ລິ້ງ ສຳຫລັບເຂົ້າຫາ

ສປຊ ຮຽກຮ້ອງໃຫ້ຊູດານ ແລະຊູດານໃຕ້ ຖອນທະຫານ ຈາກເຂດ Abyei

  • ໄພສານ ວໍຣະຈັກ

ເຂດ Abyei ຊຶ່ງເປັນເຂດທີ່ອຸດົມສົມບູນໄປດ້ວຍນໍ້າມັນ ຕັ້ງຢູ່ລະ ຫວ່າງຊູດານແລະຊູດານໃຕ້

ສະພາ​ຄວາມ​ໝັ້ນຄົງ​ອົງການ​ສະຫະ​ປະຊາ​ຊາດ​ຮຽກຮ້ອງ​ໃຫ້​ຊູ​ດານ​ແລະ​ຊູ​ດານ​ໃຕ້​ຖອນ​ກຳລັງ
ປະກອບ​ອາວຸດ​ທັງ​ໝົດ​ຂອງ​ຕົນອອກ​ຈາກ​ເຂດຊາຍ​ແດນ Abyei ຊຶ່ງ​ເປັນ​ເຂດ​ທີ່​ອຸດົມສົມບູນ​
ໄປ​ດ້ວຍ​ນໍ້າມັນ​ທີ່​ຍັງ​ມີ​ການ​ຂັດ​ແຍ້​ງກັນ​ຢູ່​ນັ້ນ.

ລັດຖະບານ​ຂອງ​ປະ​ເທດ​ທັງ​ສອງ​ ໄດ້​ຕົກລົງ​ໃນ​ເດືອນ​ມິ​ຖຸນາ​ຜ່ານ​ມາທີ່​ຈະ​ຖອນທະຫານ​ຂອງ
ຕົນ​ ອອກ​ຈາກ​ເຂດ Abyei ​ແຕ່​ເຈົ້າໜ້າ​ທີ່​ສະຫະ​ປະຊາ​ຊາດ​ກ່າວ​ວ່າ ບໍ່​ໄດ້​ມີ​ຄວາມ​ກ້າວໜ້າ​
ຫຍັງ​ຫຼາຍ​ເກີດ​ຂຶ້ນ​ເພື່ອ​ເຮັດ​ໃຫ້​ເຂດ​ທີ່​ຍັງ​ມີ​ການ​ຂັດແຍ້​ງກັນ​ຢູ່​ນັ້ນກາຍ​ເປັນ​ເຂດ​ປອດ​ທະຫານ.

ໃນ​ວັນ​ພະຫັດ​ວານ​ນີ້ອົງການ​ສະຫະ​ປະຊາ​ຊາດ​ໄດ້​ຕໍ່​ອາຍຸ​ການ​ປະຕິບັດ​ງານ​ຂອງ​ກຳລັງ​ຮັກສາ
ສັນຕິພາບ​ຢູ່​ໃນ​ເຂດ Abyei ຕື່ມ​ອີກ​ເປັນ​ເວລາ 5 ​ເດືອນ. ​ແຕ່​ກໍໄດ້​ເຕືອນ​ວ່າຄວາມ​ສຳ​ເລັດ​
ໃນ​ການ​ປະຕິບັດ​ງານ​ທີ່​ວ່າ​ນີ້​ແມ່ນ​ຂຶ້ນຢູ່​ກັບການ​ຈັດຕັ້ງປະຕິບັດ​ຂໍ້​ຕົກລົງຂອງ​ທັງ​ສອງ​ຝ່າຍ​ຊຶ່ງ​
ໄດ້​ບັນລຸ​ກັນ​ກ່ອນ​ໜ້ານີ້.

ຊູ​ດານຢືນ​ຢັດ​ວ່າ ການ​ຖອນ​ທະຫານ​ຂອງ​ຕົນ ​ຈະ​ມີ​ຂຶ້ນກໍ​ຕໍ່​ເມື່ອ​ມີ​ການ​ສົ່ງ​ກຳລັງສະຫະ​ປະຊາ
ຊາດ​ເຂົ້າ​ໄປ​ປະຕິບັດ​ງານ​ຢ່າງ​ເຕັມ​ອັດຕາ​ຢູ່​ໃນ​ເຂດ​ດັ່ງກ່າວ​ໂດຍ​ເວົ້າວ່າ ຕົນ​ຢ້ານ​ຈະ​ເກີດ​ຊ່ອງ​
ຫວ່າງ​ທາງ​ດ້ານ​ຄວາມ​ໝັ້ນຄົງ​ຂຶ້ນ.

ປະຊາຊົນຫຼາຍກວ່າ 100 ພັນ​ຄົນ​ໄດ້​ພາກັນ​ຫຼົບໜີ​ອອກ​ຈາກ​ເຂດ Abyei ​ເວລາ​ຄວາມ​ຮຸນ​
ແຮງ​ໄດ້​ລະ​ເບີດ​ຂຶ້ນ​ ໃນ​ເດືອນ​ມິ​ຖຸນາ ຫຼັງຈາກ​ທະ​ຫານ​ຊູ​ດານ​ບຸກ​ເຂົ້າ​ໄປ ກ່ອນ​ທີ່​ຊູ​ດານ​ໃຕ້​
ແຍກ​ໂຕ​ອອກ​ຈາກ​ຊູ​ດານ​ເໜືອ.

XS
SM
MD
LG