ລິ້ງ ສຳຫລັບເຂົ້າຫາ

ວັນອັງຄານ, ໒໕ ມິຖຸນາ ໒໐໒໔

ສປຊ ເຕືອນ ກ່ຽວກັບໄພນໍ້າຖ້ວມ ຕື່ມອີກ ໃນອັບການິສຖານ


ຜູ້ຊາຍຊາວອັບການິສຖານ ເກັບເຄື້ອງຂອງຂອງລາວ ຈາກເຮືອນທີ່ໄດ້ຮັບຄວາມເສຍຫາຍຂອງຕົນ ຫຼັງຈາກນໍ້າຖ້ວມໜັກ ໃນ ແຂງ ກໍ ໃນພາກຕາເວັນຕົກຂອງອັບການິສຖານ, ວັນທີ 18 ພຶດສະພາ 2024.
ຜູ້ຊາຍຊາວອັບການິສຖານ ເກັບເຄື້ອງຂອງຂອງລາວ ຈາກເຮືອນທີ່ໄດ້ຮັບຄວາມເສຍຫາຍຂອງຕົນ ຫຼັງຈາກນໍ້າຖ້ວມໜັກ ໃນ ແຂງ ກໍ ໃນພາກຕາເວັນຕົກຂອງອັບການິສຖານ, ວັນທີ 18 ພຶດສະພາ 2024.

ໃນຂະນະທີ່ອົງການສະຫະປະຊາຊາດເຕືອນ ກ່ຽວກັບໄພນໍ້າຖ້ວມທີ່ "ຮຸນແຮງ" ຫຼາຍຂຶ້ນ ທີ່ສົ່ງຜົນກະທົບຕໍ່ຄວາມຫມັ້ນຄົງດ້ານສະບຽງອາຫານໃນ ອັຟການິສຖານ ໃນບໍ່ເທົ່າໃດເດືອນຂ້າງຫນ້ານີ້, ບັນດາຜູ້ຊ່ຽວຊານກ່າວວ່າ ປະເທດນີ້ຈຳເປັນຕ້ອງມີການວາງແຜນໄລຍະຍາວ ເພື່ອຫຼຸດຜ່ອນຜົນກະທົບ ດ້ານລົບຂອງການປ່ຽນແປງດິນຟ້າອາກາດ.

ອົງການ​ສະຫະ​ປະຊາ​ຊາດ ກ່າວ​ວ່າ ໄພ​ນ້ຳ​ຖ້ວມ​ຢູ່​ບັນດາ​ແຂວງທາງ​ພາກ​ຕາ​ເວັນ​ອອກສຽງ​ເໜືອ ​ແລະ​ພາກຕາ​ເວັນ​ຕົກ​ສຽງ​ເໜືອ ​ໃນ​ສອງ​ອາທິດ​ຜ່ານ​ມາ ​ໄດ້​ສົ່ງ​ຜົນ​ກະທົບ​ຕໍ່​ປະຊາຊົນ​ຫລາຍ​ກວ່າ 80,000 ຄົນ​ໃນ​ປະ​ເທດ.

ເຈົ້າ​ໜ້າ​ທີ່​ຕາ​ລີ​ບານ​ທ້ອງ​ຖິ່ນ​ ໃນ​ແຂວງ ກໍ (Ghor) ທາງພາກ​ຕາ​ເວັນ​ຕົກ ກ່າວ​ໃນ​ວັນ​ພະ​ຫັດ​ວານ​ນີ້​ວ່າ ໄພ​ນ້ຳ​ຖ້ວມ​ໃນ​ອາ​ທິດ​ທີ່ຜ່ານ​ມາ​ ໃນ​ແຂວງ​ດັ່ງ​ກ່າວ​ໄດ້ເຮັດໃຫ້ມີຜູ້ເສຍຊີວິດ​ຢ່າງ​ໜ້ອຍ 50 ຄົນ ແລະ​ສ້າງ​ຄວາມ​ເສຍ​ຫາຍ​ໃຫ້​ບ້ານ​ເຮືອນ ແລະ​ຮ້ານ​ຄ້າ​ຫລາຍ​ກວ່າ 4,000 ຫຼັງ.

ອີງຕາມຂໍ້ມູນຈາກອົງການສະຫະປະຊາຊາດ, ໄພນໍ້າຖ້ວມ ວັນ​ທີ 10 ​ແລະ 11 ພຶດສະພາ​ນີ້ ​ຢູ່​ແຂວງ ບາດັກຊານ (Badakhshan), ຕາຄາ (Takhar) ​ແລະ ບັກລັນ (Baghlan) ​ໄດ້​ເຮັດ​ໃຫ້ 347 ຄົນ​ເສຍ​ຊີວິດ ​ແລະ 1.651 ຄົນ​ບາດ​ເຈັບ. ​ໄພ​ນ້ຳ​ຖ້ວມ​ໄດ້​ທຳລາຍ​ເຮືອນ 7.800 ຫຼັງ, ​ເຮັດ​ໃຫ້​ສັດລ້ຽງ​ຕາຍ​ເກືອບ 14.000 ​ໂຕ ​ແລະ ທຳລາຍ​ເນື້ອ​ທີ່​ດິນ​ປະມານ 24,000 ​ເຮັກຕາ​ໃນ 3 ​ແຂວງ.

ວິ​ກິດ​ການ​ດິນ​ຟ້າ​ອາ​ກາດ​ທີ່​ຮ້າຍ​ແຮງ​ຂຶ້ນນີ້ ​ໄດ້​ເຮັດໃຫ້ມີ "ຮູບ​ແບບ​ສະພາບ​ດິນ​ຟ້າ​ອາ​ກາດທີ່ບໍ່ແນ່ນອນ​" ຊຶ່ງ​ໄດ້ "ກາຍ​ເປັນ​ພາ​ວະ​ປົກ​ກະ​ຕິ" ໃນ​ປະ​ເທດນີ້, ອີງ​ຕາມ​ໂຄງ​ການ​ອາ​ຫານ​ໂລກ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG