ສະຫະລັດອີກເທື່ອນຶ່ງ ໄດ້ສົ່ງເຮືອບິນຖິ້ມລະເບີດ ບິນຜ່ານທະເລຈີນໃຕ້ ທີ່ມີການຂັດ
ແຍ້ງກັນ ໃນອາທິດນີ້ ຊຶ່ງເຈົ້າໜ້າທີ່ສະຫະລັດ ໄດ້ເປີດເຜີຍໃນວັນພຸດວານນີ້ວ່າ ການ
ເຄື່ອນໄຫວດັ່ງກ່າວ ມີທ່າທາງວ່າຈະເຮັດໃຫ້ຄວາມເຄັ່ງຕຶງທີ່ມີຢູ່ແລ້ວ ລະຫວ່າງວໍຊິງ
ຕັນແລະປັກກິ່ງ ເພີ້ມທະວີຂຶ້ນຕື່ມ. ນີ້ແມ່ນເທື່ອທີ 2 ເປັນຢ່າງໜ້ອຍໃນເດືອນນີ້ ທີ່ສະ
ຫະລັດ ໄດ້ສົ່ງເຮືອບິນຖິ້ມລະເບີດ ໃຫ້ບິນຜ່ານເຂດດັ່ງກ່າວ.
ຈີນໄດ້ອ້າງເອົາກຳມະສິດ ມາເປັນເວລາດົນນານແລ້ວ ຢູ່ໃນບໍລິເວນສ່ວນໃຫຍ່ຂອງ
ທະເລຈີນໃຕ້ ອັນເປັນເສັ້ນທາງການຄ້າ ລະຫວ່າງປະເທດທີ່ສຳຄັນ ຊຶ່ງໃນແຕ່ລະປີ
ຈະມີການຂົນສົ່ງສິນຄ້າໃນມູນຄ່າຫຼາຍໆພັນລ້ານໂດລາ ຜ່ານຂົງເຂດດັ່ງກ່າວ ແລະ
ອາດມີຊັບພະຍາກອນແລະແຮ່ທາດທີ່ຍັງບໍ່ທັນມີການຂຸດຄົ້ນເທື່ອໃນມູນຄ່າອີກຫຼາຍ
ພັນລ້ານໂດລາ.
ບໍລິເວນທີ່ຈີນອ້າງເອົາກຳມະສິດ ແມ່ນເລີ້ມແຕ່ ເຂດແຄມຝັ່ງທະເລ ກ້ຳໃຕ້ຂອງຕົນ
ໂດຍຈະບັນຈົບແລະບາງທີກໍກວມກັນກັບແຄມຝັ່ງຂອງໄຕ້ຫວັນ ຫວຽດນາມ ມາເລ
ເຊຍ ບຣູນາຍ ແລະຟິລິບປິນ ຊຶ່ງທັງໝົດ ຕ່າງກໍອ້າງເອົາກຳມະສິດ ໃນພາກສ່ວນທີ່
ນ້ອຍໆຂອງຕົນ ຢູ່ໃນເຂດດັ່ງກ່າວ.
ຈີນໂຕ້ແຍ້ງວ່າ ຕົນມີອະທິປະໄຕເໜືອດິນແດນແຫ່ງນີ້ ຢ້ອນຄືນໄປເມື່ອຫຼາຍຮ້ອຍ
ປີກ່ອນ ຊຶ່ງໄດ້ອອກແຜນທີ ເປັນເທື່ອທຳອິດ ສະແດງໃຫ້ເຫັນວ່າ ດິນແດນດັ່ງກ່າວ
ເປັນຂອງຕົນໃນຊຸມປີ 1940. ຈີນໄດ້ໃຊ້ເວລາຫຼາຍໆປີເພື່ອປົກປ້ອງການອ້າງເອົາ
ກຳມະສິດຂອງຕົນ ໂດຍສ້າງຄ້າຍທະຫານໃສ່ເກາະດອນທຽມທີ່ຕົນສ້າງຂຶ້ນ ໂດຍ
ມີກຳປັ່ນຂອງກອງທັບເຮືອ ເຮືອບິນຖິ້ມລະເບີດນິວເຄລຍແລະເຮືອບິນລົບອາຍພົ່ນ
ພຽບພ້ອມ.
ສະຫະລັດ ໄດ້ພະຍາຍາມ ທີ່ຈະສົ່ງກຳປັ່ນລົບ ແລະເຮືອບິນ ໄປລົບກວນຈີນຢູ່ໃນ
ເຂດທະເລຈີນໃຕ້ ໃນການປະຕິບັດງານ ທີ່ເອີ້ນວ່າ “ອິດສະຫຼະພາບໃນການເດີນ
ເຮືອ” ໂດຍບໍ່ເອົາຫົວຊາ ຕໍ່ການອ້າງກຳມະສິດຂອງຈີນ.