ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ປະນາມ
ການຍິງສັງຫານຕຳຫລວດ ນະຄອນນິວຢອກ 2 ຄົນ ແບບ
ເຜົາຂົນ ໃນຕອນກາງເວັນ ຂະນະທີ່ພວກເຂົາເຈົ້າ ນັ່ງຢູ່ໃນລົດ
ລາດຕະເວນຂອງເຂົາເຈົ້າ ເມື່ອວັນເສົາວານນີ້.
ປະທານາທິບໍດີ ໂອບາມາ ຊຶ່ງກຳລັງພັກຜ່ອນຢູ່ທີ່ລັດຮາວາຍ
ເວົ້າວ່າ “ຊາຍຜູ້ກ້າຫານສອງຄົນ ບໍ່ໄດ້ກັບຄືນເມືອບ້ານ
ຫາຄອບຄົວທີ່ຮັກຫອມ ໃນຄ່ຳຄືນນີ້ ແລະ ມັນບໍ່ມີເຫດ
ຜົນອັນໃດເລີຍ ທີ່ຈະເອົາມາເປັນຂໍ້ອ້າງເຮັດໃຫ້ມັນເປັນ
ເຊັ່ນນັ້ນ.”
ຕຳຫລວດສອງຄົນ Wenjian Liu ແລະ Rafael Ramos ກຳລັງນັ່ງຢູ່ໃນລົດຕຳຫລວດ
ຂອງພວກເຂົາເຈົ້າ ຢູ່ໃນຄຸ້ມ Bedford-Stuyvesant ຂອງເມືອງ Brooklyn ເວລາ ທ້າວ
Ismayyil Brinsley ໄວ 28 ປີ ຍ່າງເຂົ້າຫາພວກເຂົາເຈົ້າ ແລ້ວເປີດສາກຍິງ. ຫຼັງຈາກນັ້ນ ທ້າວ Brinsley ໄດ້ແລ່ນເຂົ້າໄປໃນສະຖານີລົດໄຟໃຕ້ດິນ ແລ້ວຍິງໂຕເອງຕາຍ.
ຜູ້ບັນຊາການຕຳຫລວດລັດນິວຢອກ ທ່ານ William Bratton ກ່າວວ່າ ຊາຍທັງສອງ
ທ່ານນີ້ ເວົ້າງ່າຍໆແລ້ວ ກໍແມ່ນວ່າ ຖືກ “ສັງຫານ.” ທ່ານກ່າວວ່າ ຜ່ານມາ ທ້າວ Brinsley
ເຄີຍໄດ້ເອົາຂໍ້ຄວາມ ທີ່ “ຕໍ່ຕ້ານຕຳຫລວດ” ຢ່າງຮ້າຍແຮງ ລົງເຜີຍແຜ່ທາງອິນເຕີເເນັດ
ຫຼື online.
ລັດຖະມົນຕີຍຸຕິທຳສະຫະລັດ ທ່ານ Eric Holder ໄດ້ປະນາມ ການຍິງສັງຫານ ແລະໄດ້ ເອີ້ນການກະທດັ່ງກ່າວວ່າ “ເປັນການກະທຳທີ່ປ່າເຖື່ອນ ແບບບໍ່ສາມາດຈະບັນລະຍາຍໄດ້.”
ທ້າວ Brinsley ໄດ້ຂຽນຂໍ້ຄວາມລົງໃນ Instagram ກ່ຽວກັບການລ້າງແຄ້ນໃຫ້ ທ້າວ Eric
Garner ຜູ້ບໍ່ມີອາວຸດ ທີ່ຖືກ ຕຳຫລວດຄົນຜິວຂາວ ຮັດຄໍຕາຍ ໃນນະຄອນນິວຢອກ.
ການຍິງສັງຫານຕຳຫລວດສອງຄົນນີ້ ມີຂຶ້ນໃນເວລາທີ່ ຄວາມເຄັ່ງຕຶງເພີ້ມທະວີຂຶ້ນ ໃນ
ນະຄອນນິວຢອກ ແລະ ທົ່ວສະຫະລັດ ລຸນຫຼັງ ການຕັດສິນໂດຍຄະນະຕຸລາການ ທີ່ບໍ່ຟ້ອງ ໂທດບັນດາຕຳຫລວດຜິວຂາວ ສຳຫລັບການຄາດຕະກຳຂອງພວກຜູ້ຊາຍຜິວດຳ ຜ່ານມາ.
ທ້າວ Blinsley ຜູ້ທີ່ໄດ້ສັງຫານ ຕຳຫລວດ ໃນວັນເສົາວານນີ້ ແມ່ນເປັນຄົນຜິວດຳ. ສ່ວນ ຕຳຫລວດສອງຄົນນັ້ນ ແມ່ນຄົນເອເຊຍ ແລະ ຄົນເຊື້ອສາຍສະເປນ.