄພຣສ໌ (Ned Price) ກ່າວວ່າ ບໍ່ຄາດວ່າຈະມີການເຈລະຈາໂດຍກົງ ໃນເວລານີ້, ແຕ່ສະຫະລັດແມ່ນ “ເປີດໂອກາດໄວ້ໃຫ້ ການເຮັດແນວນັ້ນ ເພາະວ່າພວກເຮົາເປີດປະຕູໃຫ້ໃຊ້ວິທີການທາງການທູດ.”

ທ່ານກ່າວວ່າ ກອງປະຊຸມຕ່າງໆ ທີ່ນະຄອນວຽນນາ “ແມ່ນບາດກ້າວທີ່ມີປະໂຫຍດຫລາຍເທົ່າທີ່ພວກເຮົາຊອກຫາທາງເພື່ອກຳນົດວ່າ ແມ່ນຫຍັງທີ່ຊາວອີຣ່ານໄດ້ກຽມພ້ອມຈະເຮັດ ເພື່ອຈະກັບຄືນໄປສູ່ການປະຕິບັດຕາມ” ຂໍ້ຕົກລົງທີ່ຈຳກັດໂຄງການນິວເຄຼຍຂອງອີຣ່ານ ເພື່ອເປັນການແລກປ່ຽນການຜ່ອນຜັນການຖືກລົງໂທດນັ້ນໄດ້.

ສະຫະລັດໄດ້ຖອນຕົວອອກຈາກຂໍ້ຕົກລົງດັ່ງກ່າວໃນປີ 2018 ພາຍໃຕ້ປະທາ ນາທິບໍດີ ດໍໂນລ ທຣຳ ໃນສະໄໝນັ້ນ ຊຶ່ງເປັນການກະທຳທີ່ລວມທັງການລົງ ໂທດດ້ານເສດຖະກິດຕໍ່ອີຣານ.

ເພື່ອເປັນການຕອບກັບ, ອີຣ່ານໄດ້ເລີ່ມບໍ່ປະຕິບັດຕາມຄຳໝັ້ນໝາຍຂອງຕົນໃນຂະນະທີ່ປະເທດດັ່ງກ່າວ ສະແຫວງຫາທາງຖືກປົດເປື້ອງອອກຈາກການລົງໂທດ, ລວມທັງການເກັບສະສົມທາດຢູເຣນຽມ ທີ່ໄດ້ຮັບການກັ່ນແລ້ວ ໄວ້ຫຼາຍກວ່າເກົ່າແລະກໍກັ່ນວັດຖຸດິບດັ່ງກ່າວໃຫ້ມີລະດັບສູງກວ່າເກົ່າ. ທັງສອງຝ່າຍໄດ້ສະແດງອອກເຖິງຄວາມຍິນດີທີ່ຈະກັບຄືນໄປສູ່ການປະຕິບັດຕາມຂໍ້ຕົກລົງຢ່າງເຕັມທີ່, ແຕ່ບໍ່ມີຄວາມປາຖະໜາທີ່ຈະເປັນຜູ້ເອົາບາດກ້າວທຳອິດ.

ຮອງລັດຖະມົນຕີຕ່າງປະເທດອີຣ່ານ, ທ່ານ ແອບບາສ ອາແຣກຄີ (Abbas Araghchi) ກ່າວວ່າ ການເປີດການເຈລະຈາໃນວັນອັງຄານຜ່ານມາ ແມ່ນ "ການພົບປະທີ່ມີລັກສະນະສ້າງສັນ."

ປະທານາທິບໍດີອີຣ່ານ, ທ່ານຮາຊຊານ ຣູຮານີ (Hassan Rouhani) ກ່າວຕື່ມ ຢູ່ໃນກອງປະຊຸມຄະນະລັດຖະມົນຕີ ໃນວັນພຸດວານນີ້ວ່າ ການເຈລະຈາດັ່ງກ່າວແມ່ນເປັນ “ພາກໃໝ່” ແລະເວົ້າວ່າທຸກຝ່າຍທີ່ກ່ຽວຂ້ອງລ້ວນແຕ່ຮັບຮູ້ວ່າ ຂໍ້ຕົກ ລົງດັ່ງກ່າວ ເຊິ່ງເອີ້ນວ່າແຜນການປະຕິບັດງານຮ່ວມກັນຢ່າງຮອບດ້ານ ແມ່ນວິທີທາງດຽວເທົ່ານັ້ນ ທີ່ຈະກ້າວໄປຂ້າງໜ້າໄດ້.

ອ່ານຂ່າວນີ້ເພີ້ມເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG