ທ່ານນາງ Nikki Haley, ເອກອັກຄະລັດຖະທູດສະຫະລັດປະຈໍາສະຫະປະຊາຊາດ
ໄດ້ເຕືອນວ່າ ລັດຖະບານຂອງທ່ານທຣໍາ ອາດຈະຖອນໂຕອອກຈາກສະພາວ່າດ້ວຍ
ສິດທິມະນຸດ ຖ້າຫາກສະພາດັ່ງກ່າວ ບໍ່ທໍາການປະຕິຮູບ ທີ່ຈໍາເປັນຕ້ອງເຮັດ.
ໃນຄໍາປາໄສທີ່ແຂງຂັນ ກ່ຽວກັບເລື່ອງທີ່ວ່າ “ບໍ່ເອົານັກໂທດອີກຕໍ່ໄປແລ້ວ” ທີ່ກອງ
ປະຊຸມທີ່ດໍາເນີນໄປເປັນເວລາສາມອາທິດຂອງສະພາ ໃນວັນອັງຄານວານນີ້
ທ່ານນາງ Haley ໄດ້ເຕືອນກຸ່ມດັ່ງກ່າວວ່າຄວນດັດແປງວິທີການຂອງຕົນ.
ທ່ານນາງກ່າວວ່າ "ດັ່ງທີ່ທ່ານຮູ້ນັ້ນແລ້ວ ສະຫະລັດກໍາລັງ ພິຈາລະນາເບິ່ງສະພານີ້
ແລະ ການເຂົ້າຮ່ວມຂອງພວກເຮົາຢູ່ໃນສະພາ ຢ່າງລະອຽດ. ພວກເຮົາເຫັນວ່າມີບາງ
ຂົງເຂດວຽກ ງານແມ່ນຕ້ອງໄດ້ເຮັດໃຫ້ເຂັ້ມແຂງຂຶ້ນ".
ທ່ານນາງ Haley ເປັນເອກອັກຄະລັດຖະທູດສະຫະລັດປະຈໍາສະຫະປະຊາຊາດຜູ້ທີ 29
ແລະກໍເປັນຜູ້ທໍາອິດ ທີ່ໄດ້ກ່າວຄໍາປາໄສຢູ່ສະພາວ່າດ້ວຍສິດທິມະນຸດ. ຂໍ້ຄວາມອັນເຂັ້ມ
ແຂງ ແລະຊັດເຈນ ບໍ່ແມ່ນວ່າຈະບໍ່ໄດ້ຮັບການສົນໃຈຈາກອົງການທີ່ມີສະມາຊິກ 47 ປະເທດນີ້.
ທ່ານນາງໄດ້ຕິຕຽນກອງປະຊຸມກ່ຽວກັບສິດທິມະນຸດ ໃນຄວາມຄິດຂອງທ່ານນາງແມ່ນ
ເຫັນວ່າສະພາໄດ້ໃຊ້ມາດຕະການແບບມີການຈໍາແນກຕໍ່ອິສຣາແອນ. ຍົກຕົວຢ່າງເຊັ່ນ
ທ່ານນາງໄດ້ໃຫ້ຄໍາເຫັນວ່າ ສະພາບໍ່ເຄີຍຮັບຮອງເອົາມະຕິ ທີ່ປະນາມເວເນຊູເອລາ ທີ່
ລະເມີດສິດທິມະນຸດ ຢ່າງຮ້າຍແຮງ.
ທ່ານນາງເວົ້າວ່າ "ແຕ່, ບັດນັ້ນແລ້ວ ສະພາກັບຮັບຮອງເອົາມະຕິຫ້າສະບັບ ທີ່ມີຄວາມ
ລໍາອຽງຕໍ່ປະເທດດຽວ, ກໍຄືອິສຣາແອລ ໃນເດືອນມີນາ ທີ່ຜ່ານມາ. ຖ້າຫາກສະພາ
ຢາກໄດ້ຮັບຄວາມເຊື່ອຖື ມັນຄວນຈະແກ້ໄຂການລໍາອຽງຕໍ່ອິສຣາແອລທີ່ຊໍາເຮື້ອມາ ນານນັ້ນ."
ສະຫະລັດ ແລະອິສຣາແອລເປັນພັນທະມິດກັນ. ນະຄອນວໍຊິງຕັນດີຊີ ໄດ້ຖົກຖຽງມາ
ນານແລ້ວວ່າ ສະພາໄດ້ເພັ່ງເລັງແບບບໍ່ເປັນທໍາ ໃສ່ການກ່າວຫາວ່າ ອິສຣາແອລ
ລະເມີດສິດທິມະນຸດ ຊຶ່ງລວມທັງການປະຕິບັດຂອງປະເທດດັ່ງກ່າວ ຕໍ່ຊາວປາແລັສ
ຕາຍ ທີ່ຢຶດຄອງເຂດຝັ່ງຕາເວັນຕົກຂອງແມ່ນໍ້າຈໍແດນ ແລະເຂດກາຊາ ນັ້ນ.
