ຫົວໜ້າວັດທະນະທຳຂອງອົງການສະຫະປະຊາຊາດຫຼື UNESCO ສັນຍາທີ່ຈະສືບຕໍ່ການໃຫ້ຄວາມຊ່ວຍເຫຼືອເພື່ອສ້ອມແປງແລະບູລະນະສ້າງສາສະຖານ ທີ່ປະຫວັດສາດຕ່າງໆຂອງອີຣັກທີ່ໄດ້ຮັບຄວາມເສຍຫາຍຈາກສົງຄາມ ອີງຕາມລາຍງານຂອງອົງການຂ່າວເອພີ. ໃນລະຫວ່າງການເດີນທາງ ໄປຢ້ຽມຢາມນະຄອນຫຼວງແບັກແດດ ໃນວັນຈັນວານນີ້ ກ່ອນໜ້າວັນຄົບຮອບ 20 ປີ ໃນການບຸກເຂົ້າໄປໃນປະເທດອີຣັກຂອງສະຫະລັດ ທ່ານນາງອໍດຣີ ອາຊູລາຍ ຫົວໜ້າອົງການ UNESCO ໄດ້ພົບປະກັບພວກເຈົ້າໜ້າທີ່ ຮວມທັງນາຍົກລັດຖະມົນຕີອີຣັກ ທ່ານໂມຮຳເໝັດ ເຊຍ ອາລ-ຊູດານີ. ທ່ານນາງຍັງໄດ້ໄປຢ້ຽມສະຖານທີ່ປະຫວັດສາດທີ່ຕັ້ງຢູ່ໃກ້ຄຽງກັບນະຄອນແບັກແດດແລະຫໍພິພິດທະພັນແຫ່ງຊາດ ຊຶ່ງໄດ້ຖືກປຸ້ນສະດົມ ລຸນຫຼັງການບຸກລຸກເຂົ້າໄປໃນປະເທດດັ່ງກ່າວຂອງສະຫະລັດ. ໂບຮານວັດຖຸຫຼາຍສິບພັນອັນໄດ້ຖືກລັກຂະໂມຍໄປຈາກຈາກສະຖານທີ່ປະຫວັດສາດຕ່າງໆໃນທົ່ວປະເທດໃນລະຫວ່າງຊຸມປີທີ່ເກີດບັນຫາຂັດແຍ້ງຕິດຕາມມາ.
ຫົວໜ້າອົງການ UNESCO ສັນຍາ ຈະຊ່ວຍບູລະນະສ້າງສາ ສະຖານທີ່ປະຫວັດສາດ ທີ່ເສຍຫາຍ
![ຜູ້ອຳນວຍການອົງການ UNESCO ທ່ານນາງອໍດຣີ ອາຊູລາຍ, ຂວາ, ຢ້ຽມຢາມຫໍພິພິດທະພັນແຫ່ງຊາດອີຣັກ ທີ່ນະຄອນຫຼວງແບັກແດດ ເມື່ອວັນທີ 6 ມີນາ 2023.](https://gdb.voanews.com/01000000-0aff-0242-338a-08db1e9e0a18_cx0_cy8_cw0_w250_r1_s.jpg)