ລັດຖະມົນຕີກະຊວງປ້ອງກັນປະເທດສະຫະລັດ ທ່ານ Ash
Carter ແມ່ນກຳລັງພົບປະກັບນາຍົກລັດຖະມົນຕີ Israel
ທ່ານ Benjamin Netanyahu ເພື່ອໂອ້ລົມສົນທະນາ ທີ່ມີຂຶ້ນ
ນຶ່ງອາທິດຫລັງຈາກການບັນລຸຂໍ້ຕົກລົງກ່ຽວກັບໂຄງການອາວຸດ
ນິວເຄລຍອີຣ່ານ ທີ່ທ່ານ Netanyahu ຄັດຄ້ານຢ່າງແຂງຂັນ.
ທ່ານ Carter ຫາທາງໃຫ້ການຄ້ຳປະກັນແກ່ Israel ໃນວັນຈັນ
ວານນີ້ ໂດຍເອີ້ນປະເທດ ດັ່ງກ່າວວ່າ ເປັນຖານຍຸດທະສາດ
ອາເມຣິກາໃນພາກຕາເວັນອອກກາງ.
ທ່ານ Netanyahuໄດ້ ກ່າວຢ່າງເປີດເຜີຍຕໍ່ຕ້ານການເຈລະຈາ
ກ່ຽວກັບໂຄງການອາວຸດນິວເຄລຍຕະຫລອດທັງຂັ້ນຕອນການປະຕິບັດງານ ແລ້ວໄດ້ກ່າວໃນສັບປະດາທີ່ແລ້ວນີ້ ຫຼັງຈາກທີ່ສະຫະລັດ ອັງກິດ ຈີນ ຝຣັ່ງ ຣັດເຊຍ ແລະເຢຍຣະມັນ ທີ່ໄດ້
ບັນລຸຂໍ້ຕົກລົງ ທີ່ມີ ການຄອງຄອຍຖ້າມານານນັ້ນວ່າ ມັນເປັນ “ການຜິດພາດທີ່ໃຫຍ່ຫຼວງເປັນປະວັດການ.”
ສະພາຄວາມໝັ້ນຄົງອົງການສະຫະປະຊາຊາດ ໄດ້ໃຫ້ການອະນຸມັດຕໍ່ຂໍ້ຕົກລົງທີ່ວ່ານີ້ ຢ່າງເປັນເອກກະສັນ ໃນວັນຈັນວານນີ້ ຊຶ່ງໄດ້ເຮັດໃຫ້ມີການຕຳນິຕິຕຽນເພີ້ມຕື່ມ ຈາກເອກອັກຄະລັດຖະທູດຂອງ Israel ປະຈຳອົງການສະຫະປະຊາຊາດທ່ານ Ron Prosor ຊຶ່ງທ່ານໄດ້ເອີ້ນຂໍ້ຕົກລົງດັ່ງກ່າວນີ້ວ່າ ເປັນໄພພິບັດ.
ທ່ານ Prosor ໄດ້ກ່າວວ່າ: “ອິຣ່ານ ຈະມີຫງົບປະມານໃນການສະໜັບສະນຸນກຸ່ມກໍ່ການຮ້າຍ 150 ພັນລ້ານໂດລ່າ ຊຶ່ງມີເງິນຈຳນວນເທົ່າໃດ ທີ່ສົ່ງໄປສະໜັບສະໜຸນກຸ່ມ Hezbollad ແລະກຸ່ມ Hamas? ມີເງິນຈຳນວນຫຼາຍປານໃດຈະໄປຊ່ອຍທ່ານ Assad? ແລະຍັງມີເງິນອີກຫຼາຍປານໃດ ທີ່ຈະເຂົ້າໄປຊ່ອຍກິດຈະກຳຂອງກຸ່ມກໍ່ການຮ້າຍໃນທົ່ວໂລກ.”
ເອກອັກຄະລັດຖະທູດຂອງສະຫະລັດ ປະຈຳອົງການສະຫະປະຊາຊາດ ທ່ານນາງ Samantha Power ໄດ້ກ່າວສັນລະເສີນສະພາຄວາມໝັ້ນຄົງອົງການສະຫະປະຊາຊາດທີ່ຖືວ່າ ເປັນການທົດສອບທາງການທູດ,” ໃນຂະນະດຽວກັນນີ້ ກໍກ່າວເພີ້ມຕື່ມວ່າ ຂໍ້ຕົກລົງທີ່ວ່ານີ້ ບໍ່ໄດ້ເຮັດໃຫ້ຄວາມກັງວົນຂອງຊາວອາເມຣິກັນໝົດໄປ ກ່ຽວກັບອີຣ່ານ. ທ່ານນາງໄດ້ກ່າວວ່າ ຄວາມເປັນຫວ່ງກັງວົນທີ່ວ່ານີ້ ແມ່ນຮວມທັງການລະເມີດສິດທິມະນຸດ ການທີ່ອິຣ່ານໃຫ້ການສະໜັບສະໜຸນຕໍ່ກຸ່ມກໍ່ການຮ້າຍແລະໂຄງການລູກສອນໄຟຂີປະນາວຸດ.
ໃນຂະນະດຽວກັນນີ້ ລັດຖະມົນຕີການຕ່າງປະເທດຝຣັງທ່ານ Lauren Fabius ໄດ້ປະ ກາດໃນວັນອັງຄານມື້ນີ້ວ່າ, ທ່ານຈະເດີນທາງໄປຍັງອິຣ່ານ ໃນສັບປະດາໜ້າ ເພື່ອໄປຢ້ຽມຢາມ ຊຶ່ງຈະຮວມທັງການພົບປະກັບປະທານາທິບໍດີ Hassan Rouhani. ທ່ານ Fabius ໄດ້ກ່າວໃນສັບປະດາແລ້ວນີ້ວ່າ ຄູ່ຕຳແນ່ງຝ່າຍອິຣ່ານ ທ່ານ Mohammad Javad Zarif ໄດ້ເຊື້ອເຊີນທ່ານໄປຢ້ຽມຢາມນະຄອນເຕຫະຣານ ໃນຕອນສິ້ນສຸດການໂອ້ລົມກ່ຽວກັບໂຄງການນິວເຄລຍ.
ເບິ່ງວີດີໂອກ່ຽວຂ້ອງ:
