ພັນເອກ David Lapanໂຄສົກປະຈໍາກະຊວງປ້ອງກັນ ປະເທດສະຫະລັດເວົ້າວ່າ ຈີນໄດ້ຕົກລົງທີ່ຈະດໍາເນີນການ ເຈລະຈາກັບສະຫະລັດທີ່ເພັ່ງເລັງໃສ່ບັນຫາກອງທັບເຮືອຢູ່ ລັດຮາວາຍໃນກາງເດືອນຕຸລານີ້ ແລະເຫັນດີທີ່ຈະເຂົ້າຮ່ວມ ການປຶກສາຫາລືກັນດ້ານບັນຫາປ້ອງກັນຊາດໃນຂອບເຂດ ທີ່ກວ້າງຂວາງກວ່ານັ້ນອີກ ຢູ່ວໍຊິງຕັນໃນປາຍປີນີ້. ການ ປະຊຸມກັນເຫລົ່ານີ້ແມ່ນເປັນການພົບປະຫາລືກັນໃນລະດັບ ສູງທີ່ເຄີຍມີມາເປັນປະຈໍາ ອັນເປັນສ່ວນນຶ່ງຂອງພື້ນຖານ ຂອງສາຍສໍາພັນດ້ານປ້ອງກັນຊາດລະຫວ່າງສະຫະລັດ ກັບຈີນ.
ທ່ານ Lapan ກ່າວວ່າ ທ່ານບໍ່ສາມາດເວົ້າໄດ້ວ່າ ຈະມີການຮື້ຟື້ນການປະຊຸມ ແລະການແລກປ່ຽນກັນດ້ານອື່ນໆນໍາຫລືບໍ່ ແຕ່ເມື່ອຖືກຖາມວ່າ ການໂຈະການຕິດຕໍ່ພົວພັນກັນ ໄດ້ສິ້ນສຸດລົງແທ້ຫລືບໍ່ນັ້ນ ທ່ານຕອບວ່າ ແມ່ນແລ້ວ ພວກ ເຮົາໄດ້ຕົກລົງທີ່ຈະກັບມາພົວພັນກັນແບບນີ້ຄືນໃໝ່ ແລະ ນັ້ນໝາຍຄວາມວ່າສາຍພົວພັນທາງທະຫານລະຫວ່າງ ສະຫະລັດກັບຈີນ ໄດ້ກັບຄືນມາສູ່ລະດັບປົກກະຕິຄືເກົ່າແລ້ວ. ທ່ານອະທິບາຍຕໍ່ໄປວ່າ:
“ມັນກັບຄືນມາຢູ່ບ່ອນທີ່ພວກເຮົາຕ້ອງການແລ້ວ ຊຶ່ງນັ້ນກໍຄືຮື້ຟື້ນການຕິດຕໍ່ແລະ ຄວາມສໍາພັນລະຫວ່າງກອງທັບກັບກອງທັບຄືນໃໝ່ ແລະແນ່ນອນວ່າຄວາມຫວັງ ຂອງພວກເຮົາກໍຄືວ່າ ມັນຈະດຳເນີນສືບຕໍ່ໄປ ດັ່ງທີ່ພວກເຮົາໄດ້ເນັ້ນຍໍ້າກັນຢູ່ໃນ ກອງປະຊຸມເຫລົ່ານີ້ ກໍຄືວ່າພວກເຮົາຢາກຫລີກໜີຈາກການປະຕິບັດແບບເວົ້າກັນ ອີກ ແລ້ວກໍເລີກເວົ້າກັນອີກ ຢູ່ຊໍ້າໆຊາກໆນັ້ນ.”
ຈີນໄດ້ໂຈະການຕິດຕໍ່ພົວພັນດ້ານປ້ອງກັນຊາດກັບສະຫະລັດ ໃນເດືອນມັງກອນປີນີ້ ພາຍ ຫລັງທີ່ສະຫະລັດໄດ້ອະນຸມັດການຂາຍອາວຸດ ມູນຄ່າ 6 ພັນລ້ານໂດລາໃຫ້ແກ່ໄຕ້ຫວັນ. ນັບເປັນເທື່ອທີ່ສອງໃນຮອບ 3 ປີ ທີ່ລັດຖະບານປັກກິ່ງໄດ້ສະແດງປະຕິກິລິຍາແບບນີ້ ຕໍ່ ການຂາຍອາວຸດໃຫ້ໄຕ້ຫວັນ ຊຶ່ງເຮັດໃຫ້ເຈົ້າໜ້າທີ່ຂັ້ນສູງຂອງສະຫະລັດ ຮຽກຮ້ອງໃຫ້ຈີນ ຢຸດເຊົາການໂຕ້ຕອບເຊັ່ນນັ້ນ. ພວກເຈົ້າໜ້າທີ່ດັ່ງກ່າວເວົ້າວ່າ ການພົວພັນກັນທາງທະ ຫານຢ່າງເປັນປົກກະຕິ ແມ່ນຈໍາເປັນເພື່ອຫລີກລ່ຽງການເຂົ້າໃຈຜິດກັນ ໃນຂະນະທີ່ລັດຖະ ບານປັກກິ່ງ ກໍາລັງທໍາຄວາມກ້າວໜ້າຢ່າງໃຫຍ່ຫລວງ ໃນການເສີມສ້າງສະມັດທະພາບ ທາງທະຫານຂອງຕົນ.
ພັນເອກ Lapan ກ່າວວ່າ ນັ້ນແມ່ນສານທີ່ທ່ານ Michael Schiffer, ຮອງລັດຖະມົນຕີຊ່ວຍກະຊວງປ້ອງກັນປະເທດສະຫະລັດ ນໍາ ໄປແຈ້ງໃຫ້ເຈົ້າໜ້າທີ່ຈີນຊາບໃນອາທິດແລ້ວນີ້ ໃນການພົບປະຫລາຍໆບັ້ນ ທີ່ຍັງຜົນໃຫ້ມີການປະກາດຂ່າວການສີ້ນສຸດການໂຈະການຕິດຕໍ່ພົວພັນກັນ ໃນວັນພຸດແລ້ວນີ້. ທ່ານ Lapan ກ່າວຕໍ່ໄປວ່າ ເບິ່ງຄືວ່າຈີນກໍເຫັນດີນໍາ ຢ່າງໜ້ອຍ ກໍໃນເວລານີ້. ທ່ານເວົ້າວ່າ:
“ຂ້າພະເຈົ້າເວົ້າແທນເຂົາເຈົ້າບໍ່ໄດ້ ແຕ່ ແນ່ນອນວ່າ ພວກເຂົາເຈົ້າໄດ້ເຫັນພ້ອມນໍາຂໍ້ທີ່ວ່າ ການພົວພັນຕິດຕໍ່ກັນແບບປົກ ກະຕິແລະການສ້າງຄວາມສຳພັນກັນແບບ ນີ້ ແມ່ນສຳຄັນຕໍ່ການສ້າງຄວາມໄວ້ເນື້ອ ເຊື່ອໃຈກັນ ແລະຫລີກເວັ້ນຈາກການສື່ ສານກັນແບບຜິດໆ ແລະການຄໍານວນ ທີ່ຜິດພາດນັ້ນ.”
ລາຍງານຈາກປັກກິ່ງໂດຍອົງການຂ່າວຊິນຫົວຂອງທາງການຈີນ ໃນວັນອັງຄານອາທິດແລ້ວ ນີ້ເວົ້າວ່າ ການເຈລະຈາດ້ານການປ້ອງກັນປະເທດຈະໄດ້ກັບມາສືບຕໍ່ດໍາເນີນໄປອີກ ແຕ່ບໍ່ໄດ້ ໃຫ້ລາຍລະອຽດຢ່າງເຈາະຈົງ ດັ່ງທີ່ທໍານຽບຫ້າແຈ ໄດ້ລາຍງານໃນວັນພຸດຜ່ານມານັ້ນ.
