ສະຫະລັດ ຈະສະເໜີ “ຈ່າຍເງິນຄ່າປົວແປງ” ໃຫ້ແກ່ພວກທີ່
ຖືກຂ້າຕາຍ ຫຼື ບາດເຈັບ ໃນການໂຈມຕີທາງອາກາດທີ່ຜິດພາດ
ຖືກໂຮງໝໍຂອງອົງການແພດບໍ່ມີພົມແດນ ຢູ່ໃນເມືອງ Kunduz
ປະເທດອັຟການິສຖານ ເມື່ອວັນທີ 3 ຕຸລາຜ່ານມາ.
ໂຄສົກ ກະຊວງປ້ອງກັນປະເທດ ທ່ານ Peter Cook ກ່າວ
ໃນວັນເສົາວານນີ້ ວ່າ ຈຳນວນເງິນຄ່າຈ່າຍ ແມ່ນຍັງບໍ່ໄດ້ກຳ
ນົດເທື່ອ. ການຊຳລະເງິນດັ່ງກ່າວ ຈະໃຫ້ “ພົນລະເຮືອນ
ພວກທີ່ບໍ່ໄດ້ຕໍ່ສູ້ ຜູ້ທີ່ໄດ້ຮັບບາດເຈັບ ແລະບັນດາຄອບ
ຄົວຂອງພົນລະເຮືອນດັ່ງກ່າວ ຜູ້ທີ່ຖືກຂ້າຕາຍ ອັນເປັນ
ຜົນຈາກການປະຕິບັດການ ຂອງສະຫະລັດນັ້ນ.”
ກຸ່ມອົງການແພດບໍ່ມີພົມແດນ ທີ່ຮູ້ຈັກກັນຈາກຄຳຫຍໍ້ພາສາຝຣັ່ງຄື MSF ນັ້ນ ໄດ້ກ່າວ
ວ່າ ການໂຈມຕີທາງອາກາດຄັ້ງນັ້ນໄດ້ສັງຫານ ຄົນປ່ວຍ 10 ຄົນ ແລະບັນດາພະນັກງານ
ຂອງ MSF 10 ຄົນ. ອົງການກຸສົນດັ່ງກ່າວ ໄດ້ເວົ້າໃນວັນພະຫັດຜ່ານມາ ວ່າ 33 ຄົນ
ແມ່ນຍັງຫາຍສາບສູນຢູ່ ລວມທັງ ຄົນປ່ວຍ 9 ຄົນ ແລະ ພະນັກງານຂອງອົງການຂອງຕົນ
24 ຄົນ.
ອົງການ MSF ໄດ້ສິ້ນສຸດພາລະກິດຂອງຕົນ ຢູ່ໃນເມືອງ Kunduz ຫຼັງຈາກການຖິ້ມລະເບີດ
ແລະໄດ້ຮຽກຮ້ອງໃຫ້ມີການສືບສວນສອບສວນການໂຈມຕີ ທີ່ເປັນອິດສະຫລະ ພາຍໃຕ້
ກົດລະບຽບ ຂອງສົນທິສັນຍາເຈນີວາ. ກຸ່ມນັ້ນກ່າວອີກວ່າ ການສືບສວນທີ່ໄດ້ດຳເນີນໄປ
ແລ້ວໂດຍ ສະຫະລັດ ອັຟການິສຖານ ແລະ ອົງການ NATO ແມ່ນບໍ່ພຽງພໍ ແລະໄດ້ສະ
ເໜີແນະວ່າ ການໂຈມຕີນັ້ນ ຊ່ຳກັບວ່າເປັນອາຊະຍາກຳສົງຄາມ.
ກົດລະບຽບ ຂອງສົນທິສັນຍາເຈນີວາ ເປັນສົນທິສັນຍາ ແລະ ເປັນພິທີທາງການທູດ ຂອງ
ນາໆຊາດ ຊຸດນຶ່ງ ທີ່ຄວບຄຸມການປະພຶດ ຂອງການສູ້ລົບກັນ ແລະ ແນໃສ່ເພື່ອປົກປ້ອງ
ພວກຄົນ ຜູ້ທີ່ບໍ່ໄດ້ເຂົ້າຮ່ວມໃນການຮາວີ ແລະ ພວກຄົນຜູ້ທີ່ບໍ່ໄດ້ຕໍ່ສູ້ຕໍ່ໄປ.
ໃນວັນພຸດຜ່ານມາ ປະທານາທິບໍດີ ສະຫະລັດ ທ່ານບາຣັກ ໂອບາມາ ໄດ້ຂໍຂະມາໂທດ
ຕໍ່ປະທານຂອງອົງການແພດບໍ່ມີພົມແດນ ດຣ. Joanne Liu ສຳຫລັບການໂຈມຕີນັ້ນ.
ເຖິງຢ່າງໃດກໍຕາມ ລາຍລະອຽດຕ່າງໆ ການພົວພັນໃນການໂຈມຕີ ຂອງສະຫະລັດ ແມ່ນ
ຍັງມືດມົວຢູ່ ນັບແຕ່ ສະຫະລັດ ໄດ້ປ່ຽນເລື້ອງລາວ ຂອງອັນທີ່ເກີດຂຶ້ນໃນວັນນັ້ນມາ.
ສະຫະລັດ ກ່າວວ່າ ຕົນຈະບໍ່ສະໜອງລາຍລະອຽດຕື່ມອີກ ກ່ຽວກັບເຫດການນີ້ ໃນ
ຂະນະທີ່ກອງທັບຂອງຕົນກຳລັງທຳການສືບສວນສອບສວນຢູ່.
ໂຄສົກຂອງທຳນຽບຂາວ ທ່ານ Josh Earnest ກ່າວວ່າ ທ່ານໂອບາມາ ໄດ້ໂທລະສັບ
ຫາ ທ່ານນາງ Liu ເພື່ອ “ຂໍອະໄພໂທດ ແລະ ສະແດງຄວາມເສຍອົກເສຍໃຈດ້ວຍ.”
ທ່ານ Earnest ກ່າວອີກວ່າ “ໃນກໍລະນີນີ້ ມັນແມ່ນຄວາມຜິດພາດ ແລະ ມັນເປັນ
ສິ່ງນຶ່ງທີ່ສະຫະລັດ ຍອມຮັບ” ແລະ ວ່າ ທ່ານໂອບາມາ “ແມ່ນກະຕືລືລົ້ນ ທີ່ຈະຄົ້ນຫາ
ຄວາມແທ້ຈິງ ທີ່ເກີດຂຶ້ນໃຫ້ໄດ້ ເຖິງທີ່ສຸດ.”
