ຮອງປະທານປະເທດຈີນ ທ່ານຊີ (shee) ຈິ້ນຜິງ ເລີ້ມທໍາການເຄື່ອນໄຫວຢ້ຽມຢາມ
ສະຫະລັດເປັນເວລາ 4 ມື້ ໃນວັນຈັນມື້ນີ້ ທ່າມກາງການທ້າທາຍທີ່ສໍາຄັນຫລາຍຢ່າງ
ໃນສາຍພົວພັນລະຫວ່າງສອງປະເທດ.
ບັນດາເຈົ້າໜ້າທີ່ປະຈໍາທໍານຽບຂາວ ກ່າວວ່າ ການຢ້ຽມຢາມຂອງບຸກຄົນທີ່ຄາດກັນວ່າ
ຈະໄດ້ເປັນຫົວໜ້າພັກຄອມມີວນິດຈີນໃນທ້າຍປີນີ້ ແລະຈະເປັນປະທານປະເທດໃນປີ
2013 ຈະກວມເອົາຫລາຍເລື້ອງໃນດ້ານການເມືອງ ເສດຖະກິດ ຄວາມປອດໄພແລະສິດ
ທິມະນຸດ.
ໃນວັນອັງຄານມື້ອື່ນນີ້ ທ່ານຊີ ຈິ້ນຜິງ ຈະເລີ້ມທໍາການພົບປະກັນເປັນເວລານຶ່ງມື້ກັບບັນ
ດາເຈົ້າໜ້າທີ່ສະຫະລັດ ຮວມທັງການໂອ້ລົມສົນທະນາກັນເປັນເວລາ 2 ຊົ່ວໂມງກັບເຈົ້າ
ພາບທາງການຂອງທ່ານ ຄືຮອງ ປະທານາທິບໍດີ Joe Biden ແລະພົບປະກັບປະທານາ
ທິບໍດີ ບາຣັກ ໂອບາມາ ທີ່ທໍານຽບຂາວ.
ຫລັງຈາກຮັບປະທານອາຫານທ່ຽງທີ່ກະຊວງການຕ່າງປະເທດທີ່ຮອງ ປະທານາທິບໍດີ
Biden ແລະລັດຖະມົນຕີການຕ່າງປະເທດ ຮີນລາຣີ ຄລິນຕັນ ເປັນເຈົ້າພາບແລ້ວ ທ່ານ
ຊີ ຈິ້ນຜິງ ມີໝາຍກໍານົດຈະທໍາການຢ້ຽມຢາມກັບບັນດາເຈົ້າໜ້ທີ່ກອງທັບທີ່ທໍານຽບຫ້າ
ແຈ ແລະຫລັງຈາກນັ້ນ ຈະທໍາການພົບປະຫາລືກັບບັນດາຜູ້ນໍາດ້ານທຸລະກິດອາເມຣີກັນ
ແລະຈີນ.
ເນື່ອງຈາກວ່າ ທ່ານຊີ ຈິ້ນຜິງ ຍັງບໍ່ທັນໄດ້ເປັນປະທານປະເທດຈີນເທື່ອນັ້ນ ການຢ້ຽມ
ຢາມຄັ້ງນີ້ ຈຶ່ງເບິ່ງຄືວ່າ ຈະບໍ່ບັນລຸຜົນທ່ີສໍາຄັນຫຍັງຫລາຍໃນດ້ານທີ່ສໍາຄັນຕ່າງໆໃນ
ຄວາມສໍາພັນສອງຝ່າຍ ແຕ່ຄາດວ່າຈະມີການປະກາດ ກ່ຽວກັບຂໍ້ຕົກລົງດານທຸລະກິດ
ກັນບາງຢ່າງ.
ໃນມື້ວັນພຸດ ທ່ານຊີ ຈິ້ນຜິງ ມີກໍານົດຈະເດີນທາງໄປຢ້ຽມຢາມລັດ Iowa ໃນພາກກາງ
ຂ້ອນຕາເວັນຕົກ ແລະຫລັງຈາກນັ້ນ ຈະເດີນທາງໄປຢ້ຽມຢາມລັດແຄລີຟໍເນຍທາງພາກ
ຕາເວັນຕົກຂອງສະຫະລັດ ກ່ອນເດີນທາງກັບຄືນປະເທດຈີນ.
