ລິ້ງ ສຳຫລັບເຂົ້າຫາ

ສະຫະລັດແລະຈີນວ່າ ການເຈລະຈາກັນ ໄດ້ຊ່ວຍ ສົ່ງເສີມຄວາມເຂົ້າໃຈ ລະຫວ່າງສອງປະເທດ

  • ທອງປານ ເທບວົງສາ

ຈາກຊ້າຍ: ທີ່ປຶກສາລັດຖະບານຈີນ Dai Bingguo, ຮອງນາຍົກລັດຖະມົນຕີຈີນ Wang Qishan, ລັດຖະມົນຕີ ຕ່າງປະເທດສະຫະລັດ Hillary Rodham Clinton ແລະລັດຖະມົນຕີການເງິນ Timothy Geithner ເຂົ້າຮ່ວມ ໃນການສົນທະນາຫາລືຍຸທະສາດ-ເສດຖະກິດ ສະຫະລັດ-ຈີນ ຫລື US-China Strategic and Economi

ສະຫະລັດແລະຈີນກ່າວວ່າ ການເຈລະຈາໃນລະດັບສູງເປັນເວລາສອງມື້ ທີ່ນະຄອນຫຼວງ ວໍຊິງຕັນຊຶ່ງເພັ່ງເລັງໃສ່ບັນຫາໃນຂອບເຂດທີ່ກວ້າງຂວາງ ຫລາຍດ້ານນັ້ນ ໄດ້ຊ່ວຍເສີມ ຂະຫຍາຍຄວາມເຂົ້າໃຈລະຫວ່າງທັງສອງປະເທດ ແລະລົງເລິກຄວາມສາມາດໃນການ ຮ່ວມມືຂອງພວກເຂົ້າເຈົ້າ ບໍ່ສະເພາະແຕ່ຢູ່ໃນຂົງເຂດເທົ່ານັ້ນແຕ່ຍັງຢູ່ໃນທົ່ວໂລກນໍາດ້ວຍ. ນອກນັ້ນ ການເຈລະຈາກັນໃນຄັ້ງນີ້ ຍັງໄດ້ເອື້ອອໍານວຍໂອກາດແກ່ທັງສອງຝ່າຍສະແດງ ອອກຊຶ່ງຄວາມແຕກຕ່າງຂອງພວກເຂົາເຈົ້າ ກ່ຽວກັບບັນຫາຕ່າງໆທີ່ ຫຼໍ່ແຫຼມສໍາຄັນ ເຊັ່ນ ບັນຫາດ້ານສິດທິມະນຸດ ແລະອຸປະສັກການເຂົ້າເຖິງ ດ້ານການຕະຫລາດຢູ່ໃນຈີນແລະໃນ ສະຫະລັດ. ຜູ້ສື່ຂ່າວວີໂອເອ ນາຍ William Ide ມີລາຍລະອຽດເພີ່ມຕື່ມກ່ຽວກັບເລື່ອງນີ້ ດັ່ງ ທອງປານ ຈະນໍາມາສະເໜີທ່ານ.

ທ່ານ​ນາງ ຮິ​ລ​ແລຣີ ຄລິນ​ຕັນ ລັດຖະມົນຕີ​ຕ່າງປະ​ເທດ
ສະຫະລັດ ກ່າວ​ວ່າ ​ໃນການໂອ້​ລົມສົນທະນາ​ກັນເລຶ່ອງ
ຍຸ​ທະ​ສາດ​ແລະ​ເສດຖະກິດ​ປະ​ຈໍາປີ​ນີ້ ຊຶ່ງ​ເປັນ​ຄັ້ງ​ທີ່​ສາມ
ລະຫວ່າງ​ສອງ​ປະ​ເທດ​ນັ້ນ ສະຫະລັດແລະ​ຈີນໄດ້​ຍົກ​ເອົາ
ບັນຫາ​ສໍາຄັນໆ​ຂຶ້ນມ​າ​ເວົ້າ​ກັນ ​ຫລາຍ​ເລື້ອງ​ກວ່າໃນ​ຄັ້ງ​
ກ່ອນໆ ​ແລະ​ວ່າ​ທັງ​ສອງ​ປະ​ເທດ​ຕ້ອງການ​ຈະເຮັດ​ໃຫ້
ການ​ເປັນ​ພາຄີ​ຂອງ​ພວກ​ຕົນ ບັນລຸ​ຜົນໃຫ້​ໄດ້ໂດຍ​ເຕັມ​.
ທ່ານ​ນາງຄລິນ​ຕັນ​ກ່າວ​ວ່າ

“ມີບັນຫາອັນສັບສົນໜ້າປວດຫົວຫລາຍໆ​ເລື້ອງ ທີ່​
ພວກ​ເຮົາ​ກໍາລັງ​ທໍາງານ​ຮ່ວມ​ກັນ ​ເພື່ອ​ຫາ​ທາງ​ແກ້​ໄຂ
ແລະ​ຂ້າພ​ະ​ເຈົ້າຮູ້ສຶກ​ພໍ​ໃຈ​ຫລາຍເພາະວ່າມັນບໍ່​ໄດ້
ເປັນ​ຈັ່ງ​ຊັ້ນເມື່ອ​ສອງ​ປີກ່ອນ ຊຶ່ງ​ຂ້າພະ​ເຈົ້າໝັ້ນ​ໃຈ​
ວ່າ​ ພວກ​ເຮົາ​ຈະ​ເຫັນ​ຄວາມ​ກ້າວໜ້າ​ຫລາຍຂຶ້ນ​ໄປ​
ເລື້ອຍໆ.”

ພວກ​ເຈົ້າໜ້າ​ທີ່​ສະຫະລັດ​ກ່າວ​ວ່າ ພວກ​ເຂົາ​ເຈົ້າໄດ້​ປຶກສາ​ຫາລື​ກັນ​ຢ່າງກົງໄປກົງມາ ​ກ່ຽວ
ກັບ​ບັນຫາ​ທ້າ​ທາຍຍືດ​ເຍື້ອບາງປະການ ທີ່​ທັງ​ສອງ​ປະ​ເທດ​ປະ​ເຊີນ​ຢູ່​ໃນ​ຂະນະ​ນີ້ ​ເຊັ່ນເລື້ອງ
ເກົາຫລີ​ເໜືອ ອິຣ່ານ ​ແລະ​ການ​ສ້າງ​ເສດຖະກິດ​ໂລກ​ໃຫ້​ສົມ​ດຸນ​ກັນ. ນອກ​ນີ້​ແລ້ວ​ ທັງ​ສອງ​
ປະ​ເທດ​ຍັງ​ໄດ້​ຍົກເອົາ​ປະ​ເດັນ​ຄວາມ​ເປັນ​ຫ່ວງ​ ກ່ຽວ​ກັບສະພາບການ​ດ້ານ​ສິດທິ​ມະນຸດ​ຢູ່​ໃນ
ຈີນ ຂຶ້ນ​ມາ​ສົນທະນາ​ກັນ. ​ໃນ​ບໍ່​ເທົ່າ​ໃດ​ເດືອນ​ຜ່ານ​ມາ​ນີ້ ລັດຖະບານ​ປັກ​ກິ່ງ​ໄດ້​ທໍາ​ການ
ກວາດ​ລ້າງ​ປາບ​ປາມຄັ້ງ​ຍິ່ງ​ໃຫຍ່​ທີ່​ສຸດ​ໃນ​ຮອບຫລາຍໆ​ປີ ຕໍ່​ພວກ​ທີ່​ຄັດຄ້ານ​ ບໍ່ພໍ​ໃຈນໍາລັດ ຖະບານ​ນັ້ນ.

ເລື້ອງການ​ເຂົ້າຫາ​ເຂົ້າ​ເຖິງ​ຕະຫລາດ​ສະຫະລັດ ຄ່າ​ເງິນຕາ​ຂອງ​ຈີນຕະຫລອດ​ທັງ​ຜົນກະທົບ​ຕໍ່​ຕະຫລາດໂລກ ​ແລະ​ເລື້ອງການ​ແຂ່ງຂັນ​ກັນ ​ກໍ​ໄດ້​ຖືກຍົກ​ຂຶ້ນມາ​ປຶກສາ​ຫາລື​ເຊັ່ນ​ກັນ. ​ແຕ່​ ວ່າ ໃນ​ລະຫວ່າງ​ການ​ເຈລະຈາກັນ​ນັ້ນ ຈີນ​ບໍ່​ໄດ້​ໃຫ້​ຄໍາ​ໝັ້ນ​ສັນຍາ​ໃດໆ​ ວ່າ​ຈະ​ປ່ຽນ​ແປງ​ນະ​ໂຍ ບາຍຂອງ​ຕົນ​ໃນການປ່ອຍ​ໃຫ້ຄ່າເງິນຕາຂອງ​ຕົນ ກໍ​ຄືເງິນຢວນ ​ຄ່ອຍໆແຂງຄ່າ​ຂຶ້ນນັ້ນ ຫລື​ບໍ່ ຊຶ່ງທາງ​ຝ່າຍ​ສະຫະລັດແມ່ນຢາກ​ເຫັນ​ຄ່າ​ເງິນຢວນ ຖີບ​ຕົວ​ສູງ​ຂຶ້ນ​ໄວ​ກວ່າ​ນັ້ນ.

ພວກ​ເຈົ້າໜ້າ​ທີ່​ຈີນ​ກ່າວ​ວ່າ ສະຫະລັດໄດ້​ຕົກລົງ​ທີ່​ປະຕິບັດ​ຢ່າງ​ຍຸດຕິ​ທໍາ ນະ​ໂຍບາຍທີ່​ວາງ​ຂໍ້​ຈໍາກັດ​ຕໍ່ການ​ສົ່ງ​ອອກ​ສິນຄ້າປະ​ເພດ​ຮາ​ຍ​ເທັກ ຫລືເທັ​ກ​ໂນ​ໂລ​ຈີ່ຂັ້ນ​ສູງ​ ໄປ​ຍັງຈີນນັ້ນ. ​ໃນ ສ່ວນ​ຂອງ​ພວກ​ເຂົາ​ເຈົ້າ​ແລ້ວ ພວກ​ເຈົ້າໜ້າ​ທີ່​ຈີນ​ກ່າວວ່າ ພວກເຂົາ​ເຈົ້າໄດ້ສັນຍາ​ທີ່​ຈະ​ເປີດ​ຕະຫລາດ ​ຂອງຕົນ ​ໃຫ້​ກວ້າງອອກຕື່ມອີກ.

ທ່ານ Dai Bingguo ທີ່​ປຶກສາ​ຄະນະລັດຖະບານ​ຈີນ ​ກ່າວ​ວ່າການເຈລະຈາ​ກັນ​ໃນ​ຮອບນີ້ ​ແມ່ນເຮັດ​ໃຫ້ການ​ສົນທະນາ​ກັນ​ເລື້ອງ​ຜົນ​ປະ​ໂຫຍດ​ຮ່ວມ​ກັນ​ຂອງ​ສະຫະລັດ​ແລະ​ຈີນ​ ​ກ້ວາງ ໃຫຍ່​ຂຶ້ນກ່ວາ​ເກົ່າ ​ແລະ​ມີ​ລົດ​ຊາດ​ກວ່າ​ເກົ່າ. ທ່ານ ​ໄດ ​ເວົ້າວ່າ:

“ຂ້າພະ​ເຈົ້າໄດ້ເວົ້າ​ແລ້ວວ່າ​ ພວກ​ເຮົາໄດ້ມີ​ການໂອ້ລົມສົນທະນາ​ທີ່​ເຂົ້າໃຈ​ກັນ​ດີ ​ແຕ່​ນັ້ນ​ກໍບໍ່​ໄດ້​ໝາຍ​ຄວາມ​ວ່າ ພວກ​ເຮົາ​ຈະ​ເຫັນ​ພ້ອມ​ກັນໃນທຸກໆ​ບັນຫາ ​ແຕ່ແນວ​ໃດ​ກໍ​ດີ ຫລັງ​ຈາກ​ການ​ເຈລະຈາ​ກັນ​ແຕ່​ລະ​ຮອບນັ້ນ ພວກ​ເຮົາແມ່ນໄດ້​ເສີມ​ຂະ​ຫຍາ​ຍຄວາມ​ເຂົ້າອົກ​ເຂົ້າ​ໃຈ​ຊຶ່ງ​ກັນ​ແລະ​ກັນ ​ແລະ​ເພີ່ມ​ຄວາມ​ໄວ້​ວາງ​ໃຈ​ຊຶ່ງ​ກັນ​ແລະ​ກັນ​ຫລາຍ​ຂຶ້ນ ​ແລະ​ຍົກ​ລະ ດັບການ​ຮ່ວມ​ມື​ຂອງ​ພວກ​ເຮົາ ຂຶ້ນ​ໄປ​ອີກ."

ທາງ​ຝ່າຍລັດຖະມົນຕີ​ກາ​ນ​ເງິນ​ສະຫະລັດ ທ່ານ ທິ​ໂມທີ ​ໄກ້​ເນີ ນັ້ນ ກ່າ​ວວ່າ ສະຫ​ະລັດ ຍິນ​ນໍາ​ການ​ລົງທຶນ​ຂອງ​ຈີນຢູ່​ໃນ​ສະຫະລັດ ຊຶ່ງທ່ານ Geithner ເວົ້າ​ວ່າ:

ລັດຖະມົນຕີການເງິນສະຫະລັດ Timothy Geithner ພົບປະກັບ ຮອງນາຍົກລັດຖະມົນຕີຈີນ Wang Qishan, ໃນລະຫວ່າງກອງປະຊຸມ ສະຫະລັດ-ຈີນ, ວັນທີ 10 ພຶດສະພາ 2011.
ລັດຖະມົນຕີການເງິນສະຫະລັດ Timothy Geithner ພົບປະກັບ ຮອງນາຍົກລັດຖະມົນຕີຈີນ Wang Qishan, ໃນລະຫວ່າງກອງປະຊຸມ ສະຫະລັດ-ຈີນ, ວັນທີ 10 ພຶດສະພາ 2011.

“ຖ້າ​ເຮົາຈະມອງເບິ່ງ​ສະພາບ​ການໃນໄລຍະ
ຫລາຍໆ​ປີ​ຕໍ່ໜ້າ ພວກ​ເຮົາ​ກໍຈະ​ເຫັນ​ວ່າການ​
ລົງ​ທຶນ​ຂອງ​ຈີນ​ ແມ່ນ​ຂະຫຍາຍ​ອອກ​ໄປ​ຢ່າງ​
ວ່ອງ​ໄວ​ຫລາຍ ຊຶ່ງ​ນີ້​ມັນກໍ​ຈະ​ເປັນ​ການ​ດີ​ສໍາ
ລັບ​ສະຫະລັດ ​ແລະ​ຈີນ​ນໍາ. ​ແນ່ນອນ​ວ່າ
ເລື່ອ​ງນີ້​ແມ່ນຖືກ​ຂັບ​ດັນ​ໂດຍ​ຄວາມ​ປາດ​ຖະ
ໜາຂອງ​ພວກ​ບໍລິສັດ​ຂອງ​ຈີນ ​ທີ່​ຢາກເຂົ້າ
ຫາ​ເຂົ້າ​ເຖິງ​ເທັກ​ໂນ​ໂລ​ຈີ່​ຂອງ​ສະຫະລັດ ​ຫລາຍເພີ່ມ​ຂື້ນ​.”

ເມື່ອ​ອາທິດ​ຜ່ານ​ມາ​ນີ້ ສະມາຄົມ​ເອ​ເຊຍ ​ໄດ້
ອອກ​ລາຍ​ງານຜົນ​ການ​ສຶກສາ​ບັ້ນ​ນຶ່ງ ກ່ຽວ
ກັບ​ການ​ລົງທຶນ​ໃນ​ຕ່າງປະ​ເທດ​ຂອງ​ຈີນ. ອີງ
ຕາມ​ຜົນ​ກາ​ນສຶກສາ​ດັ່ງກ່າວ​ນັ້ນ ຈີນ​ອາດ​ສາ
ມາດ​ລົງທຶນ​ເປັນ​ມູນ​ຄ່າ​ມະຫາສານ​ໄດ້​ເຖິງ 2
ພັນ​ຕື້​ໂດ​ລາ​ໃນ​ພວກ​ບໍລິສັດແລະ​ໂຄງການຕ່າງໆຢູ່​ໃນຕ່າງປະ​ເທດໃນໄລຍະ 10 ປີ ​ຕໍ່ໜ້າ​ນີ້.

ແນວ​ໃດ​ກໍ​ດີ ຢູ່​ໃນ​ຈີນ​ນັ້ນ ​ການ​ເຂົ້າຫາ​ເຂົ້າ​ເຖິງ​ຕະຫລາດຂອງ​ຈີນ ​ແລະ​ຄວາມຫລະ​ຫລວ​ມ
ບໍ່​ເຄ່ງ​ຄັດໃນການ​ພິທັກ​ປົກ​ປ້ອງຈໍາພວກ​ຊັບ​ສິນ​ທາງປັນຍາ ຍັງ​ເປັນ​ຄວາມຫ່ວງ​ທີ່​ເພິ່ມທະວີ​
ຂຶ້ນນັບ​ມື້​ສໍາລັບ​ຊາວ​ອາ​ເມຣິກັນ ​ແລະ​ພວກ​ບໍລິສັດຕ່າງປະ​ເທດ​ອື່ນໆ​ ຢູ່ໃນ​ຈີນນັ້ນ​.

