ປະທານາທິບໍດີບາຣັກໂອບາມາແຫ່ງສະຫະລັດໄດ້ບັນລຸຂໍ້ຕົກລົງກັນກັບ ຄະນະຜູ້ນໍາລັດ
ຖະສະພາ ກ່ຽວກັບຂໍ້ຕົກລົງປະນີປະນອມກັນສະບັບນຶ່ງ ເພື່ອຍົກລະດັບການກູ້ຢືມເງິນ
ຂອງປະເທດຂຶ້ນແລະປ້ອງກັນບໍ່ໃຫ້ລັດຖະບານຕົກຢູ່ໃນສະຖານນະການບໍ່ສາມາດຈ່າຍ
ໜີ້ສິນຂອງຕົນໄດ້ ຊຶ່ງບໍເຄີຍມີມາກ່ອນນັ້ນ.
ທ່ານໂອບາມາໄດ້ອອກມາຖະແຫລງຕໍ່ພວກນັກຂ່າວທີ່ທໍານຽບຂາວໃນຄືນວັນອາທິດວານນີ້
ວ່າ ຂໍ້ຕົກລົງທີ່ສະເໜີໄປນີ້ຈະຕັດຄ່າໃຊ້ຈ່າຍລົງ 1 ພັນຕື້ໂດລາໃນໄລຍະ 10 ປີຕໍ່ໜ້າ ແລະ
ຈັດຕັ້ງຄະນະກໍາມະການ ທີ່ປະກອບດ້ວຍທັງສອງພັກຂຶ້ນໃນລັດຖະສະພາ ເພື່ອຫາທາງຕັດ
ຄ່າໃຊ້ຈ່າຍລົງອີກໃຫ້ໄດ້ ຢ່າງຫລວງຫລາຍ. ທ່ານໂອບາມາກ່າວວ່າ ຄະນະກໍາມະການທີ່
ວ່ານີ້ ຈະພິຈາລະນາເບິ່ງທາງເລືອກທຸກຢ່າງ ຮວມທັງການຂຶ້ນພາສີແລະຕັດໂຄງການສະ
ຫວັດດີການສັງຄົນສົງເຄາະລົງເຊ່ນໂຄງການຮັກສາພະຍາບານຄົນເຖົ້າ Medicare ເປັນຕົ້ນ.
ສະພາຍັງຈະຕ້ອງຮັບຜ່ານຂໍ້ສະເໜີປະນີປະນອມກັນນີ້ຢູ່ ຊຶ່ງຄາດວ່າ ຈະຜ່ານຢູ່ໃນສະພາ
ສູງທີ່ພັກເດໂມກຣັດມີສຽງຂ້າງຫລາຍນັ້ນ ແຕ່ຈະປະເຊີນກັບການຄັດຄ້ານຫລາຍຂຶ້ນໃນ
ສະພາຕໍ່າ ບ່ອນທີ່ພັກຣີພັບບລິກັນມີສຽງຂ້າງຫລາຍ. ການລົງມະຕິກັນອາດສາມາດມີ
ຂຶ້ນໃນວັນຈັນ ມື້ນີ້ກໍເປັນໄດ້ ແລະຄະນະນໍາພາຈາກທັງສອງພັກໃນລັດຖະສະພາກ່າວວ່າ
ພວກເຂົາເຈົ້າຄາດວ່າຈະໄດ້ຮັບສຽງສະໜັບສະໜຸນພຽງພໍ ເພື່ອຮັບຜ່ານຂໍ້ຕົກລົງດັ່ງກ່າວ
ທີ່ຈະອໍານວຍໃຫ້ສະຫະລັດກູ້ຢືມເງິນເພີ່ມຂຶ້ນໄດ້ກາຍລະດັບ 14 ພັນ 300 ຕື້ໂດລານັ້ນ.
ປະທານາທິບໍດີໂອບາມາ ເອີ້ນຂໍ້ສະເໜີດັ່ງກ່າວເປັນການປະນີປະນອມກັນທີ່ອໍານວຍໃຫ້ປະເທດຫລີກລ່ຽງຈາກສະພາບການທີ່ບໍ່ສາມາດຈ່າຍໜີ້ສິນຂອງຕົນໄດ້ ໃນຂະນະທີ່ລົດການຂາດດຸນງົບປະມານລົງຢ່າງ ຫລວງຫລາຍນັ້ນ. ທ່ານກ່າວຕໍ່ໄປວ່າ ການທີ່ບໍ່ສາມາດຈ່າຍຄ່າໜີ້ສິນ ຂອງຕົນໄດ້ນັ້ນ ຈະສົ່ງຜົນເສຍຫາຍຢ່າງຮ້າຍແຮງໃຫ້ແກ່ເສດຖະກິດຂອງສະຫະລັດ.
ເບິ່ງວີດີໂອ ລາຍງານທີ່ກ່ຽວຂ້ອງ: ຫລາຍໆຄົນບໍ່ດີໃຈນໍາຂໍ້ຕົກລົງນີ້