ລາຍງານຂອງຊິນຫົວໄດ້ອ້າງຄໍາເວົ້າຂອງ ທ່ານ Qian Lihua, ເຈົ້າໜ້າທີ່ຝ່າຍປ້ອງກັນປະເທດຂອງຈີນ ທີ່ໄດ້ກ່າວ ຕໍ່ທ່ານຮອງລັດ ຖະມົນຕີຊ່ວຍ Schiffer ວ່າ ສະຖາບັນປ້ອງກັນຊາດຂອງທັງສອງປະເທດ ຈະຮື້ຟື້ນການແລກປ່ຽນກັນຄືນ ເພື່ອຮ່ວມກັນສົ່ງເສີມການພັດທະນາສາຍພົວພັນທາງທະຫານ ທີ່ມີຄວາມແຂງແຮງແລະໝັ້ນຄົງ. ແຕ່ທ່ານ Qian ບໍ່ໄດ້ຮັບປາກທີ່ຈະຢຸດເຊົາທໍາການໂຈະການ ຕິດຕໍ່ພົວພັນກັນທາງທະຫານ ເພື່ອແກ້ແຄ້ນ ນັ້ນ. ທ່ານເວົ້າວ່າ ການພົວພັນທາງທະຫານ “ປະເຊີນກັບຫລາຍໆບັນຫາ” ທີ່ຈໍາເປັນຕ້ອງໄດ້ຮັບການ “ແກ້ໄຂຢ່າງຮີບດ່ວນ” ແລະວ່າ “ການພິທັກຮັກສາຄວາມໝັ້ນຄົງຂອງການພົວພັນທາງທະຫານ ລະຫວ່າງຈີນແລະສະຫະລັດ ຄວນຈະເປັນໜ້າທີ່ຂອງທັງສອງຝ່າຍ ທີ່ຕ້ອງຮັບຜິດຊອບນໍາກັນ.”
ປະກົດວ່າ ຄຳເວົ້ານັ້ນ ເປັນການກ່າວເຕືອນວ່າ ການຂາຍອາວຸດຂອງອາເມຣິກາ ໃຫ້ແກ່ ໄຕ້ຫວັນອີກໃນອະນາຄົດ ອາດສາມາດນຳໄປສູ່ການຢຸດສະງັກລົງໃນສາຍພົວພັນທາງທະ ຫານລະຫວ່າງສະຫະລັດກັບຈີນ ອີກໄດ້.
ແຕ່ວ່າ ໃນຕອນທີ່ສະຫະລັດປ່ຽນການຮັບຮູ້ ທາງການທູດຈາກໄຕ້ຫວັນ ໄປຫາປັກກິ່ງໃນປີ 1978 ນັ້ນ ສະຫະລັດໄດ້ໃຫ້ຄຳໝັ້ນສັນຍາວ່າ ຈະຊ່ວຍສະໜອງພາຫານະສໍາລັບປ້ອງກັນ ຕົນເອງໃຫ້ໄຕ້ຫວັນ. ໃນເດືອນມິຖຸນາຜ່ານມາ ລັດຖະມົນຕີປ້ອງກັນປະເທດ Robert Gates ໄດ້ໃຫ້ຂໍ້ສັງເກດວ່າ ການຂາຍອາວຸດໃຫ້ໄຕ້ຫວັນບໍ່ແມ່ນເລື້ອງໃໝ່ ແລະວ່າ ຜົນກະທົບຂອງການຂາຍອາວຸດດັ່ງກ່າວ ຕໍ່ສາຍພົວພັນທາງທະຫານລະຫວ່າງສະຫະລັດກັບ ຈີນ ແມ່ນຂຶ້ນກັບວ່າຜູ້ນໍາຈີນ “ຢາກເຮັດໃຫ້ເລື້ອງນີ້ ກາຍເປັນເລື້ອງໃຫຍ່ຫລືບໍ່ເທົ່ານັ້ນ.”