ໃນ​ການ​ເຈລະຈາ​ຫາລື​ກັນ​ນັ້ນ ຈີນໄດ້ຕົກລົງ​ທີ່​ຈະ​ເພີ່ມ​ການ​ກວດກາການ​ຊົມ​ໃຊ້​ຊອບ​ແວ ຫລື​ລາຍການ​ຄອມ​ພິວ​ເຕີ້ ​ທີ່​ຖືກ​ຄອບ​ປີ້ຫລື​ລັກລອບ​ລຽນ​ແບບເອົາ​ມາ ​ໂດ​ຍສະ​ເພາະໃນ​ວົງ​ການ​ກະຊວງ​ທະບວງ​ກົມຕ່າງໆ​ຂອງ​ລັດຖະບານ ​ແລະ​ຈະດໍາ​ເນີນ​ມາດ​ຕະການ​ເພື່ອ​ກໍາຈັດ​ຖອນ​ຮາກ​ບັນຫານີ້ ຊຶ່ງ​ກ່ຽວກັບ​ເລື້ອງ​ນີ້ ທ່ານ ​ໄກ້​ເນີ ລັດຖະມົນຕີ​ການ​ເງິນ​ສະຫະລັດ ມີຄວາມ ​ເຫັນ​ວ່າ:

“ການ​ກະທໍາ​ເຊ່ນ​ນັ້ນ ແມ່ນ​ຈະ​ເປັນ​ການພິທັກ​ປົກ​ປ້ອງ​ພວກ​ປະດິດ​ຄິດ​ສ້າງ​ຂອງສະຫະ
ລັດ​ ​ແລະ​ພ້ອມ​ທັງ​ຂອງ​ຈີນ​ນໍາ ຢູ່​ໃນ​ທຸກວົງ​ການ​ອຸດສາຫະກໍາ​ ບໍ່​ສະ​ເພາະແຕ່ຄອມ​ພິວ​ເຕີ
ຊອບ​ແວພຽງ​ເທົ່າ​ນັ້ນ ​ແລະ​ຂ້າພະ​ເຈົ້າຄິດ​ວ່າ ​ເລຶ່ອງນີ້​ມັນ​ສໍາຄັນ​ຫລາຍ. ນອກ​ນີ້​ແລ້ວ ​ຈີນ
ຍັ​ງ​ໄດ້​ຢືນຢັນ​ວ່າ ຕົນ​ຈະ​ບໍ່ນໍາໃຊ້ວິທີການລໍາອຽງ​ຂອງ​ລັດຖະບານ ​ໃນ​ການ​ຊື້​ແຕ່ຜະລິດ
ຕະພັນ ທີ່ປະດິດສ້າງ​ໂດຍ​ຊາວ​ຈີນ​ນັ້ນອີກຕໍ່ໄປ ຢູ່ໃນທຸກລະດັບຂອງລັດຖະບານ.”

ນອກ​ເໜືອ​ຈາກ​ຂໍ້​ຕົກລົງ​ດ້ານ​ເສດຖະກິດ​ເຫລົ່າ​ນີ້​ແລ້ວ ພວກ​ເຈົ້າໜ້າ​ທີ່ສະຫະລັດ​ແລະ​ຈີນ
ກ່າວ​ວ່າ ພວກ​ເຂົາ​ເຈົ້າຈະ​ເອົາ​ບາດກ້າວເພື່ອ​ຊຸກຍູ້ ຄວາມ​ຮ່ວມ​ມື​ໃນ​ຂົງ​ເຂດ​ເອ​ເຊຍ-ປາຊິ​ຟິກ
ບ່ອນ​ທີ່​ພວກ​ເຈົ້າໜ້າ​ທີ່​ອະ​ເມຣິ​ກັນ​ມີ​ຕາຕະລາງ​ວຽກ​ງານ​ ທີ່​ຫຍຸ້ງ​ຫລາຍ​ພໍ​ສົມຄວນ​ໃນ​ປີ​ນີ້
ຊຶ່ງປະທານາທິບໍດີ ບາ​ຣັກ ​ໂອ​ບາ​ມາ ມີ​ກໍານົດ​ຈະ​ເຂົ້າຮ່ວມໃນ​ກອງ​ປະຊຸມ​ສຸດ​ຍອດເອ​ເຊຍ
ຕາ​ເວັນ​ອອກ ​ຄັ້ງ​ທີ​ຫົກ ​ໃນ​ເດືອນຕຸລາ​ປີ​ນີ້ ​ແລະ​ໃນເດືອນ​ທັນວາ ສະຫະລັດ​ກໍຈະ​ເປັນ​ເຈົ້າ
ພາບ​ຈັດກອງ​ປະຊຸມຂອງອົງການຮ່ວມມືເສດຖະກິດແຫ່ງຂົງເຂດເອເຊຍ-ປາຊິຟິກ ຫລື ກຸ່ມ
APEC ທີ່ລັດຮາວາຍນໍາ.

XS
SM
MD
LG