ໄຕ້ຝຸ່ນຣາມມະສູນ ໄດ້ພັດຜ່ານປະເທດຟີລິບປີນໄປແລ້ວ
ແລະກຳລັງພັດມຸ່ງໜ້າ ໄປຍັງພາກເໜືອຂອງຫວຽດນາມ
ແລະເກາະໄຫໜານ ຂອງປະເທດຈີນ ຊຶ່ງມີຄວາມເປັນໄປ
ໄດ້ວ່າອາດຈະເພີ້ມຄວາມແຮງແລະໄວຂຶ້ນໃນຂະນະທີ່ພັດ
ຜ່ານທະເລຈີນໃຕ້.
ຣາມມະສູນ ຊຶ່ງເປັນໄຕ້ຝຸ່ນຫົວທຳອິດຂອງລະດູ ໄດ້ພັດຂຶ້ນຝັ່ງຟີລິບປີນ ໃນວັນພຸດມື້ນີ້ ພ້ອມກັບລົມທີ່ມີຄວາມແຮງສູງເຖິງ 250 ກິໂລແມັດຕໍ່ຊົ່ວໂມງ ເຮັດໃຫ້ຢ່າງນ້ອຍ 10 ຄົນເສຍຊີວິດ ແລະໄຟຟ້າມອດຢູ່ໃນຫຼາຍໆເຂດ.
ພາຍຸໄຕ້ຝຸ່ນລູກນີ້ໄດ້ພັດ ຫຼັງຄາເຮືອນຫຼາຍໆຫຼັງເສຍຫາຍ ຕົ້ນໄມ້ ຈຳນວນນຶ່ງຖືກໂຄ່ນລົງ ແລະຫຼາຍໆເຂດທີ່ຢູ່ອາໄສ ໃນນະຄອນຫລວງ ມານີລາ ຖືກນ້ຳຖ້ວມ.
ຫຼາຍຄົນເສຍຊີວິດ ຍ້ອນຖືກຕົ້ນໄມ້ຫຼືເສົາໄຟຟ້າລົ້ມທັບ ແລະ ຢ່າງນ້ອຍ 3 ຄົນ ເສຍຊີວິດຍ້ອນຝາອາຄານພັງລົງມາທັບ ໃນເມືອງ Lucena.
ສ່ວນຜູ້ຄົນອີກຈຳນວນນຶ່ງ ຫາຍສາບສູນ ຊຶ່ງພາໃຫ້ມີທ່າທາງວ່າຈຳນວນຄົນເສຍຊີວິດ ອາດຈະເພີ້ມຂຶ້ນອີກຕື່ມ.
ຫຼາຍກ່ວາ 3 ແສນ 7 ໝື່ນຄົນ ໃນຫົກແຂວງ ໄດ້ພາກັນຍົກຍ້າຍໜີອອກຈາກເຮືອນຊານຂອງຕົນ ໄປຢູ່ບ່ອນຫລົບໄພ.
ກ່ອນໜ້າໄຕ້ຝຸ່ນຣາມມະສູນໄປຮອດ ຖ້ຽວບິນພາຍໃນປະເທດຫຼາຍສິບ ຖ້ຽວໄດ້ຖືກຍົກເລີກ ແລະໂຮງຮຽນຫຼາຍໆແຫ່ງໄດ້ຖືກປິດລົງ. ການຂົນສົ່ງທາງທະເລ ກໍໄດ້ຖືກປິດໝົດເຊັ່ນກັນ ເຮັດໃຫ້ຜູ້ໂດຍສານເຮືອຂ້າມຟາກຫຼາຍຮ້ອຍຄົນ ຕົກຄ້າງຢູ່ ຕາມທ່າເຮືອຕ່າງໆ.
ໄຕ້ຝຸ່ນ Rammasun ທີ່ມີຄວາມໝາຍວ່າ “ເທບພະເຈົ້າແຫ່ງຟ້າ ຮ້ອງ” ໃນພາສາໄທ ໄດ້ເພີ້ມຄວາມແຮງຂຶ້ນໃນຄ່ຳຄືນຂອງວັນຈັນຜ່ານມານີ້ ຈາກລົມພາຍຸເຂດຮ້ອນ ມາເປັນລົມໄຕ້ຝຸ່ນ.
ໄຕ້ຝຸ່ນ ຣາມມະສູນ ຖະຫຼົ່ມ ຟີລິບປິນ
