ຢູເຄຣນກ່າວວ່າ ກຳລັງຂອງລັດຖະບານໄດ້ທຳການຕໍ່ສູ້ກັນກັບ
ຂະບວນລົດຫຸ້ມເກາະຂະບວນນຶ່ງ ຂອງພວກຫົວແບ່ງແຍກ ຢູ່
ໃກ້ໆກັບຊາຍແດນຣັດເຊຍ.
ແຫຼ່ງຂ່າວທະຫານກ່າວວ່າ ຂະບວນລົດດັ່ງກ່າວໄດ້ຖືກຢຸດໃນ
ວັນຈັນມື້ນີ້ ໃນຂະນະທີ່ພວມເຄື່ອນເຂົ້າໄປໃກ້ກັບເມືອງນຶ່ງຢູ່
ແຄມທະເລ Azov.
ອົງການຂ່າວຝຣັ່ງ ອ້າງຄຳເວົ້າຂອງເຈົ້າໜ້າທີ່ຢູເຄຣນທ່ານນຶ່ງ
ວ່າ ຂະບວນລົດດັ່ງກ່າວໄດ້ເຄື່ອນເຂົ້າໄປໃນປະເທດ ຈາກຣັດເຊຍ.
ໃນຂະນະດຽວກັນ ລັດຖະມົນຕີຕ່າງປະເທດຣັດເຊຍ ທ່ານ Sergei
Lavrov ກ່າວໃນວັນຈັນມື້ນີ້ວ່າ ມົສກູຢາກສົ່ງຂະບວນລົດບັນທຸກ
ເຄື່ອງຊ່ອຍເຫຼືອທາງດ້ານມະນຸດສະທຳອີກຈຸນຶ່ງ ໄປຍັງພາກຕາ
ເວັນອອກຂອງຢູເຄຣນ.
ທ່ານ Lavrov ກ່າວວ່າ ຣັດເຊຍໄດ້ສົ່ງຈົດໝາຍທາງການສະບັບ
ນຶ່ງໄປຍັງລັດຖະບານ Kyiv ໃນວັນອາທິດວານນີ້ ຊຶ່ງບັນຈຸຂໍ້ມູນ
ກ່ຽວກັບຂະບວນລົດຊ່ວຍເຫຼືອຈຸໃໝ່ ຮວມທັງຂ່າວຂໍ້ມູນກ່ຽວກັບ
ປະເພດຂອງເຄື່ອງຊ່ອຍເຫຼືອຊຸດໃໝ່ ທີ່ຈະສົ່ງໄປນັ້ນ.
ຣັດເຊຍໄດ້ປະເຊີນກັບການຕຳໜິຕິຕຽນຢ່າງໜັກຈາກນະຄອນ Kyiv ແລະຝ່າຍຕາເວັນຕົກ ກ່ຽວກັບຂະບວນລົດສົ່ງການຊ່ອຍເຫຼືອໄປຍັງເມືອງ Luhansk ຂອງຢູເຄຣນ ທີ່ຢູ່ພາຍໃຕ້
ການຄຸ້ມຄອງຂອງພວກກະບົດນັ້ນ.
ພາບການສະຫລອງວັນເອກະລາດ ໃນຢູເຄຣນ:
ພາບຈາກຢູເຄຣນ, ວັນທີ 25 ສິງຫາ
ຂະບວນລົດດັ່ງກ່າວໄດ້ຖືກສົ່ງໄປ ໂດຍບໍ່ໄດ້ຮັບເຫັນດີຢ່າງເປັນທາງການຈາກລັດຖະບານ
Kyiv. ແລະຣັດເຊຍບໍ່ໄດ້ລໍຖ້າໃຫ້ ຄະນະກຳມະການສະພາກາແດງສາກົນ ເສັດສິ້ນການກວດກາຕາມລະບຽບການຂອງຕົນນັ້ນ.
ທ່ານ Lavrov ກ່າວຕື່ມວ່າ ຣັດເຊຍຢາກສົ່ງຂະບວນລົດຖ້ຽວທີສອງອີກໃນເວລາໄວເທົ່າ
ທີ່ຈະເປັນ ໄປໄດ້ ແລະກ່າວວ່າ ຣັດເຊຍຢາກບັນລຸ ຂໍ້ຕົກລົງກັນກ່ຽວກັບ “ເງື່ອນໄຂທັງໝົດ “ ສຳລັບການສົ່ງເຄື່ອງຊ່ອຍເຫຼືອຮອບໃໝ່ ໃນເສັ້ນທາງດຽວກັນກັບຖ້ຽວທຳອິດນັ້ນ.
ມື້ວານນີ້ ປະທານາທິບໍດີ Petro Poroshenko ແຫ່ງຢູເຄຣນ ໄດ້ໃຫ້ຄຳ ໝັ້ນສັນຍາທີ່
ຈະເພີ້ມງົບປະມານທາງດ້ານທະຫານຂອງຢູເຄຣນຂຶ້ນອີກ 3 ພັນລ້ານດອນລາ ໃນໄລ
ຍະສອງສາມປີຕໍ່ໜ້າ ຍ້ອນໄພຂົ່ມຂູ່ຈາກພວກຫົວແບ່ງແຍກນິຍົມຣັດເຊຍ ທີ່ຍັງມີຢູ່ຕໍ່ມາ
ໃນພາກຕາເວັນ ອອກຂອງຢູເຄຣນນັ້ນ.
ທ່ານ Poroshenko ກ່າວຖ້ອຍຖະແຫລງດັ່ງກ່າວ ໃນຄຳປາໄສສະຫລອງວັນເອກະລາດ
ໃນວັນອາທິດວານນີ້ 23 ປີ ຫຼັງຈາກການແຕກແຍກຂອງອະດີດສະຫະພາບໂຊຫວຽດ.
ໃນຂະນະດຽວກັນ ພວກຫົວແບ່ງແຍກນິຍົມຣັດເຊຍ ກໍໄດ້ເອົາພວກຊະເລີຍເສິກຢູເຄຣນ
ຫລາຍສິບຄົນ ອອກໄປຍ່າງຕາມຖະໜົນຫົນທາງໃຫ້ປະຊາຊົນເບິ່ງ ໃນເມືອງ Donets
ທີ່ຢູ່ພາຍໃຕ້ການຄອບຄອງຂອງພວກກະບົດ ໃນພາກຕາເວັນອອກຂອງຢູເຄຣນນັ້ນ.
