ລິ້ງ ສຳຫລັບເຂົ້າຫາ

ວັນອັງຄານ, 27 ກັນຍາ 2022

ອັງ​ກິດ​ ເວົ້າ​ວ່າ ​ມີ​ຄວາມ​ເປັນ​ໄປ​ໄດ້​ວ່າ ກອງ​ກຳ​ລັງ​ພື້ນ​ດິນ​ໃໝ່​ຂອງ ຣັດ​ເຊຍ ໄດ້​ເພິ່ງ​ພາອາ​ໄສ "ອາ​ສາ​ສະ​ໝັກ" ຢ່າງ​ໜັກ


ພາບ​ຈາກວິ​ດີ​ໂອ​ທີ່​ຖືກ​ເປີ​ດ​ເຜີຍ​ໂດຍ​ກະ​ຊວງ​ປ້ອງ​ກັນ​ປະ​ເທດ ຣັດ​ເຊຍ ໃນ​ວັນ​ທີ 21 ກຸມ​ພາ 2022, ສະ​ແດງ​ໃຫ້​ເຫັນ ລົດ​ຖັງ ຣັດ​ເຊຍ ແລະ ເບ​ລາ​ຣຸ​ສ ຮ່ວມ​ຊ້ອມ​ລົບ​ນຳ​ກັນ, ເມືອງ ເບ​ຣັ​ສ, ປະ​ເທດ ເບ​ລາ​ຣຸ​ສ.

ອັງ​ກິດ ກ່າ​ວ​ວ່າ ຣັດ​ເຊຍ “ເກືອບ​ແນ່ນອນ​ວ່າ​ໄດ້​ສ້າງກອງ​ກຳ​ລັງ​ພາກ​ພື້ນ​ດິນ​ທີ່​ສຳ​ຄັນ​ໃໝ່​ຂຶ້ນ​ມາ” ທີ່​ອາດ​ລວມ​ມີກອງ​ທະ​ຫານ “ອາ​ສາ​ສະ​ໝັກ” ເພື່ອ​ສະ​ໜັບ​ສະ​ໜູນ​ການ​ບຸກ​ລຸກ ຢູ​ເຄ​ຣນ ຂອງ​ພວກເຂົາ​. ການ​ກຳ​ເນີດ​ຂຶ້ນ​ຂອງ​ກອງ​ກຳ​ລັງ​ອາ​ສາ​ສະ​ໝັກ​ທີ່​ສຳ​ຄັນ​ດັ່ງ​ກ່າວ​ຈະ​ເນັ້ນ​ໃຫ້​ເຫັນ​ສິ່ງ​ທ້າ​ທາຍ​ຕ່າງໆ​ທີ່​ປະ​ທາ​ນາ​ທິ​ບໍ​ດີ ຣັດ​ເຊຍ ທ່ານ ວ​ລາ​ດິ​ເມຍ ປູ​ຕິນ ແລະ ຜູ້​ວາງ​ແຜນ​ສົງ​ຄາມ​ຂອງ​ທ່ານ ໄດ້​ປະ​ເຊີນ ໃນ​ຂະ​ນະ​ທີ່​ພ​ວກເຂົາ​ພະ​ຍາ​ຍາມ ​ທີ່​ຈະ​ເອົາ​ຊະ​ນະ​ປະ​ເທດ ໃນ​ຍຸກຫຼັງ​ສາ​ທາ​ລະ​ນະ​ລັດ ໂຊ​ຫວຽດ ທີ່​ນ້ອຍກວ່າຫຼາຍ​ຂອງ ຣັດ​ເຊຍ ນັ້ນ.

ໜ່ວຍ​ສືບ​ລັບ​ປ້ອງ​ກັນ​ປະ​ເທດ ອັງ​ກິດ ໃນ​ວັນ​ທີ 10 ສິ​ງ​ຫາມື້ນີ້​ໄດ້​ອະທິ​ບາຍ ກອງ​ກຳ​ລັງ​ໃໝ່​ນັ້ນ​ວ່າ ເປັນ “ກອງ​ກຳ​ລັງ​ທະ​ຫານ​ບົກ​ທີ 3 ຫຼື 3 AC” ແລະ ໄດ້​ກ່າວ​ວ່າ ​ພວກ​ເຂົາ​ມີ​ຖານ​ຢູ່ນອກ​ເມືອງ ມູ​ລີ​ໂນ, ໃນ​ພາກ​ພື້ນ ນີ​ສ​ນີ ນອ​ຟ​ໂກ​ຣອດ (Nizhny Novgorod) ທາງ​ພາກ​ຕາ​ເວັນ​ອອກ​ຂອງ ມົ​ສ​ກູ.

ການ​ປະ​ເມີນ​ຜົນດັ່ງ​ກ່າວ​ຖືກ​ເປີດ​ເຜີຍ​ໃນ​ຂໍ້​ຄວາມ​ທາງ ທວິດ​ເຕີ ຂອງ​ການ​ລາຍ​ງານ​ຂໍ້​ມູນ​ລັບ​ໃໝ່​ ຂອງ​ກະ​ຊວງ​ປ້ອງ​ກັນ​ປະ​ເທດ.

ຂໍ້​ມູນ​ໃໝ່​ນັ້ນ​ໄດ້​ກ່າວ​ວ່າ “ຣັດ​ເຊຍ ມີ​ຄວາມ​ເປັນ​ໄປ​ໄດ້​ວ່າ​ໄດ້​ວາງ​ແຜນ​ທີ່​ຈະ​ສະ​ໜອງກອງ​ກຳ​ລັງ 3 AC ຂະ​ໜາດ​ໃຫຍ່​ຈາກ​ກອງ​ກຳ​ລັງ “ອາ​ສາ​ສະ​ໝັກ” ທີ່​ຫາ​ກໍ່​ຖືກ​ຕັ້ງ​ຂຶ້ນ​ມາ​ໃໝ່, ເຊິ່ງ​ຖືກ​ເກນ​ຈາກ​ທົ່ວ​ປະ​ເທດ, ແລະ ໄດ້​ລວມ​ກຸ່​ມ​ເຂົ້າ​ກັນ​ເພື່ອ​ຮັບ​ເກນ​ຈາກ​ບໍ​ລິ​ເວນ​ດຽວ​ກັນ.”

ກະ​ຊວງ​ໄດ້​ກ່​າວ​ຢ້ຳ​ຄຳ​ເວົ້າ​ ຂອງ​ພວກ​ເຈົ້າ​ໜ້າ​ທີ່​ ຣັດ​ເຊຍ ໃນ​ພາກ​ພື້ນ​ວ່າ ທະ​ຫານ​ເກນ 3 AC “ແມ່ນ​ຖືກ​ສະ​ເໜີ​ເງິນ​ສົດ​ໂບ​ນັ​ສ​ໃຫ້ຢ່າງຫຼວງຫຼາຍ ເວ​ລາ​ທີ່ພວກ​ເຂົາ​ຖືກ​ສົ່ງ​ໄປ ຢູ​ເຄ​ຣນ.”

ກອງ​ທະ​ຫານ ຣັດ​ເຊຍ ຫຼາຍ​ຮ້ອຍ​ພັນ​ຄົນ​ແມ່ນ​ກຳ​ລັງ​ເຂົ້າ​ຮ່ວມ ຫຼື ສະ​ໜັບ​ສະ​ໜູນ​ການ​ບຸກ​ລຸກ​ຂະ​ໜາດ​ໃຫຍ່​ໃນ ຢູ​ເຄ​ຣນ ທີ່​ໄດ້​ເລີ່ມ​ຂຶ້ນ​ເມື່ອ​ວັນ​ທີ 24 ກຸມ​ພາ, ລຸນຫຼັງ​ການ​ສະ​ໜັບ​ສະ​ໜູນຂອງ ຣັດ​ເຊຍ 8 ປີ​ ສຳ​ລັບ​ພວກ​ແບ່ງ​ແຍກ​ດິນ​ແດນ​ຕິດ​ອາ​ວຸດ​ໃນ​ພາກ​ຕາ​ເວັນ​ອອກ​ຂອງ ຢູ​ເຄ​ຣນ.

ບັນ​ດາ​ນັກ​ວິ​ເຄາະ​ກອງ​ທັບ​ຕາ​ເວັນ​ຕົກ​ໄດ້​ໂຕ້​ແຍ້ງວ່າ ທ່ານ ປູ​ຕິນ ແລະ ກອງ​ທັບ​ຂອງ​ທ່ານ ແລະ ໜ່ວຍ​ສືບ​ລັບ ໄດ້​ຄາດ​ການ​ໄຊ​ຊະ​ນະທີ່ບໍ່​ໄດ້ເປັນ​ຕົວ​ເປັນ​ຕົນ​ຢ່າງ​ວ່ອງ​ໄວ.

ນັບ​ຕັ້ງ​ແຕ່​ໄດ້​ປະ​ສົບ​ຄວາມ​ລົ້ມ​ແຫຼວ​ເພື່ອ​ຍຶດ​ເອົາ​ນະ​ຄອນຫຼວງ ກີ​ຢິບ ຂອງ ຢູ​ເຄ​ຣນ ໃນ​ຕອນ​ຕົ້ນ​ຂອງ​ການ​ບຸກ​ລຸກ​ນັ້ນ, ພວກ​ຜູ້​ບັນ​ຊາ​ການ ຣັດ​ເຊຍ ໄດ້​ແນະ​ນຳ​ວ່າ ​ພວກ​ເຂົາ​ຈະ​ສຸມກອງ​ກຳ​ລັງ​ຂອງ​ພວກ​ເຂົາ​ໃສ່​ເຂດ​ແດນ​ໃນ​ພາກ​ຕາ​ເວັນ​ອອກ ແລະ ໃຕ້​ຂອງ ຢູ​ເຄ​ຣນ.

ໜ່ວຍ​ສືບ​ລັບ​ປ້ອງ​ກັນ​ປະ​ເທດ​ຂອງ ອັງ​ກິດ ໄດ້​ກ່າວ​ວ່າ “ພວກ​ຜູ້​ບັນ​ຊາ​ການ ຣັດ​ເຊຍ ມີ​ຄວາມ​ເປັນ​ໄປ​ໄດ້​ວ່າ​ຈະ​ສືບ​ຕໍ່​ປະ​ເຊີນ​ກັບ​ການ​ພະ​ຍາ​ຍາມ​ປະ​ຕິ​ບັດບູ ​ລິ​ມະ​ສິດຕ່າງໆ​ໃນ​ການ​ໂຈມ​ຕີ​ພາກ​ພື້ນ ດອນ​ບາ​ສ ແລະ ເສີມ​ຂະ​ຫຍາຍ​ການ​ປ້ອງ​ກັນ ​ຕໍ່​ການ​ໂຈມ​ຕີ​ຕອບ​ໂຕ້​ທີ່​ຄາດ​ການ​ໄວ້​ຂອງ ຢູ​ເຄ​ຣນ ​ໃນ​ພາກ​ໃຕ້.”

ບັນ​ດາ​ເຈົ້າ​ໜ້າ​ທີ່​ປ້ອງ​ກັນ​ປະ​ເທດ ສະ​ຫະ​ລັດ ເມື່ອບໍ່​ດົນ​ມານີ້​ໄດ້​ກະ​ປະ​ມານ​ວ່າ ກອງ​ທະ​ຫານ ຣັດ​ເຊຍ 70,000 ຫາ 80,000 ຄົນ​ຖືກ​ຂ້າ​ຕາຍ ຫຼື ໄດ້​ຮັບ​ບາດ​ເຈັບ​ໃນ​ການ​ຕໍ່​ສູ້.

ລັດ​ຖະ​ບານ ຢູ​ເຄ​ຣນ ກ່ອນ​ໜ້ານີ້​ໄດ້​ກ່າວ​ວ່າກອງ​ທະ​ຫານ​ຂອງ​ເຂົາ​ເຈົ້າ 100 ຫາ 200 ຄົນ​ໄດ້​ເສຍ​ຊີ​ວິດໃນ​ແຕ່​ລະ​ວັນ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG